ໃນວັນທີ 2 ກໍລະກົດ 2024 ນີ້ ທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ ປະທານຄະນະກໍາມະການຕ້ານການຄ້າມະນຸດຂັ້ນແຂວງ ໄດ້ໃຫ້ສໍາພາດກ່ຽວກັບບັນຫາການຄ້າມະນຸດຕໍ່ນັກຂ່າວແຂວງໄຊຍະບູລີ ວ່າ: ຜ່ານມາແຂວງໄຊຍະບູລີ ມີເຫດການກໍລະນີຄ້າມະນຸດເກີດຂຶ້ນດ້ວຍຫຼາຍຮູບແບບ, ຫຼາຍວິທີການ: ເປັນຕົ້ນແມ່ນການຄ້າປະເວນີໂດຍທາງອ້ອມ, ການນຳໃຊ້ສື່ສັງຄົມອອນລາຍ ແລະ ການແອບແຝງ ຕົວະຍົວະເອົາແຮງງານອອກໄປຕ່າງປະເທດແບບຜິດກົດໝາຍ, ການຂົນຂວາຍເອົາແມ່ຍິງລາວໄປແຕ່ງງານກັບຄົນຕ່າງປະເທດດ້ວຍຮູບການໝັ້ນໝາຍ, ແຕ່ງດອງແອບແຟງ, ໂດຍມີນາຍໜ້າເປັນຄົນລາວທີ່ມາຕິດຕໍ່ຂົນຂວາຍ ມີລັກສະນະເປັນເຄື່ອຂ່າຍ ດ້ວຍການໂຄສະນາວ່າຈະໄດ້ຄ່າດອງເປັນເງິນຈຳນວນຫຼາຍ ຊີວິດການເປັນຢູ່ຈະດີຂຶ້ນ.
ຫຼັງຈາກນັ້ນກໍ່ໄດ້ເອົາເງິນມາຈ່າຍເປັນຄ່າໝັ້ນໝາຍຈຳນວນໜຶ່ງ ແລ້ວກໍ່ເຮັດພັດສະປອດໄປທ່ຽວຕ່າງປະເທດ, ພາຍຫຼັງໄປຮອດຕ່າງປະເທດແລ້ວ ແມ່ຍິງລາວຈະຖືກບັງຄັບຂູດຮີດແຮງງານຈຳກັດບໍລິເວນ, ຂູດຮີດທາງເພດ, ຖືກຂາຍຕໍ່ໄປໃຫ້ກັບກຸ່ມແກ້ງອື່ນດ້ວຍຮູບການຕ່າງໆຂອງການຄ້າມະນຸດ ໃນທີ່ຜ່ານມາແຂວງໄຊຍະບູລີ ກໍ່ເຄີຍມີເຫດການຄ້າມະນຸດເກີດຂຶ້ນ ເຊິ່ງສາມາດຊ່ວຍກັບມາໄດ້ ມີ 6 ຄະດີ ຄື: ຄະດີແຕ່ງດອງໝັ້ນໝາຍແອບແຝງ ມີຜູ້ເສຍຫາຍຍິງ 6 ຄົນ, ການບັງຄັບຂາຍປະເວນີ 1 ຄັ້ງ (ຜູ້ເສຍຫາຍຍິງ 1 ຄົນ), ຕົວະຍົວະເອົາຄົນໄປເປັນແຮງງານ 3 ຄັ້ງ (ຊ່ວຍເຫຼືອໄດ້ທັນ 2 ຄົນ (ຍິງ1), ຊ່ວຍບໍ່ໄດ້ 1 ຄົນ), ການໃຫ້ຖືພາມານລູກ 1 ຄັ້ງ, ຕົວະຍົວະເອົາຄົນໄປຂາຍຢູ່ສາມລ່ຽມຄໍາ 3 ຄັ້ງ (ຜູ້ເສຍຫາຍຍິງ 10 ຄົນ), ຕົວະເອົາຄົນໄປຂາຍຢູ່ປະເທດມຽນມາ 5 ຄົນ (ຍິງ 4 ຄົນ) ແລະ ຍັງມີຫຼາຍກໍລະນີທີ່ຍັງຊ່ວຍເຫຼືອບໍ່ທັນໄດ້ມີ 6 ຄົນ, ຍິງ 4 ຄົນ, ບາງກໍລະນີແມ່ນບໍ່ຮູ້ສະຕາກຳມີ 3 ຄົນ, ຍິງ 3 ຄົນ.
ທ່ານໃຫ້ຮູ້ຕື່ມວ່າ: ສາເຫດທີ່ພາໃຫ້ເກີດກໍລິນີມີການຄ້າມະນຸດຍ້ອນການຄ້າມະນຸດມີຄ່າຕອບແທນສູງ ແລະ ມີຜົນກໍາໄລໄວ, ດ້ານໜຶ່ງຍ້ອນເສດຖະກິດຄອບຄົວມີຄວາມຝືດເຄືອງຫຍຸ້ງຍາກ ຈຶ່ງຢາກພາກັນອອກໄປຫາເງິນຢູ່ບ່ອນທີ່ມີຄວາມຈະເລີນທາງດ້ານເສດຖະກິດໄປທາງຖືກກົດໝາຍ ແລະ ບໍ່ຖືກກົດໝາຍ ເປັນເຫດໃຫ້ຂະບວນການຄ້າມະນຸດແຝງຕົວເປັນນາຍໜ້າຊ່ວຍຊອກຫາວຽກເຮັດງານທໍາໃຫ້ ເພື່ອລໍ່ລວງ ກົດຂີ່ບັງຄັບ ໂດຍສະເພາະແມ່ນແຮງງານທີ່ເປັນເພດຍິງ ແລະ ເດັກນ້ອຍ ທີ່ຮູ້ເທົ່າບໍ່ເຖິງການຕໍ່ກົນອຸບາຍຂອງກຸ່ມແກ້ງຄ້າມະນຸດ ແລະ ຍັງມີກໍລະນີໜຶ່ງ ຍ້ອນຄວາມຢາກຮູ້ຢາກເຫັນ ຢາກໄປທ່ອງທ່ຽວ ເຊິ່ງໄດ້ຖືກເຄືອຂ່າຍຂອງການຄ້າມະນຸດແອບແຝງໃນຮູບແບບບ່າວສາວ ແລະ ວິທີຕີສະໜິດ ຕົວະຍົວະໄປທ່ຽວນໍາ ແລະ ນໍາໄປຄ້າມະນຸດ.
