ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ປີ 2018 ແຂວງຫຼວງພະບາງ ມີນັກທ່ອງທ່ຽວເຂົ້າທ່ຽວຊົມ 7 ແສນກ່ວາຄົນ ຂະນະທີ່ ປີ 2019 ໄດ້ຮັບລາງວັນເມືອງທ່ອງທ່ຽວຍອດນິຍົມອີກ

ກອງປະຊຸມວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ທົ່ວແຂວງຫຼວງພະບາງ ປະຈໍາປີ 2018-2019 ໄດ້ອັດລົງດ້ວຍຜົນສໍາເລັດອັນຈົບງາມ ໃນຕອນແລງຂອງວັນທີ່ 8 ກຸມພານີ້ ພາຍຫຼັງທີ່ດໍາເນີນມາເປັນເວລາ 02 ວັນ. ໂດຍໄດ້ໄດ້ສຸມໃສ່ການສະຫຼຸບຄືນ ການປະຕິບັດໜ້າທີ່ວຽກງານຖະແຫຼງຂ່າວ, ວັດທະນະທໍາ ແລະທ່ອງທ່ຽວ ໃນໄລຍະ 01 ປີຜ່ານມາ, ພ້ອມທັງວາງທິດທາງແຜນການໃນປີຕໍ່ໜ້າ ໂດຍມີການປະກອບຄວາມເຫັນ ຈາກຫຼາຍພາກສ່ວນ ໃນຫຼາຍບັນຫາທີ່ມີຄຸນຄ່າ ດ້ວຍແນວຄິດທີ່ສ້າງສັນ, ໃນນັ້ນ ວຽກງານຖະແຫຼງຂ່າວໄດ້ພັດທະນາດ້ານວິທີການ ແລະຮູບແບບການນໍາສະເໜີຂໍ້ມູນຂ່າວສານ, ສາລະໜ້າຮູ້ ແລະຄວາມບັນເທີງຜ່ານສື່ຕ່າງໆ ເປັນຕົ້ນແມ່ນ: ວິທະຍຸ, ໂທລະພາບ ແລະໜັງສືພິມ ເຮັດໃຫ້ສັງຄົມໄດ້ຮັບຂໍ້ມູນຂ່າວສານດ້ານຕ່າງໆ ຊັດເຈນ ແລະວ່ອງໄວກວ່າເກົ່າ; ວຽກງານວັດທະນະທໍາ ໄດ້ຢຶດໝັ້ນທິດນໍາ: ປົກປັກຮັກສາ ແລະເສີມຂະຫຍາຍຮີດຄອງປະເພນີ ວັດທະນະທໍາອັນເປັນມູນເຊື້ອຂອງຊາດ, ຂອງທ້ອງຖິ່ນ ກໍຄືເອກະລັກສະເພາະຂອງເຜົ່າຕ່າງໆ ພາຍໃນແຂວງໄດ້ເປັນຢ່າງດີ, ປົກປັກຮັກສາມໍລະດົກໃຫ້ຊົງຄຸນຄ່າ ແລະຍືນຍົງ, ຂະບວນການສິລະປະວັນນະຄະດີ ຢູ່ແຕ່ລະໂຮງຮຽນ ແລະທ້ອງຖິ່ນຮາກຖານບ້ານ ໄດ້ເຄື່ອນໄຫວ ຮັບໃຊ້ວັນສໍາຄັນຕ່າງໆຂອງຊາດ, ຂອງພັກ ແລະການສະເຫຼີມສະຫຼອງປີທ່ອງທ່ຽວລາວ 2018; ສຳລັບວຽກງານທ່ອງທ່ຽວ ໄດ້ເອົາໃຈໃສ່ໃນການພັດທະນາ ແລະສົ່ງເສີມການທ່ອງທ່ຽວ ຕິດພັນກັບການອະນຸລັກປົກປັກຮັກສາມໍລະດົກ ທາງດ້ານທຳມະຊາດ, ປະຫວັດສາດ ແລະວັດທະນະທຳ, ເສີມຂະຫຍາຍໃຫ້ຍືນຍົງ  ແລະສົ່ງເສີມການທ່ອງທ່ຽວ ດ້ວຍຫຼາຍຮູບ, ຫຼາຍແບບ ແລະຫຼາຍສີສັນ, ພິເສດ ໄດ້ເຮັດສໍາເລັດບັນດາກິດຈະກໍາໃນການສະເຫຼີມສະຫຼອງປີທ່ອງທ່ຽວລາວ 2018 ສາມາດດຶງດູດນັກທ່ອງທ່ຽວມາທ່ຽວຫຼວງພະບາງ ມີເຖິງ 755.019 ຄົນ, ເພີ່ມຂື້ນ 15,19 ສ່ວນຮ້ອຍ. ກອງປະຊຸມຄັ້ງນີ້ ໄດ້ໃຫ້ກຽດຮັບຟັງການໂອ້ລົມຂອງ ທ່ານ ບໍ່ແສງຄໍາ ວົງດາລາ, ລັດຖະມົນຕີ ກະຊວງຖະແຫຼງຂ່າວ, ວັດທະນະທຳ ແລະທ່ອງທ່ຽວ, ເຊິ່ງທ່ານໄດ້ເນັ້ນໜັກຫຼາຍບັນຫາທີ່ມີຄຸນຄ່າ ແລະເປັນເຂັມຊີ້ທິດເຍືອງທາງ ໃຫ້ແກ່ການຈັດຕັ້ງເຄື່ອນໄຫວວຽກງານຖະແຫຼງຂ່າວ, ວັດທະນະທຳ ແລະທ່ອງທ່ຽວ ຂອງແຂວງຫຼວງພະບາງ ເປັນຕົ້ນ ທ່ານໄດ້ເນັ້ນໃຫ້ ຄະນະນຳພະແນກ ສືບຕໍ່ປະຕິບັດວຽກງານສືກສາອົບຮົມການເມືອງແນວຄິດເປັນກົກ, ເຕົ້າໂຮມຄວາມສາມັກຄີ ໃຫ້ເປັນປຶກແຜ່ນ ຖືເປັນພັນທະໜ້າທີ່ ແລະຄວາມຮັບຜິດຊອບການເມືອງຂອງຕົນ, ຄຽງຄູ່ກັບການປັບປຸງຂອດທີ່ຄົງຄ້າງຂອງວຽກງານທຸກດ້ານ ຄຽງຄູ່ກັບການສ້າງເງື່ອນໄຂອຳນວຍຄວາມສະດວກໃຫ້ແກ່ປີທ່ອງທ່ຽວລາວຈີນ 2019 ແລະການຮັກສານາມມະຍົດເມືອງຍອດນິຍົມແຫ່ງການທ່ອງທ່ຽວ ຈາກວາລະສານວັນເດີລັດ ທີ່ໄດ້ມອບໃຫ້ແກ່ແຂວງຫຼວງພະບາງອີກໃນປີ 2019.

