ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ປີ 2023 ຜ່ານມາ, ທົ່ວປະເທດມີເນື້ອທີ່ເສຍຫາຍຍ້ອນໄຟໄໝ້ລາມປ່າ ທັງໝົດ 476.964 ເຮັກຕາ, ໃນນັ້ນ ເສຍຫາຍຫຼາຍກວ່າໝູ່ ແມ່ນ ແຂວງໄຊຍະບູລີ ເສຍຫາຍ 62.544 ເຮັກຕາ, ຮອງລົງມາແມ່ນ ແຂວງຫຼວງພະບາງ ເສຍຫາຍ 57.050 ເຮັກຕາ, ແຂວງ ແຂວງອັດຕະປື ເສຍຫາຍ 50.391 ເຮັກຕາ, ແຂວງຈຳປາສັກ ເສຍຫາຍ 47.265 ເຮັກຕາ ແລະ ແຂວງຄຳມ່ວນ ເສຍຫາຍ 44.773 ເຮັກຕາ; ສ່ວນແຂວງອື່ນໆ ແມ່ນເສຍຫາຍໜ້ອຍກວ່າ 40.000 ເຮັກຕາ.
ທ່ານ ສົມຫວັງ ພິມມະວົງ, ຫົວໜ້າກົມປ່າໄມ້ ກະຊວງກະສິກໍາ ແລະ ປ່າໄມ້, ກະຊວງກະສິກໍາ ແລະ ປ່າໄມ້ ໃຫ້ສຳພາດໃນວັນທີ 12 ມີນາ 2024 ນີ້ວ່າ: ສາເຫດຕົ້ນຕໍທີ່ເຮັດໃຫ້ເກີດມີໄຟໄໝ້ລາມປ່າໃນໄລຍະຜ່ານມາ ຫາ ປັດຈຸບັນ ແມ່ນ: ການບຸກເບີກ ແລະ ຫັນປ່ຽນພື້ນທີ່ປ່າໄມ້ ເພື່ອເຮັດການຜະລິດກະສິກຳ ໂດຍສະເພາະແມ່ນຈູດໄຮ່ເພື່ອປູກເຂົ້າ, ປູກມັນຕົ້ນ, ຢາງພາລາ ແລະ ພືດເສດຖະກິດອື່ນໆ, ການຈູດປ່າ ເພື່ອລ່າສັດປ່າ ແລະ ຈູດປ່າເພື່ອຊອກຢູ່ຫາກິນໃນປ່າ, ຈູດຄັງເພື່ອຂະຫຍາຍພື້ນທີ່ລ້ຽງສັດ ແລະ ອື່ນໆ.
ໃນປີຜ່ານມາ ສະພາບໄຟໄໝ້ລາມປ່າທີ່ເກີດຂຶ້ນພົ້ນເດັ່ນ ແມ່ນໄລຍະ ເດືອນມີນາ ຫາເດືອນເມສາ ໂດຍສະເພາະຢູ່ບັນດາແຂວງພາກເໜືອ, ໃນນີ້ ເດືອນເມສາ ແມ່ນເກີດຂຶ້ນຫນ້ອຍກວ່າເດືອນມີນາ ຍ້ອນມີຝົນຕົກໃນທ້າຍເດືອນ, ບວກກັບຄວາມເອົາໃສ່ຂອງພາກສ່ວນທີ່ກ່ຽວຂ້ອງນັບແຕ່ຂັ້ນສູນກາງຮອດຂັ້ນທ້ອງຖິ່ນທຸກຂັ້ນ.
ຫົວໜ້າກົມປ່າໄມ້ ໃຫ້ຮູ້ຕື່ມວ່າ: ສະເພາະໄລຍະຕົ້ນປີ 2024 ນີ້, ສະພາບໄຟໄໝ້ລາມປ່າໃນຂອບເຂດທົ່ວປະເທດຫລຸດລົງຈຳນວນຫລາຍ ຖ້າທຽບໃສ່ໄລຍະດຽວກັນຂອງປີ 2023 ຜ່ານມາ ເນື່ອງຈາກລັດຖະບານ ກໍຄືທັງສູນກາງ ແລະ ທ້ອງຖິ່ນເອົາໃຈ ໃສ່ຈັດຕັ້ງປະຕິບັດວຽກງານສະກັດກັ້ນ, ຄວບຄຸມໄຟໄໝ້ລາມປ່າຢ່າງເຂັ້ມງວດ ເປັນຕົ້ນ: ກະກຽມຄວາມພ້ອມ ແລະ ມາດຕະການເຝົ້າລະວັງ, ຕ້ານ ແລະ ສະກັດກັ້ນໄຟໄໝ້ລາມປ່າ ດ້ວຍການຫັນພະນັກງານລົງປະຈໍາແຕ່ລະຈຸດ/ບ້ານທີ່ຫລໍ່ແຫລມ, ພ້ອມທັງເກັບກໍາຂໍ້ມູນກຸ່ມເປົ້າໝາຍ ເພື່ອເຮັດສັນຍາກັບອົງການປົກຄອງບ້ານ ແລະປະ ຊາຊົນທີ່ມີສ່ວນກ່ຽວຂ້ອງ/ນໍາໃຊ້ທີ່ດິນປ່າໄມ້ ແລະ ອື່ນໆ.
Cr: ຂ່າວອອນລາຍ, ວິທະຍຸກະຈາຍສຽງແຫ່ງຊາດລາວ