ວັນທີ 24 ພະຈິກ 2022, ຜູ້ຕາງໜ້າຈາກກະຊວງສາທາລະນະສຸກ, ອົງກອນຮ່ວມມືສາກົນ ສ.ເກົາຫລີ KOICA) ແລະ ອົງການອະນາໄມໂລກ (WHO) ໄດ້ເຂົ້າຮ່ວມພິທີ ປຶກສາຫາລື ກ່ຽວກັບຄວາມຄືບໜ້າ ໃນວຽກງານການແກ້ໄຂ ເຊື້ອຈຸລະຊີບທີ່ຕ້ານຕໍ່ຢາ ໃນ ສປປ ລາວ ພ້ອມທັງປຶກສາຫາລື ໂອກາດໃນການແກ້ໄຂ ໄພຂົ່ມຂູ່ທາງດ້ານສຸຂະພາບໂລກ.
ການປຶກສາດັ່ງກ່າວໄດ້ຈັດຂຶ້ນ ໃນໄລຍະສັບປະດາປູກຈິດສໍານຶກການນໍາໃຊ້ຢາຕ້ານເຊື້ອຈຸລະຊີບ ໃນພິທີສະຫຼຸບໂຄງການໃຫຍ່ ຂອງອົງການ WHO ແລະ ອົງກອນ KOICA ເຊິ່ງເປັນຕົວຂັບເຄື່ອນ ໃຫ້ແກ່ຄວາມສາມາດຂອງຫ້ອງວິເຄາະແຫ່ງຊາດ ໃນການບົ່ງມະຕິ ແລະ ຕິດຕາມເຊື້ອຈຸລະຊີບທີ່ຕ້ານຕໍ່ຢາ, ການຝຶກອົບຮົມພະນັກງານ ແລະ ການລາຍງານຕໍ່ຫ້ອງວິເຄາະລະດັບຊາດ ແລະ ສາກົນ ພ້ອມທັງ ເຄືອຂ່າຍຕິດຕາມກວດກາ.
ປະຈຸບັນ ໃນແຕ່ລະປີ, ມີຢ່າງໜ້ອຍ ມີຜູ້ເສຊີວິດ 700 000 ຄົນ ຈາກພະຍາດທີ່ເກີດຈາກເຊື້ອຕ້ານຕໍ່ຢາ. ຄາດວ່າຕົວເລກຜູ້ເສຍຊີວິດ ຈະເພີ່ມຂຶ້ນເປັນ 10 ລ້ານ ຄົນ ຕໍ່ປີ ພາຍໃນປີ 2050.
ດຣ. ບຸນແຝງ ພູມມະໄລສິດ, ລັດຖະມົນຕີກະຊວງສາທາລະນະສຸກ ກ່າວວ່າ: “ເຊື້ອຈຸລະຊີບຕ້ານຕໍ່ຢາ ແມ່ນໜຶ່ງໃນ 10 ໄພຂົ່ມຂູ່ທາງດ້ານສາທາລະນະສຸກທີ່ມະນຸດກໍາລັງປະເຊີນ. ການຕ້ານຕໍ່ຢາ ແມ່ນການທີ່ເຊື້ອຈຸລິນຊີ, ຈຸລະໂລກ, ເຊື້ອເຫັດ ແລະ ແມ່ກາຝາກ ມີການປ່ຽນແປງຕາມການເວລາ ກາຍເປັນເຊື້ອທີ່ບໍ່ມີການຕອບສະໜອງຕໍ່ຢາ ເຊິ່ງເຮັດໃຫ້ເກີດມີຄວາມສ່ຽງຮ້າຍແຮງຕໍ່ສຸຂະພາບຂອງຄົນ ແລະ ສັດ ພ້ອມທັງຂະແໜງກະສິກຳ ແລະ ການລ້ຽງສັດ ອີກດ້ວຍ.”“ແຕ່ວ່າ ສປປ ລາວ ໄດ້ມີຄວາມຄືບໜ້າ ໃນການ ເພີ່ມຄວາມສາມາດໃນການຕິດຕາມ ແລະ ຕອບໂຕ້ຕໍ່ໄພຂົ່ມຂູ່ນີ້ ໂດຍການສະໜັບສະໜູນຈາກຄູ່ຮ່ວມມື ຜູ້ສຳຄັນຂອງພວກເຮົາ ກໍຄື ອົງກອນ KOICA ແລະ ອົງການ WHO ເຊິ່ງພວກເຮົາຮູ້ສຶກຂອບໃຈເປັນຢ່າງຍິ່ງ. ຂ້າພະເຈົ້າເຊື່ອວ່າ ການສະໜັບສະໜູນນີ້ ຜ່ານມາໄດ້ຊ່ວຍຫຼາຍຊີວິດ ແລະ ຈະຊ່ວຍອີກຫຼາຍໆຊີວິດໃນຕໍ່ໜ້າ.“
ໂຄງການ ທີ່ມີມູນຄ່າ 1.5 ລ້ານ ໂດລາສະຫະລັດນີ້ ໄດ້ເລີ່ມຕົ້ນຂຶ້ນໃນປີ 2017, ເຊີ່ງໃຫ້ການສະໜັບສະໜຸນ ໃນການຈັດຝຶກອົບຮົມ, ໃຫ້ຄວາມຊ່ວຍເຫຼືອທາງດ້ານວິຊາການ ແລະ ອຸປະກອນທາງດ້ານຫ້ອງວິເຄາະ ລວມທັງ ການສ້າງຄູ່ມື ແລະ ລະບົບການເຝົ້າລະວັງ, ໂດຍການເຮັດວຽກຮ່ວມກັບກະຊວງສາທາລະນະສຸກ ເປັນຕົ້ນແມ່ນ ກົມຄວບຄຸມພະຍາດຕິດຕໍ່ (DCDC), ກົມອາຫານ ແລະ ຢາ (FDD), ສູນວິເຄາະ ແລະ ລະບາດວິທະຍາ (NCLE) ແລະ ບັນດາໂຮງໝໍ ໃນແຂວງທີ່ຖືກຄັດເລືອກ.