 

ກອງປະຊຸມຄັ້ງນີ້ ໄດ້ມອບໃບຍ້ອງຍໍຂອງເຈົ້າແຂວງຫລວງພະບາງ ໃຫ້ແກ່ກົມກອງ ແລະບຸກຄົນທີ່ມີສ່ວນຮ່ວມຜະລິດສາລະຄະດີ ມະຫັດສະຈັນເມືອງງອຍ ສາມາດຍາໄດ້ອັນດັບທີ່ 1 ໃນທົ່ວປະເທດ ແລະຜູ້ທີ່ປະກອບສ່ວນພັດທະນາວຽກງານ ຖວທ ຂອງແຂວງຫຼວງພະບາງ, ພ້ອມທັງມອບໃບຍ້ອງຍໍຂອງຫົວໜ້າພະແນກ ຖວທ ແຂວງໃຫ້ແກ່ກົມກອງ ແລະບຸກຄົນທີ່ປະກອບສ່ວນວຽກງານວິຊາສະເພາະຕື່ມອີກ. ເຂົ້າຮ່ວມກອງປະຊຸມຄັ້ງນີ້ ມີ ທ່ານວົງສະຫວັນ ເທບພະຈັນ ຮອງເຈົ້າແຂວງຫຼວງພະບາງ ພ້ອມດ້ວຍຜູ້ຕາງໜ້າພະແນກການ, ກົມກອງກ່ຽວຂ້ອງ ແລະພະນັກງານທົ່ວພະແນກ ຕະຫຼອດຮອດຫົວໜ້າ ຮອງຫົວໜ້າຫ້ອງການຖວທ 11 ເມືອງ ແລະ 1 ນະຄອນ.