ກອງປະຊຸມເຜີຍແຜ່ການກະກຽມຄວາມພ້ອມເປັນເຈົ້າພາບ ປະທານກອງປະຊຸມເຈົ້າຄອງອາຊຽນ ກອງປະຊຸມເວທີເຈົ້າຄອງອາຊຽນ ແລະ ກອງປະຊຸມເຄືອຂ່າຍບັນດານະຄອນອາຊີຕາເວັນອອກສຽງໃຕ້ ຂອງສະມາຄົມທີ່ນຳໃຊ້ພາສາຝຣັ່ງ ທີ່ຈະຈັດຂຶ້ນໃນທີ 16-20 ກັນຍາ 2024 ທີ່ນະຄອນຫຼວງວຽງຈັນເປັນເຈົ້າພາບ ຈັດຂຶ້ນວັນທີ 20 ສິງຫາ 2024 ທີ່ຫ້ອງວ່າການນະຄອນຫຼວງວຽງຈັນ ເປັນປະທານຂອງ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ມີຮອງເຈົ້າຄອງ ບັນດາອານຸກຳມະການ ແລະ ຂະແໜງການກ່ຽວຂ້ອງເຂົ້າຮ່ວມ.
ທ່ານ ວົງໄຊ ພົມມີໄຊ ຫົວໜ້າພະແນກການຕ່າງປະເທດໄດ້ລາຍງານ ຂໍ້ຕົກລົງ ວ່າດ້ວຍການເປັນເຈົ້າພາບ ແລະ ປະທານກອງປະຊຸມເຈົ້າຄອງອາຊຽນ ກອງປະຊຸມເວທີເຈົ້າຄອງອາຊຽນ ແລະ ກອງປະຊຸມເຄືອຂ່າຍບັນດານະຄອນອາຊີຕາເວັນອອກສຽງໃຕ້ ຂອງສະມາຄົມທີ່ນຳໃຊ້ພາສາຝຣັ່ງ ເຊິ່ງຂໍ້ຕົລດັ່ງກ່າວໄດ້ກຳນົດອານຸກຳມະການຮັບຜິດຊອບບັນດາກອງປະຊຸມດັ່ງກ່າວ ເຊັ່ນ ຄະນະຊີ້ນຳລວມ ອານຸກຳມະການເນື້ອໃນກອງປະຊຸມ ອານຸກຳມະການພິທີການ ສະຖານທີ່ພັກເຊົາ ແລະ ການຈັດກິດຈະກຳ ອານຸກຳມະການຄຸ້ມຄອງພາຫະນະຂົນສົ່ງ ອານຸກຳມະການປ້ອງກັນຄວາມສະຫງົບ ຄວາມເປັນລະບຽບຮຽບຮ້ອຍໃນກອງປະຊຸມ ອານຸກຳມະການເຜີຍແຜ່ວັດທະນະທຳ ແລະ ຂ່າວສານ ອານຸກຳມະການເຕັກໂນໂລຊີ ແລະ ຂໍ້ມູນຂ່າວສານ ອານຸກຳມະການການແພດ ແລະ ສາທາລະນະສຸກ ອານຸກຳມະການສັງລວມລາຍຈ່າຍ-ລາຍຮັບງົບປະມານ ແຕ່ລະອານຸກຳມະການໄດ້ແບ່ງຄວາມຮັບຜິດຊອບໃຫ້ແຕ່ລະຂະແໜງຢ່າງລະອຽດແລ້ວ.
ຈາກນັ້ນ ທ່ານ ອາດສະພັງທອງ ສີພັນດອນ ກໍໄດ້ໂອ້ລົມຕໍ່ກອງກອງປະຊຸມບາງຕອນວ່າ: ເພື່ອກະກຽມຄວາມພ້ອມຮອບດ້ານໃຫແກ່ກອງປະຊຸມດັ່ງກ່າວ ກໍຄື ກອງປະຊຸຸມປິ່ນອ້ອມຕ່າງໆໂດຍຮຽກຮ້ອງໃຫ້ທຸກພາກສ່ວນ ເປັນເຈົ້າການຜັນຂະຫຍາຍຂໍ້ຕົກລົງ ແລະ ການວາງແຜນກຽມຄວາມພ້ອມໃຫ້ແຕ່ລະອະນຸກຳມະການ ກໍຄືຜູ້ຮັບຜິດຊອບວຽກງານໃນແຕ່ລະຂົງເຂດທີ່ມີລາຍຊື່ຢູ່ໃນຂໍ້ຕົກລົງ ເພື່ອນຳໄປຈັດຕັ້ງປະຕິບັດວຽກງານ ໃຫ້ມີຜົນສຳເລັດ ຖືກຕ້ອງສອດຄ່ອງກັບໜ້າວຽກຕົວຈິງ ພ້ອມທັງຊີ້ນຳໃຫ້ທຸກພາກສ່ວນ ເປັນເຈົ້າການມີສ່ວນຮ່ວມນຳກັນ ໃນການຈັດຕັ້ງປະຕິບັດຢ່າງມີປະສິດທິຜົນ ມີການປະສານງານສົມທົບກັນຢ່າງກົມກຽວ ສາມາດຮັບປະກັນໄດ້ຜົນສຳເລັດຕາມຄາດໝາຍຕົວຈິງ ຮັບປະກັນໄດ້ຄວາມສະຫງົບປອດໄພ ຄວາມເປັນລະບຽບຮຽບຮ້ອຍ ຈົບງາມເຮັດໃຫ້ກອງປະຊຸມສາມາດດຳເນີນໄປຢ່າງສະດວກສະບາຍ ຕິດພັນກັບວຽກປິ່ນອ້ອມ ແລະ ກິດຈະກຳຕ່າງໆທີ່ມີໃຫ້ມີຜົນສຳເລັດ.
ທີ່ມາ: ວຽງຈັນໃໝ່
