ທ່ານ ບຸນຄົງ ຫຼ້າຈຽມພອນ ກໍາມະການສໍາຮອງສູນກາງພັກ ເລຂາພັກແຂວງ ເຈົ້າແຂວງອຸດົມໄຊ ໄດ້ລາຍງານ ຕໍ່ກອງປະຊຸມສະໄຫມສາມັນ ເທື່ອທີ 4 ຂອງສະພາປະຊາຊົນແຂວງ ຊຸດທີ II ກ່ຽວກັບ ການເຄື່ອນໄຫວວຽກງານທີ່ພົ້ນເດັ່ນ ຂອງອົງການປົກຄອງແຂວງ ປະຈໍາປີ 2022 ແລະ ທິດທາງແຜນການ ປະຈໍາປີ 2023 ໃນວັນທີ 1 ກຸມພາ 2023 ນີ້
ເຊີ່ງໄດ້ຍົກໃຫ້ເຫັນຜົນງານທີ່ພົ້ນເດັ່ນໂດຍສັງເຂບ ແລະດ້ານອ່ອນ-ຂໍ້ຄົງຄ້າງ ຄຽງຄູ່ກັນນັ້ນກໍໄດ້ວາງທິດທາງແຜນການໂດຍມີບັນດາໜ້າວຽກຈຸດສຸມທີ່ຈະສຶບຕໍ່ຈັດຕັ້ງປະຕິບັດໃນປີ 2023 ຄື:
ສືບຕໍ່ ສຸມໃສ່ຈັດຕັ້ງປະຕິບັດວຽກງານປ້ອງກັນຊາດ, ປ້ອງກັນຄວາມສະຫງົບ ຕິດພັນກັບ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ບັນຫາໄຂຢາເສບຕິດ ແລະ ແກ້ໄຂປະກົດການຫຍໍ້ທໍ້ ຕ່າງໆໃນສັງຄົມຢ່າງຈິງຈັງ ແນໃສ່ຮັບປະກັນເຮັດໃຫ້ທົ່ວແຂວງມີຄວາມສະຫງົບ ແລະຄວາມເປັນ ລະບຽບຮຽບຮ້ອຍໂດຍພື້ນຖານ.
ຈັດຕັ້ງຜັນຂະຫຍາຍແຜນພັດທະນາເສດຖະກິດ-ສັງຄົມ ຕິດພັນກັບວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດ ຖະກິດ-ການເງິນ ປີ 2023 ໃນ 6 ເປົ້າຫມາຍ, 23 ແຜນວຽກຈຸດສຸມໃຫ້ບັນລຸຕາມມະຕິ ທີ່ສະພາປະຊາຊົນແຂວງໄດ້ຮັບຮອງ. ປັບປຸງ, ພັດທະນາວຽກງານ ການບໍລິການ, ໂຮງແຮມ, ເຮືອນພັກ, ຮ້ານອາຫານ ແຫຼ່ງທ່ອງທ່ຽວ, ສະຖານທີ່ປະຊຸມພາຍໃນແຂວງ ເພື່ອຮອງຮັບການເຂົ້າມາທ່ອງທ່ຽວ, ມາຈັດປະຊຸມ, ເຄື່ອນໄຫວວຽກງານ ຂອງແຂກພາຍໃນ ແລະຕ່າງປະເທດ ຈາກເສັ້ນທາງລົດໄຟລາວ – ຈີນ.
ສຸມໃສ່ສືບຕໍ່ຊຸກຍູ້ ສົ່ງເສີມການຜະລິດ ກະສິກໍາ (ການປູກ, ການລ້ຽງ ) ເປັນສິນຄ້າສົ່ງອອກ ຕິດພັນກັບການແກ້ໄຂ ຄວາມທຸກຍາກຂອງປະຊາຊົນ ຕາມທ່າແຮງ ໂດຍສະເພາະ ແມ່ນຂະບວນການປູກມັນຕົ້ນ ຕິດພັນກັບການປຸງແຕ່ງ ໃຫ້ ເປັນຂະບວນ ແຂງແຮງກວ່າເກົ່າ. ສຸມໃສ່ ສືບຕໍ່ປັບປຸງ ສ້າງສະພາບແວດລ້ອມອໍານວຍຄວາມສະດວກ ແກ່ການລົງທຶນ ພ້ອມທັງເຄື່ອນໄຫວ ປຸກລະດົມດຶງດູດການລົງທຶນ ຈາກພາກເອກະຊົນພາຍໃນ ແລະ ຕ່າງປະເທດ ເຂົ້າມາລົງທຶນຢູ່ແຂວງ ອຸດົມໄຊ ຕາມທ່າແຮງເສັ້ນທາງລົດໄຟລາວ – ຈີນ, ເອົາໃຈໃສ່ ຊຸກຍູ້ ສະຫນັບສະຫນູນ ໂຄງການພັດທະນາ ຂອງບໍລິສັດອໍາມະຕະຢູ່ເມືອງນາຫມໍ້, ບໍລິສັດລົດໄຟລາວ – ຈີນ, ໂຄງການພັດທະນາ ສາງຄ່ຽນຖ່າຍສິນຄ້າ, ການບໍລິການຂົນສົ່ງ ຢູ່ຈຸດສະຖານີເມືອງໄຊ ໃຫ້ເປັນລະບົບ ຄົບຊຸດ.
ສຸມໃສ່ນໍາພາ, ຊີ້ນໍາ ຈັດຕັ້ງປະຕິບັດໂຄງການກໍ່ສ້າງພື້ນຖານໂຄງລ່າງຕ່າງໆ ໂດຍສະເພາະແມ່ນໂຄງການກໍ່ສ້າງຕ້ານເຈື່ອນຢູ່ເທດສະ ບານເມືອງໄຊ, ທາງ 2E, 2W, ໂຄງການກໍ່ສ້າງເຂື່ອນໄຟຟ້າ ຢູ່ນໍ້າຂອງ, ໂຄງການກໍ່ສ້າງ ສູນພັດທະນາສີມືແຮງງານ ຢູ່ບ້ານບໍ່, ໂຄງການປັບປຸງເສັ້ນທາງເທດສະບານເມືອງໄຊ ແລະ ໂຄງການອື່ນໆ ໃຫ້ມີປະສິດທິຜົນ ແລະ ບັນລຸຕາມຄາດຫມາຍ ແລະສຸມໃສ່ຈັດຕັ້ງປະຕິບັດວຽກງານຟື້ນຟູຜົນກະທົບຈາກໄພພິບັດນໍ້າຖ້ວມຢູ່ 3 ເມືອງ (ເມືອງໄຊ, ເມືອງຫຼາ ແລະ ເມືອງນາຫມໍ້) ໂດຍສະເພາະແມ່ນປັບປຸງທີ່ຢູ່ອາໄສຂອງປະຊາຊົນຜູ້ທີ່ຂາດທີ່ຢູ່ອາໄສ ແລະ ປັບປຸງໂຄງການພື້ນຖານທາງດ້ານໂຄງລ່າງທີ່ເປ່ເພ, ເສຍຫາຍ ໃຫ້ສໍາເລັດໂດຍໄວ.
ຂ່າວ : ຄຳພູສະຫວັນ ເພັນສະຫວັດ