ໃນວັນທີ 19 ສິງຫາ 2024, ທີ່ ສະຖາບັນວິທະຍາສາດເສດ ຖະກິດ ແລະ ສັງຄົມແຫ່ງຊາດ ຄະນະສະເພາະກິດ 83/ນຍ ໄດ້ຈັດກອງປະຊຸມ ປຶກສາຫາລື ແລກປ່ຽນຄວາມຄິດເຫັນ ຮ່ວມກັບອະດີດການນໍາຂັ້ນສູງ ແລະ ຜູ້ຊົງຄຸນວຸດທິກ່ຽວກັບ ການແກ້ໄຂບັນຫາ ລາຄາສິນຄ້າ ແລະ ອັດຕາເງິນເຟີ້ ທີ່ເພີ່ມສູງຂຶ້ນ ໂດຍການເປັນປະທານຂອງ ທ່ານ ປອ. ກອງແກ້ວ ໄຊສົງຄາມ, ກຳມະການສູນກາງພັກ, ເລຂາຄະນະບໍລິຫານງານພັກ-ປະທານ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ຫົວໜ້າຄະນະສະເພາະກິດດັ່ງກ່າວ ມີບັນດາທ່ານອະດີດການນໍາພັັກ-ລັດຂັ້ນສູງ ແລະຜູ້ຊົງຄຸນວຸດທິຈຳນວນໜຶ່ງ ພ້ອມດ້ວຍຄະນະຊີ້ນຳ ແລະກກອງເລຂາຄະນະສະເພາະກິດ 83/ນຍ ເຂົ້າຮ່ວມຈໍານວນຫຼາຍ ກວ່າ 40 ທ່ານ.
ນັບແຕ່ຄະນະສະເພາະກິດ 83/ນຍ ໄດ້ຮັບການແຕ່ງຕັ້ງໃນເດືອນກໍລະກົດ ທີ່ຜ່ານມາ ຄະນະດັ່ງກ່າວໄດ້ຈັດດກອງປະຊຸມປຶກສາຫາລືກັບພາກທຸລະກິດ ກ່ຽວກັບບັນຫາລາຄາສິນຄ້າ ແລະ ອັດຕາແລກປ່ຽນຂຶ້ນໃນວັນທີ 2 ສິງຫາ ກໍລະກົດ 2024 ໂດຍໄດ້ແລກປ່ຽນຄຳເຫັນ ໃນ ສອງຫົວຂໍ້ ໃໝ່ຄື: (1) ວິທີ ແລະ ມາດຕະການໃນການຫຼຸດຜ່ອນຕົ້ນທຶນການຜະລິດສິນຄ້າ ແລະ ບໍລິ ການ ແລະ (2) ວິທີ ແລະ ມາດຕະການໃນການປະຢັດເງິນຕາຕ່າງ ປະເທດ ເພື່ອຫຼຸດຜ່ອນແຮງກົດດັນ ຕໍ່ຄ່າເງິນກີບ. ຜ່ານການຮັບຟັງຈາກ ພາກທຸລະກິດ ກໍເຫັນວ່າໄດ້ຮັບຂໍ້ມູນ ແລະຄຳເຫັນທີ່ເປັນປະໂຫຍດສູງ ເພື່ອໃຫ້ຄະນະສະເພາະກິດນຳໄປຄົ້ນຄວ້າວິໃຈລົງເລິກເພື່ອຫາມາດຕະການທີ່ສອດຄ່ອງກັບຕົວຈິ່ງເພື່ອສະເໜີໃຫ້ລັດຖະບານຊີ້ນໍາ ແລະ ແກ້ໄຂໃຫ້ທັນເວລາ.
ສະນັ້ນ, ກອງປະຊຸມ ປຶກສາຫາລືແລກປ່ຽນຄຳຄິດເຫັນ ຮ່ວມ ກັບອະດີດການນໍາຂັ້ນສູງ ແລະ ຜູ້ຊົງຄຸນວຸດທິໃນຄັ້ງນີ້ກໍ່ຖືວ່າເປັນກອງປະຊຸມ ທີ່ມີຄວາມສຳຄັນຢ່າງຍິ່ງ ເພື່ອຈະໄດ້ຮັບຟັງຄຳຄິດຄຳເຫັນ ແລະ ຄຳແນະນໍາຕ່າງໆຈາກບັນດາທ່ານທີ່ມີບົດຮຽນ ແລະ ປະສົບປະການສູງ ເພື່ອເຮັດໃຫ້ການຄົ້ນຄວ້າລົງເລິກຂອງຄະນະສະເພາະກິດດຳເນີນໄປຢ່າງຖືກທິດ, ມີລັກສະນະຄົບຊຸດ ແລະ ມີປະສິດທິພາບສູງ ເພື່ອບັນລຸເປົ້າໝາຍ ເຮັດໃຫ້ການຄົ້ນຄວ້າລົງເລິກລົງເລິກສາມາດຊອກເຫັນໄດ້ຈຸດສຸມທີ່ຈະຕ້ອງແກ້ໄຂ ແລະ ນຳສະເໜີບັນດາວິທີການ ແລະ ມາດຕະການທີ່ເໝາະສົມໃນຂັ້ນຕໍ່ໄປ.
