ໃນປີ 2020 ຜ່ານມາ ສູນເລືອດຂອງອົງ ການກາແດງລາວ ແຂວງຫຼວງພະບາງ ໄດ້ຮ່ວມກັບ ຄະນະບໍລິຫານງານຊາວໜຸ່ມແຂວງ, ສະຫະພັນແມ່ຍິງແຂວງ ແລະການຈັດຕັ້ງຂັ້ນຕ່າງໆ ດຳເນີນການປຸກລະດົມ ແລະຈັດຮັບບໍລິຈາກເລືອດໄດ້ຫຼາຍກວ່າ 197 ຄັ້ງ ມີຜູ້ເຂົ້າຮ່ວມຂະບວນບໍລິຈາກເລືອດ 12.895 ເທື່ອຄົນ ໄດ້ຮັບເລືອດຕົວຈິງ 4.587 ຖົງ ລື່ນຄາດໝາຍຂອງແຜນການທີ່ວາງໄວ້. ດຣ ວຽງສະຫັວນ ກະເສີມສຸກ ຫົວໜ້າອົງການກາແດງລາວ ປະຈຳແຂວງຫຼວງພະບາງ ໄດ້ໃຫ້ສຳພາດວ່າ: ໃນປີຜ່ານມາ ຈຳນວນຜູ້ບໍລິຈາກເລືອດແບບສະໝັກໃຈ ບໍ່ຮຽກ ຮ້ອງສິ່ງຕອບແທນໄດ້ກວມເອົາ 90% ຂອງການບໍລິຈາກເລືອດທັງໝົດ ສຳລັບປີ 2021, ຄາດໝາຍສູ້ຊົນການປຸກລະດົມ ແລະຈັດຫາເລືອດ ຈະໃຫ້ບັນລຸ 4.800 ຖົງ. ໃນໂອກາດວັນທີ່ 14 ມິຖຸນາ ວັນຜູ້ບໍລິຈາກເລືອດໂລກ ຈະໄດ້ໜູນວຽນມາອີກເທື່ອໜຶ່ງນັ້ນ ທ່ານໄດ້ສະແດງຄວາມຮູ້ບຸນຄຸນ ແລະຂອບໃຈຢ່າງສູງ ມາຍັງບຸກ ຄົນ ກໍ່ຄືການຈັດຕັ້ງ ທີ່ໄດ້ປະກອບສ່ວນເຂົ້າໃນຂະບວນການບໍລິຈາກເລືອດຢ່າງຕັ້ງໜ້າ ທັງເຮັດການປຸກລະດົມເຊີນຊວນ ແລະທັງປະກອບສ່ວນ ດ້ານວັດຖຸປັດໄຈ ເຂົ້າໃນກິດຈະກຳສະເຫຼີມສະຫຼອງ ວັນຜູ້ບໍລິຈາກເລືອດແຕ່ລະປີ.
ສຳລັບ ກິດຈະກຳສະເຫຼີມສະຫຼອງວັນຜູ້ບໍລິຈາກເລືອດໂລກປີນີ້ ເນື່ອງຈາກ ມີ ການລະບາດຂອງພະຍາດໂຄວິດ-19, ສູນເລືອດຂອງອົງການກາແດງລາວ ແຂວງຫຼວງພະບາງ ຈະໄດ້ຈັດຮັບບໍລິຈາກເລືອດແບບເປີດກວ້າງ ຢູ່ຫ້ອງການຄະນະບໍລິຫານງານຊາວໜຸ່ມແຂວງ ໃນວັນທີ່ 14 ມິຖຸນາ 2021 ຢູ່ຫ້ອງການຄະນະບໍລິຫານງານຊາວໜຸ່ມແຂວງ ຕາມມາດຕະການຂອງຄະນະສະເພາະກິດວາງອອກ ເປັນຕົ້ນ ການໃສ່ຜ້າອັດປາກ, ລ້າງມືດ້ວຍນ້ຳສະອາດ ຫຼື ເຈວລ້າງມື ແລະການປະຕິບັດໄລຍະຫ່າງ ຊຶ່ງຈະມອາສາສະມັກຊາວໜຸ່ມ, ອາສາສະມັກກູ້ໄພ ຄອຍໃຫ້ຄໍາແນະນໍາ ແລະເຫຼືອຜູ້ທີ່ຮ່ວມບໍລິຈາກເລືອດພາຍໃນງພິທີ.
Loading...