ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 3 ກໍລະກົດ 2024 ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ຮອງປະ ທານ, ຜູ້ປະຈໍາການຄະນະກໍາມະການຊີ້ນໍາລະດັບຊາດ ເພື່ອກະກຽມ ແລະ ດໍາເນີນການເປັນປະທານອາຊຽນ ຂອງ ສປປ ລາວ ໃນປີ 2024 ໄດ້ເປັນປະທານກອງປະຊຸມລາຍງານຄວາມຄືບໜ້າການກະກຽມເປັນເຈົ້າພາບ ແລະ ປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມ ອື່ນໆທີ່ກ່ຽວຂ້ອງ, ຊຶ່ງຈະຈັດຂຶ້ນໃນລະຫວ່າງວັນທີ 21-27 ກໍລະກົດ 2024 ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ. ເຂົ້າຮ່ວມໃນກອງປະຊຸມຄັ້ງນີ້ ມີບັນດາທ່ານຮອງລັດຖະມົນຕີ, ຮອງເຈົ້າຄອງນະຄອນຫຼວງວຽງຈັນ, ຄະນະກົມ ແລະ ພະນັກງານທີ່ກ່ຽວຂ້ອງຈາກບັນດາກະຊວງຂະແໜງການຕ່າງໆ.
ກອງປະຊຸມຄັ້ງນີ້ ໄດ້ສືບຕໍ່ປຶກສາຫາລື ແລະ ກວດກາຄືນຄວາມຄືບໜ້າບັນດາໜ້າວຽກຂອງແຕ່ລະອະນຸກຳມະການ ເຊັ່ນ: ວຽກງານປ້ອງກັນຊາດ-ປ້ອງກັນຄວາມສະຫງົບ, ການຈັດສັນສະຖານທີ່ພັກສຳລັບລັດຖະມົນຕີ ແລະ ຄະນະຜູ້ແທນ ຫຼາຍກວ່າ 34 ປະເທດ ທີ່ຈະມາຮ່ວມປະຊຸມ, ຄວາມພ້ອມຂອງສະຖານທີ່ປະຊຸມ, ການກະ ກຽມດ້ານພາຫະນະຮັບໃຊ້ລັດຖະມົນຕີ, ເຈົ້າໜ້າທີ່ອາວຸໂສ ແລະ ບັນດາຄະນະຜູ້ ແທນ, ຄວາມເປັນລະບຽບພາຍໃນຕົວເມືອງນະຄອນຫຼວງວຽງຈັນ ເປັນຕົ້ນແມ່ນການປັບປຸງຖະຫນົນຫົນທາງ ແລະ ຄວາມເປັນລະບຽບດ້ານຈາລະຈອນ, ຄວາມພ້ອມດ້ານສະຫນາມບິນ, ຄວາມພ້ອມດ້ານລະບົບການສື່ສານ ແລະ ອິນເຕີເນັດ, ບຸກຄະລາກອນຮັບໃຊ້ກອງປະຊຸມ, ຄວາມພ້ອມດ້ານສະຖານທີ່ທ່ອງທ່ຽວ ແລະ ວຽກອື່ນໆທີ່ກ່ຽວຂ້ອງ.
ຜ່ານການປຶກສາຫາລື ເຫັນວ່າ ການກະກຽມບັນດາໜ້າວຽກຂອງແຕ່ລະອະນຸກໍາມະການ ມີຄວາມຄືບຫນ້າດີ. ເຖິງແນວໃດກໍ່ຕາມ, ໃນຕອນທ້າຍຂອງກອງປະ ຊຸມ, ທ່ານຮອງນາຍົກລັດຖະມົນຕີ ສະເຫລີມໄຊ ກົມມະສິດ ໄດ້ເນັ້ນຢໍ້າໃຫ້ບັນດາອະນຸກໍາມະການ ສືບຕໍ່ດໍາເນີນການໜ້າວຽກຂອງຕົນດ້ວຍຄວາມເອົາໃຈໃສ່ ແລະ ມີຄວາມຮັບຜິດຊອບສູງ ເພື່ອຮັບປະກັນໃຫ້ການເປັນເຈົ້າພາບ ແລະ ປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ກອງປະຊຸມ ອື່ນໆທີ່ກ່ຽວ ຂ້ອງ ເຊິ່ງຈະຈັດຂຶ້ນໃນວັນທີ 21-27 ກໍລະກົດ 2024 ທີ່ຫໍປະຊຸມແຫ່ງຊາດ, ນະ ຄອນຫຼວງວຽງຈັນ ໃຫ້ໄດ້ຮັບຜົນສໍາເລັດຢ່າງຈົບງາມ.