ກອງເລຂານຸການ ຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປ ລາວ-ໄທ ໄດ້ຈັດກອງປະຊຸມປຶກສາຫາລື ຮ່າງບົດບັນທຶກກອງປະຊຸມ ຄະນະອານຸກຳມະການຮັກສາຄວາມ ສະຫງົບຮຽບຮ້ອຍຕາມຊາຍແດນທົ່ວໄປ ລາວ-ໄທ ຄັ້ງທີ 2 ປີ 2024. ກອງປະຊຸມໄດ້ຈັດຂຶ້ນທີ່ບາງກອກ ຣາຊາອະນາຈັກໄທ ໃນວັນທີ 23 ກໍລະກົດ 2024. ເຊີ່ງຝ່າຍລາວມີ ພັນໂທ ສຸພາເວດ ສຸກເລືອງຄໍາ ຫົວໜ້າພະແນກແຜນການ-ສັງລວມ ກົມທະຫານຊາຍແດນ ກົມໃຫຍ່ເສນາທິການກອງທັບ ປະຊາຊົນລາວ ຫົວໜ້າກອງເລຂານຸການ ຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປ ລາວ-ໄທ. ຝ່າຍໄທ ມີ ພັນເອກ ຫວຸດທິພັດ ປຣັດສະຖາພອນ ຫົວໜ້າກອງເລຂານຸການ ຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປ ໄທ-ລາວ ພ້ອມດ້ວຍພະນັກງານ-ວິຊາການທີ່ກ່ຽວຂ້ອງທັງສອງຝ່າຍເຂົ້າ ຮ່ວມ.
ກອງປະຊຸມໄດ້ປຶກສາຫາລືບາງບັນຫາສໍາຄັນ ຕໍ່ກັບຂົງເຂດວຽກງານການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປ ລາວ-ໄທ, ໄທ-ລາວ ແລະ ທົບທວນຜົນຂອງການ ຮ່ວມມືໃນການສະກັດກັ້ນ ແລະ ແກ້ໄຂບັນຫາຢາເສບຕິດ, ການແກ້ໄຂບັນຫາຄວາມໝັ້ນຄົງ, ຄວາມສະຫງົບຮຽບຮ້ອຍຕາມບໍລິເວນຊາຍແດນ ແລະ ອາດຊະຍາກຳຂ້າມຊາດ. ພ້ອມທັງປຶກສາຫາລືແຜນການສືບຕໍ່ສ້າງສາຍພົວພັນລະຫວ່າງສອງປະເທດ ເວົ້າສະເພາະກໍ່ຄືສອງກະຊວງປ້ອງກັນປະເທດ ສປປ ລາວ ແລະ ກະຊວງປ້ອງກັນປະເທດ ແຫ່ງ ຣາຊາອະນະຈັກໄທ ຕາມບົດບັນທຶກຂອງກອງປະຊຸມຄະນະອານຸກໍາມະການ ຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປ ລາວ-ໄທ, ໄທ-ລາວ ຄັ້ງທີ່ຜ່ານມາ. ເພື່ອພ້ອມກັນຈັດຕັ້ງປະຕິບັດໃຫ້ປະກົດຜົນເປັນຈິງ. ໂດຍສະເພາະແມ່ນແກ້ໄຂບັນຫາສິ່ງທີ່ຍັງຄົງຄ້າງ ໃຫ້ປະສົບຜົນສຳເລັດເທື່ອລະກ້າວ.
ພາບ:ຂ່າວ. ພັຕ ຄຳສິງ ລິດວິໄລ
