ປຶກສາຫາລືການຮ່າງນິຕິກຳ ເພື່ອສົ່ງເສີມການສ້າງນິຄົມອຸດສາ ຫະກຳ ທີ່ແຂວງຄຳມ່ວນ

ວັນທີ 23-24 ສິງຫານີ້, ຄະນະຮັບຜິດຊອບການສ້າງຮ່າງນິຕິກໍາ ເພື່ອສົ່ງເສີມການສ້າງນິຄົມອຸດສາຫະກໍາ ໂດຍມີຮອງລັດຖະ ມົນຕີ, ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ຮອງລັດຖະ ມົນຕີກະຊວງອຸດສາຫະກຳ ແລະ ການຄ້າ, ຮອງລັດຖະມົນຕີກະຊວງຍຸຕິທຳ, ຕາງໜ້າຈາກກະຊວງການເງິນ, ບັນດາກົມທີ່ມາຈາກກະຊວງກ່ຽວຂ້ອງ ໄດ້ລົງມາເຄື່ອນໄຫວວຽກງານຢູ່ແຂວງຄຳມ່ວນ ຊຶ່ງໄດ້ເຂົ້າພົບປະ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ທີ່ຫ້ອງວ່າການແຂວງ ເພື່ອລາຍງານຈຸດປະສົງ ແລະ ເປົ້າໝາຍໃນການລົງມາເຮັດວຽກ ພ້ອມທັງໄດ້ລົງຕິດຕາມສະພາບຕົວຈິງຢູ່ເຂດບໍລິສັດ ຊີໂນ-ອາກຣີ ໂປຕາສ ຈຳກັດ ຊຶ່ງເປັນເຂດທີ່ຈະສ້າງເປັນນິຄົມອຸດສາຫະກຳ ໝູນວຽນອັດສະລິຍະ ຢູ່ທີ່ບ້ານດົງໃຕ້ ເມືອງທ່າແຂກ.

ຈາກນັ້ນ ໄດ້ຮ່ວມປະຊຸມປຶກສາຫາລື ຢູ່ທີ່ເຮືອນຮັບແຂກ ເລກ 1 ແຂວງຄຳມ່ວນ. ໃນໄລຍະຜ່ານມາແຂວງຄຳມ່ວນ ໄດ້ຮັບການຊີ້ນຳຈາກລັດຖະບານ ແລະ ກະຊວງກ່ຽວຂ້ອງ ກ່ຽວກັບການ ສ້າງເງື່ອນໄຂໃຫ້ແກ່ການສ້າງນິຄົມອຸດສາຫະກຳ ໝູນວຽນອັດສະ ລິຍະ, ແຂວງຄຳມ່ວນ ກໍໄດ້ມີການຈັດສັນພື້ນທີ່ ແລະ ໄດ້ມີການລິເລີ່ມເຊັນ MOU ໃນການພັດທະນານິຄົມອຸດສາຫະກຳ ໃນເນື້ອ ທີ່ 2.000 ເຮັກຕາ. ແຕ່ເນື່ອງຈາກວ່າການສ້າງນິຄົມອຸດສາຫະກຳ ແມ່ນເປັນວຽກໃໝ່ສຳລັບລັດຖະບານ ແລະ ທ້ອງຖິ່ນ ຈຶ່ງມີຄວາມຈຳເປັນຈະຕ້ອງໄດ້ມີນິຕິກຳ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດ, ຜ່ານມາ ລັດຖະບານກໍໄດ້ແຕ່ງຕັ້ງຄະນະຮັບຜິດຊອບ ກະກຽມສ້າງນິຕິກຳ ກໍຄືດຳລັດດັ່ງກ່າວ, ປັດຈຸບັນ ຍັງຢູ່ໃນຂັ້ນຕອນການຄົ້ນຄວ້າ, ວິເຄາະ, ວິໄຈ ບັນຫາທີ່ຕິດພັນກັບການກຳ ນົດນະໂຍບາຍຕ່າງໆຕໍ່ຜູ້ລົງທຶນຢູ່ໃນນິຄົມອຸດສາຫະກຳ. ໃນກອງປະຊຸມປຶກສາຫາລືໃນຄັ້ງນີ້ ແມ່ນຈະໄດ້ນຳເອົາບັນດາຂໍ້ສະເໜີຂອງບໍລິສັດນຳ ໄປຄົ້ນຄວ້າ ຕິດພັນກັບນະໂຍບາຍຕ່າງໆຂອງລັດຖະ ບານ ເພື່ອບັນຈຸເຂົ້າຢູ່ໃນຮ່າງດຳລັດວ່າດ້ວຍນິຄົມອຸດສາຫະກຳ ເພື່ອລາຍງານໄປຍັງຄະນະປະຈຳສະພາແຫ່ງຊາດ ພິຈາລະນາຮັບ ຮອງ.

ຖ້າຫາກນິຄົມອຸດສາກະກຳດັ່ງກ່າວເກີດຂຶ້ນ ກໍຈະເປັນແມ່ແຮງອັນໜຶ່ງທີ່ຈະຊ່ວຍດຶງດູດເອົານັກລົງທຶນເຂົ້າມາດຳເນີນກິດຈະ ການແບບໝູນວຽນ ຢູ່ໃນເຂດນິຄົມອຸດສາຫະກຳ ແລະ ຈະຊ່ວຍພັກດັນໃຫ້ແກ່ການພັດທະນາເສດຖະກິດ-ສັງຄົມ ຂອງປະເທດ ກໍຄືແຂວງຄຳມ່ວນ ໃຫ້ມີການຂະຫຍາຍຕົວດີຂຶ້ນ. (ຂ່າວ-ພາບ: ກອງຄໍາ)