ທ່ານ Jung Yung Soo ເອກອັດຄະລັດຖະທູດແຫ່ງ ສ. ເກົາຫລີ ປະຈໍາ ສປປ ລາວ ໄດ້ໃຫ້ຄໍາເຫັນວ່າ: “ພວກເຮົາມີຄວາມດີໃຈທີ່ໄດ້ເຫັນການປ່ຽນແປງອັນໃຫຍ່ຫຼວງຕໍ່ວຽກງານການແກ້ໄຂໄພຂົ່ມຂູ່ດັ່ງກ່າວ ເຊິ່ງຈະເກີດຂຶ້ນບໍ່ໄດ້ຫາກບໍ່ໄດ້ຄວາມຮ່ວມມື ແລະ ຄວາມມຸ່ງໝັ້ນຂອງບັນດາພະນັກງານສາທາລະນະສຸກທຸກຂັ້ນ.”
“ການປ່ຽນແປງອັນເປັນໝາກຜົນມາຈາກການປະສານງານຮ່ວມກັບຕ່າງປະເທດ ແລະ ອົງກອນຕ່າງໆ ຖືເປັນທີ່ໜ້າຍົກຍ້ອງຊົມເຊີຍ ເຊິ່ງສະແດງໃຫ້ເຫັນວ່າ ການຮ່ວມມືກັນ ເປັນປັດໄຈຫຼັກທີ່ຈະນຳມາເຊິ່ງຄວາມສຳເລັດ ໃນການຕໍ່ສູ້ກັບບັນຫາການຕ້ານຕໍ່ເຊື້ອຈຸລະຊີບທີ່ຕ້ານຕໍ່ຢາ ເພື່ອປົກປ້ອງຊຸມຊົນ, ຂະແໜງສາທາລະນະສຸກ ແລະ ຍິ່ງໄປກວ່ານັ້ນ ກໍຄື ປົກປ້ອງເສດຖະກິດຂອງພວກເຮົາ.”
ດຣ. ຊາໂຕໂກະ ໂອຊື, ຮັກສາການແທນຜູ້ຕາງໜ້າອົງການ WHO ປະຈໍາ ສປປ ລາວ ໄດ້ສະແດງຄວາມຂອບໃຈ ອົງກອນຮ່ວມມືສາກົນ ສ.ເກົາຫລີ ບາງຕອນທ່ານກ່າວວ່າ: ພວກເຮົາຮູ້ສຶກຂອບໃຈຢ່າງສຸດຊຶ້ງ ຕໍ່ການຊ່ວຍເຫຼືອ ແລະ ການຮ່ວມມືຂອງ ສ. ເກົາຫຼີ. ນີ້ຖືເປັນຜົນສຳເລັດອັນສຳຄັນ, ແຕ່ເຖິງຢ່າງໃດກໍຕາມ, ພວກເຮົາຍັງຕ້ອງສືບຕໍ່ຜົນສຳເລັດທີ່ໄດ້ມານີ້ ໃນປະຈຸບັນ ແລະ ອະນາຄົດ.” ການທີ່ຈະບັນລຸເປົ້າໝາຍດັ່ງກ່າວ ຈະຕ້ອງມີການເສີມຂະຫຍາຍ ວຽກງານການເຝົ້າລະວັງ, ການຕິດຕາມທີ່ດີຂຶ້ນ, ການຮ່ວມມືຫຼາຍພາກສ່ວນ ແລະ ການມີສ່ວນຮ່ວມຂອງຂະແໜງອື່ນທີ່ຢູ່ນອກເໜືອ ຂະແໜງສາທາລະນະສຸກ ໃນການຫຼຸດຜ່ອນຄວາມສ່ຽງ ເປັນຕົ້ນແມ່ນ ຂະແໜງກະສິກຳ ແລະ ການປູກຝັງ. ພວກເຮົາຫວັງວ່າ ຈະໄດ້ຮ່ວມມືກັນເດີນໜ້າ ແລະ ສືບຕໍ່ເສີມຂະຫຍາຍວຽກງານການເຄື່ອນໄຫວ ທີ່ລັດຖະບານດຳເນີນມາຈົນເຖິງທຸກມື້ນີ້.”
ການຈັດການປັດໄຈທີ່ເຮັດໃຫ້ເກີດເຊື້ອຈຸລະຊີບທີ່ຕ້ານຕໍ່ຢາ (ເປັນຕົ້ນ ການຊົມໃຊ້ຢາຕ້ານເຊື້ອຢ່າງບໍ່ເໝາະສົມ) ແລະ ການເຝົ້າລະວັງເຊື້ອຈຸລະຊີບທີ່ຕ້ານຕໍ່ຢາ ແມ່ນມີຄວາມຈຳເປັນຢ່າງຍິ່ງໃນການເຂົ້າໃຈການຕ້ານຕໍ່ຢາ, ທ່າອ່ຽງ ແລະ ວິທີແກ້ໄຂ.
