ກອງປະຊຸມສະຫຼຸບການເຄື່ອນໄຫວວຽກງານປະຈໍາປີ 2023 ແລະ ທິດທາງແຜນການປີ 2024 ຂອງສະພາປະຊາຊົນປະຈຳເຂດເລືອກຕັ້ງເມືອງໄຊທານີ ນະຄອນຫຼວງວຽງຈັນ ຈັດຂຶ້ນວັນທີ 10 ພຶດສະພາ 2024 ຢູ່ສະໂມສອນເມືອງດັ່ງກ່າວ ໂດຍເປັນປະທານຂອງທ່ານ ບົວລີ ແກ້ວມະນີວັນ ຫົວໜ້າຄະນະສະມາຊິກສະພາປະຊາຊົນ ປະຈຳເຂດເລືອກຕັ້ງເມືອງໄຊທານີ.
ກອງປະຊຸມຄັ້ງນີ້ໄດ້ຮັບຟັງການສະຫຼຸບລາຍງານການເຄື່ອນ ໄຫວວຽກງານປີ 2023 ແລະ ທິດທາງແຜນການປີ 2024 ເຊິ່ງ 1 ປີຜ່ານມາ ຄະນະສະມາຊິກສະພາປະຊາຊົນປະຊາຊົນ ເມືອງໄຊທານີ ໄດ້ເອົາໃຈໃສ່ວຽກງານແຕ່ລະດ້ານເປັນຕົ້ນການຕິດຕາມກວດກາການແກ້ໄຂບັນຫາທີ່ເກີດຂຶ້ນໃນສັງຄົມກ່ຽວກັບການຊົດເຊີຍ ການຊັກຊ້າ ແລະ ຄວາມບໍ່ເໝາະສົມຕ່າງໆ ໂດຍສະເພາະ ຜົນກະທົບຂອງການຈັດຕັ້ງປະຕິບັດໂຄງການພັດທະນາຂອງລັດ ແລະ ເອກະຊົນ ໃນຂອບເຂດເມືອງໄຊທານີ ເຊັ່ນ: ໂຄງການກໍ່ສ້າງສາຍສົ່ງໄຟຟ້າ 230 ກິໂລໂວນ ໂຄງການກໍ່ສ້າງທາງດ່ວນວຽງຈັນໝາຍເລກ 1 ແລະ ໂຄງການລົດໄຟລາວ-ຈີນ ໄລຍະທີ 2 ໂຄງການສໍາຫຼວດເກືອກະລີ ບັນຫາການຊົດເຊີຍຜົນກະທົບຈາກສະໜາມກັອບບຸຍອງ ຂອງປະຊາຊົນ 59 ຄອບຄົວ ບັນຫາປະຊາຊົນ 5 ຄອບຄົວ ທວງເອົາຄ່າຄວາມເສຍຫາຍຂອງສວນມັນຕົ້ນທີ່ຖືກທໍາລາຍ ຢູ່ບ້ານຈະເລີນໄຊ ບັນຫາຂໍ້ຂັດແຍ່ງທີ່ດິນຕິດພັນກັບທາງຮ່ອມ ແລະ ຂໍ້ຂັດແຍ່ງທີ່ດິນຢູ່ບ້ານຫາດກ້ຽງ, ບ້ານສະພັງເມິກ ບັນຫາການເກັບກຳຂໍ້ມູນຂໍສິດນໍາໃຊ້ດິນລັດ ແລະ ອື່ນໆ.
ພ້ອມນີ້ຍັງໄດ້ຮັບຄຳສະເໜີຮ້ອງທຸກຈາກພໍ່ແມ່ປະຊາຊົນ 18 ເລື່ອງ ໃນນີ້ ແກ້ໄຂສໍາເລັດ 11 ເລື່ອງ ກຳລັງແກ້ໄຂ 7 ເລື່ອງ ພົວພັນຫາຂໍ້ຂັດແຍ່ງທີ່ດິນໄດ້ 8 ຄໍາສະເໜີ ພ້ອມນີ້ໄດ້ຕິດຕາມກວດກາການຈັດຕັ້ງປະຕິບັດແຜນການລົງທຶນຂອງລັດ ແລະ ແຜນຈັດເກັບງົບປະມານ ທີ່ນະຄອນຫຼວງວຽງຈັນມອບໃຫ້ເມືອງຈັດຕັ້ງປະຕິບັດມີ 47 ໂຄງການ ມູນຄ່າ183 ຕື້ກວ່າກີບ ແຜນຊໍາລະໜີ້ສິນ ໂຄງການລົງທຶນຂອງລັດ 41 ໂຄງການ ມູນຄ່າ 172 ຕື້ກວ່າກີບ, ໃນນີ້ ມີໂຄງການສືບຕໍ່ 6 ໂຄງການ ມູນຄ່າ 10 ຕື້ກວ່າກີບ ຕິດຕາມການຈັດເກັບລາຍຮັບເຂົ້າງົບປະມານປະຈຳປີ 2023 ຜ່ານການຈັດຕັ້ງປະຕິບັດລາຍຮັບໄດ້ 63,88 ຕື້ກີບ ເທົ່າກັບ 123,69% ໃນນີ້ ຮັບຈາກສ່ວຍສາອາກອນ 61,98 ຕື້ກີບ ເທົ່າ ກັບ 122,25% ຂອງແຜນການປີ ຮັບຈາກຊັບສິນຂອງລັດ 1,906 ຕື້ກີບ ເທົ່າກັບ 200,66% ຂອງແຜນການປີ.
ທີ່ມາ: ວຽງຈັນທຸລະກິດສັງຄົມ
