ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມປຶກສາຫາລື ກົນໄກການຄຸ້ມຄອງສິນຄ້າກະສິກຳ-ເຄື່ອງປ່າຂອງດົງໃນ 5 ແຂວງ ຄື ບັນດາແຂວງພາກໃຕ້ສາລະວັນ,ເຊກອງ,ອັດຕະປື ແລະຈຳປາສັກ ບວກ ແຂວງພາກກາງ ຄື ແຂວງສະຫວັນນະເຂດ ໄດ້ຈັດຂຶ້ນທີ່ຫ້ອງວ່າການແຂວງຈຳປາສັກ ໃນວັນທີ 07 ທັນວາ 2023 ພາຍໃຕ້ການເປັນປະທານຮ່ວມຂອງ ທ່ານ ສຸກກະເສີມ ສີຫານຸວົງ ຫົວໜ້າພະແນກການເງິນຈຳປາສັກ,ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ກະຊວງການເງິນ,ມີ ທ່ານ ຫົວໜ້າຫ້ອງວ່າການແຂວງ, ຫົວໜ້າພະແນກອຸດສາຫະກຳ ແລະ ການຄ້າ, ຫົວໜ້າພະ ແນກກະສິກຳແລະປ່າໄມ້ແຂວງ, ບັນດາທ່ານຮອງຫົວໜ້າກົມຈາກກະຊວງທີ່ກ່ຽວຂ້ອງ, ຫົວໜ້າ ພະແນກ, ຮອງຫົວໜ້າພະແນກການເງິນ ຈາກ 5 ແຂວງ ແລະ ວິຊາການສ່ວຍສາອາກອນ ເຂົ້າຮ່ວມ.
ທ່ານ ບຸນປະເສີດ ສີກຸນລະບຸດ ຫົວໜ້າກົມສ່ວຍສາອາກອນ ໄດ້ກ້າວ່າ: ເພື່ອຈັດຕັ້ງປະຕິບັດ ກົດໝາຍ ວ່າດ້ວຍການຄຸ້ມຄອງສ່ວຍສາອາກອນ ເລກທີ 66/ສພຊ, ວາລະແຫ່ງຊາດ ແລະ ຄຳ ສັ່ງເລກທີ 18/ນຍ ໃຫ້ປະສົບຜົນສຳເລັດຕາມລະດັບຄາດໝາຍນັ້ນ, ເຫັນໄດ້ວ່າ ວຽກງານຄຸ້ມຄອງເກັບລາຍຮັບຈາກ ສິນຄ້າກະສິກຳ-ເຄື່ອງປ່າຂອງດົງ ກໍເປັນວຽກງານສໍາຄັນໜຶ່ງ ເຊິ່ງຈະຕ້ອງໄດ້ເອົາໃຈໃສ່ຄຸ້ມຄອງເກັບໃຫ້ໄດ້ຢ່າງຄົບ ຖ້ວນ ແລະ ຖືກຕ້ອງ ຕາມລະບຽບກົດໝາຍ ເພາະສິນຄ້າກະສິກຳ-ເຄື່ອງປ່າຂອງດົງ ກໍແມ່ນທ່າແຮງໜຶ່ງທີ່ສຳຄັນທີ່ ສຸດປະກອບສ່ວນເຂົ້າໃນການພັດທະນາເສດຖະກິດສັງຄົມໃນ 4 ແຂວງພາກໃຕ້ ແລະ ປະກອບສ່ວນສຳຄັນໃຫ້ແກ່ ແຂວງສະຫວັນນະເຂດ ເຊິ່ງໃນ 10 ເດືອນ ປີ 2023 ສະເພາະແຂວງຈຳປາສັກມີມູນຄ່າການສົ່ງອອກສິນຄ້າກະສິກຳ 263 ລ້ານໂດລາສະຫະລັດ (ຂໍ້ມູນຂອງຂະແໜງການຄ້າ), ແຕ່ມູນຄ່າຜ່ານຂະແໜງສ່ວຍສາອາກອນ ມີພຽງ 2,738 ຕື້ກີບ ຫຼືເທົ່າກັບ 119 ລ້ານໂດລາສະຫະລັດ. ເມື່ອສັງເກດຕົວເລກລະຫວ່າງສອງຂະແໜງການ ພວກເຮົາຈະເຫັນໄດ້ ວ່າ ການເກັບພັນທະອາກອນຈາກສິນຄ້າກະສິກຳ-ເຄື່ອງປ່າຂອງດົງ ຍັງມີການຮົ່ວໄຫຼຫຼາຍ ແລະ ແຕ່ລະປີແມ່ນພວກເຮົາສູນເສຍລາຍຮັບງົບປະມານຢ່າງຫຼວງຫຼາຍຈາກການຮົ່ວໄຫຼດັ່ງກ່າວນີ້. ແລະ ທີມງານພວກຂ້າພະເຈົ້າເຊື່ອໝັ້ນວ່າ
