ຕອນເຊົ້າຂອງວັນທີ 30 ສິງຫາ 2024, ກະຊວງຍຸຕິທໍາ ໄດ້ຈັດກອງປະຊຸມ ປຶກສາຫາລືແກ້ໄຂຂໍ້ຄົງຄ້າງວຽກງານປະຕິບັດຄໍາຕັດສີນຂອງສານ ຢູ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ໄພວີ ສີບົວລິພາ, ກໍາມະການສູນກາງພັກ, ເລຂາຄະນະບໍລິຫານງານພັກກະຊວງ, ລັດຖະມົນຕີ ກະຊວງຍຸຕິທໍາ.
ໃນກອງປະຊຸມ ທ່ານ ສຸລິຍາ ສີດາວົງ ຫົວໜ້າກົມຄຸ້ມຄອງການປະຕິບັດຄໍາຕັດສີນຂອງສານ ແລະ ທ່ານ ລັດສະໝີ ເພັດລາວັນ ຫົວໜ້າກອງປະຕິບັດຄໍາຕັດສີນຂອງສານ ປະຈໍານະຄອນຫຼວງວຽງຈັນ ກໍຜັດປ່ຽນກັນຂຶ້ນລາຍງານສະພາບການເຄື່ອນໄຫວວຽກດັ່ງກ່າວໄລຍະຜ່ານມາ ໂດຍເນັ້ນໜັກໃສ່ບັນຫາທີ່ເປັນສາເຫດ ແລະ ຂໍ້ຄົງຄ້າງຕ່າໆໆໃນການປະຕິບັດຄໍາຕັດສີນຂອງສານ. ຈາກນັ້ນ, ກອງປະຊຸມກໍໄດ້ພ້ອມກັນຄົ້ນຄ້ວາ, ປຶກສາຫາລື, ປະກອບຄໍາຄິດເຫັນ ເພື່ອກໍານົດທິດທາງແກ້ໄຂໃນຕໍ່ໜ້າ.
ໃນຕອນທ້າຍ ທ່ານ ໄພວີ ສີບົວລິພາ ກໍາມະການສູນກາງພັກ, ເລຂາຄະນະບໍລິ ຫານງານພັກກະຊວງ, ລັດຖະມົນຕີ ກະຊວງຍຸຕິທໍາ ກໍໄດ້ໃຫ້ກຽດໂອ້ລົມຕໍ່ກອງປະຊຸມ ໂດຍເນັ້ນໜັກໃຫ້ຄະນະພັກ, ຄະນະນໍາ ຕະຫຼອດຮອດພະນັກງານປະຕິບັດຄໍາຕັດສີນຂອງສານ ຂອງກົມ, ກອງ ແລະ ຫ້ອງປະຕິບັດຄໍາຕັດສີນຂອງສານ ຕ້ອງມີຄວາມຮັບ ຮູ້, ເຂົ້າໃຈ ເຖິງຄວາມໝາຍຄວາມສໍາຄັນຂອງໜ້າທີ່ການເມືອງທີ່ພັກ-ລັດ ໄດ້ມອບ ໝາຍໃຫ້, ກໍາໃຫ້ໄດ້ພາລະບົດບາດ, ໜ້າທີ່ຄວາມຮັບຜິດຊອບຂອງຕົນ ຢ່າງໜັກແໜ້ນ, ເປັນເຈົ້າການຜັນຂະຫຍາຍທິດຊີ້ນໍາຂອງຂັ້ນເທິງ, ກົດໝາຍ ແລະ ບັນດານິຕິກໍາຕ່າງໆທີ່ກະຊວງຍຸຕິທໍາ ໄດ້ກໍານົດອອກໃນແຕ່ລະໄລຍະໃຫ້ມີປະສິດຕິຜົນ, ປັບ ປຸງແບບແຜນວິທີເຮັດໃຫ້ສອດຄ່ອງຕາມລະບົບກົງຈັກການຈັດຕັ້ງ ກໍຄືພາລະບົດ ບາດໃໝ່, ເພີ່ມຄວາມເອົາໃຈໃສ່ຕໍ່ວຽກງານກວດກາພາຍໃນ ໃຫ້ມີຄວາມເຂັ້ມແຂງ, ເປັນເຈົ້າການແກ້ໄຂບັນຫາຂໍ້ຄົງຄ້າງຕ່າງໆໃຫ້ໝົດໄປ, ເພີ່ມຂີດຄວາມສາມາດຂອງພະນັກງານປະຕິບັດຄໍາຕັດສີນຂອງສານໃນການນໍາເອົາຄໍາຕັດສີນ ອອກມາຈັດຕັ້ງປະຕິບັດໃຫ້ສໍາເລັດ ຢ່າງເຂັ້ມງວດ, ເດັດຂາດ, ວ່ອງໄວ, ໂປ່ງໃສ ແລະ ຍຸຕິທໍາ.
ຂ່າວ: ກົມຄຸ້ມຄອງການປະຕິບັດຄຳຕັດສິນຂອງສານ