ເມື່ອເກັບກຳຂໍ້ມູນລະອຽດແລ້ວ ໃນ 4 ແຂວງພາກໃຕ້ ແລະ ແຂວງສະຫວັນນະເຂດ ໃນແຕ່ລະປີເຖິງແມ່ນວ່າ ພວກ ທ່ານຈະໄດ້ເອົາໃຈໃສ່ຈົນສຸດຄວາມສາມາດຂອງຕົນໃນການຄຸ້ມຄອງເກັບລາຍຮັບຈາກສິນຄ້າກະສິກຳ ບົນພື້ນຖານ ລະບຽບກົດໝາຍແລ້ວກໍຕາມ ແຕ່ກໍຍັງເກີດມີການຮົ່ວໄຫຼຢ່າງຫຼວງຫຼາຍໃນການຄຸ້ມຄອງເກັບລາຍຮັບອາກອນຈາກ ສິນຄ້າດັ່ງກ່າວ, ເຊິ່ງບັນຫາການຮົ່ວໄຫຼນີ້ ແມ່ນອາດຈະເກີດມາຈາກຫຼາຍສາເຫດ ແລະ ຫຼາຍປັດໃຈແຕກຕ່າງກັນ; ແຕ່ປັດໃຈສໍາຄັນຕົ້ນຕໍແມ່ນເກີດຈາກການຫລົບຫຼີກການມອບພັນທະຂອງບັນດາຫົວໜ່ວຍທຸລະກິດທີ່ເຄື່ອນໄຫວ ຊື້-ຂາຍສິນຄ້າດັ່ງກ່າວ ແລະ ການຂາດກົນໄກປະສານງານລະຫວ່າງຂະແໜງການທີ່ກ່ຽວຂ້ອງ ກໍຄືຂະແໜງສ່ວຍສາ ອາກອນຂອງບັນດາແຂວງດ້ວຍກັນ ລວມໄປເຖິງການກຳນົດລາຄາສິນຄ້າກະສິກຳປະເພດດຽວກັນ ແຕ່ລາຄາກໍານົດ ຂອງແຕ່ລະແຂວງແຕກຕ່າງກັນ ແລະ ອື່ນໆ ເຊິ່ງບັນຫາດັ່ງກ່າວນີ້ ມັນໄດ້ສ້າງຊ່ອງຫວ່າງໃຫ້ຫົວໜ່ວຍທຸລະກິດຫຼົບ ຫຼີກການແຈ້ງມອບພັນທະສ່ວຍສາອາກອນ. ສະນັ້ນ, ເພື່ອເປັນການແກ້ໄຂບັນດາປະກົດການຫຍໍ້ທໍ້ຕ່າງໆ ທີ່ເກີດຂຶ້ນ ໃນໄລຍະຜ່ານມາ ບໍ່ສະເພາະແຕ່ຢູ່ 4 ແຂວງພາກໃຕ້ ແລະ ແຂວງສະຫວັນນະເຂດ ແຕ່ມັນເປັນບັນຫາລວມໃນຂອບ ເຂດທົ່ວປະເທດ ຊຶ່ງພວກເຮົາຈະຕ້ອງໄດ້ຮ່ວມກັນແກ້ບັນຫາດັ່ງກ່າວນີ້ໃຫ້ໝົດໄປ ເລີ່ມຈາກ 4 ແຂວງພາກໃຕ້ ຖ້າ ຫາກມີປະສິດທິຜົນແມ່ນຈະໄດ້ຄົ້ນຄວ້ານຳສະເໜີຂັ້ນເທິງ ອອກເປັນຕິນິກຳລວມນຳໃຊ້ໃນຂອບເຂດທົ່ວປະເທດ.
ກອງປະຊຸມຄັ້ງນີ້,ທ່ານ ສຸກກະເສີມ ສີຫານຸວົງ ຫົວໜ້າພະແນກການເງິນຈຳປາສັກຍັງໄດ້ລາຍງານດ້ວຍຫຍໍ້ ກ່ຽວກັບວຽກງານ ການຄຸ້ມຄອງ ແລະ ເກັບລາຍຮັບ ຈາກ ການສົ່ງອອກສິ້ນຄ້າ ກະສິກຳ ໄປຕ່າງປະ ເທດໄລຍະຜ່ານມາຂອງແຂວງຈຳປາສັກ,ມີການລາຍງານຈາກແຂວງຕ່າງໆ ແລະ ປຶກສາຫາລືແລກປ່ຽນຈາກບັນດາທ່ານທີ່ເຂົ້າຮ່ວມຢ່າງກົງໄປກົງມາ ເພື່ອສ້າງກົນໄກການຄຸ້ມຄອງສິນຄ້າກະສິກຳ-ເຄື່ອງປ່າຂອງດົງໃນ 5 ແຂວງພາກໃຕ້ ໃຫ້ເຂົ້າສູ່ການຄຸ້ມຄອງທີ່ເປັນລະບົບ,ຮັດກຸມ,ມີຄວາມສະດວກ ແລະເປັນເອກະພາບກັນໃນການຈັດຕັ້ງປະຕິບັດ.
ເກດສະໜາ ແກ້ວສຸວັນນະແສງ
ສະຖານີວິທະຍຸແຂວງຈຳປາສັກ Champasak Radio station 100,7 Mhz