ກະຊວງອຸດສາຫະກຳ ແລະ ການຄ້າ (ອຄ) ຈັດກອງປະຊຸມໜ່ວຍງານຂະແໜງການຄ້າ ແລະ ພາກເອກະຊົນ ປຶກສາຫາລື ລະຫວ່າງພາກລັດ, ພາກທຸລະກິດ, ຫົວໜ່ວຍທຸລະກິດຂະໜາດນ້ອຍ ແລະ ກາງ ແລະ ບັນດາຄູ່ຮ່ວມພັດທະນາ ເພື່ອແລກປ່ຽນຄຳເຫັນ ຕໍ່ບັນຫາທີ່ເປັນອຸປະສັກຕໍ່ການຄ້າ ແລະ ການລົງທຶນ; ລົບລ້າງບັນດາສິ່ງທີ່ກີດຂວາງຕໍ່ກັບການສ້າງສະພາບແວດລ້ອມທີ່ເອື້ອອຳນວຍ
ກອງປະຊຸມໜ່ວຍງານຂະແໜງການຄ້າ ແລະ ພາກເອກະຊົນ ຄັ້ງທີ 22 ຈັດຂຶ້ນໃນວັນທີ 14 ມິຖຸນາ 2024 ນີ້ ພາຍໃຕ້ການເປັນປະທານຂອງ ທ່ານ ປ.ອ ມະໂນທອງ ວົງໄຊ ຮອງລັດຖະມົນ ຕີ ກະຊວງ ອຄ, ປະທານຮ່ວມໂດຍ ທ່ານ ນາງ Ina Marciulionyte ເອກອັກຄະລັດຖະທູດສໍານັກງານຜູ້ຕາງໜ້າສະຫະພາບເອີຣົບ ປະຈໍາລາວ ແລະ ທ່ານ Heather Variava ເອກອັກຄະລັດຖະທູດ ສະຫະລັດອາເມລິກາ ປະຈຳລາວ ພ້ອມດ້ວຍຜູ້ເຂົ້າຮ່ວມຈາກຂະແໜງການກ່ຽວຂ້ອງພາກລັດ, ບັນດາສະຖານທູດ, ຄູ່ຮ່ວມພັດທະນາ, ສະພາການຄ້າ ແລະ ອຸດສາຫະກຳ ແຫ່ງຊາດລາວ, ບັນດາສະມາຄົມທຸລະກິດພາຍໃນ ແລະ ຕ່າງປະເທດໃນລາວ.
ທ່ານ ປ.ອ ມະໂນທອງ ວົງໄຊ ໄດ້ກ່າວເນັ້ນວ່າ: ບັນດານະໂຍ ບາຍ ແລະ ທຸກໆຄວາມຕັ້ງໃຈຂອງລັດຖະບານ ໄດ້ມີບົດບາດສຳ ຄັນ ໃນການສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການລົງຶທຶນ “ລັດຖະບານພວກເຮົາ ໄດ້ຍຶດໝັ້ນໃນການຈັດຕັ້ງປະຕິບັດຫຼາຍມາດຕະການທີ່ສຳຄັນ ເພື່ອສະໜັບສະໜູນການປັບປຸງສະພາບແວດລ້ອມທີ່ເອື້ອອຳນວຍໃຫ້ແກ່ການລົງທຶນ ໂດຍສະ ເພາະ ການສ້າງຄວາມສະດວກໃຫ້ແກ່ການເລີ່ມຕົ້ນທຸລະກິດ; ມີການປັບປຸງກົດໝາຍວ່າດ້ວຍວິສາຫະກິດ, ກົດໝາຍວ່າດ້ວຍການສົ່ງເສີມການລົງທຶນ ລວມທັງບັນດາມາດຕະການ ແລະ ຄຳແນະນຳ ທີ່ຕິດພັນກັບການລົງທຶນ ”
“ຂ້າພະເຈົ້າມີຄວາມເຊື່ອໝັ້ນວ່າ ບັນດາຄູ່ຮ່ວມພັດທະນາ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລຶອ ຈະສືບຕໍ່ໃຫ້ການສະໜັບສະໜູນແກ່ພວກເຮົາຕໍ່ເນື່ອງ ໃນການປັບປຸງບັນດາຂົງເຂດສຳຄັນຂອງບັນຍາກາດການລົງທຶນ ທີ່ພວກເຮົາໄດ້ຮ່ວມກັນປຶກສາຫາລືໃນມື້ນີ້ ” ທ່ານ ປ.ອ ມະໂນທອງ ວົງໄຊ ກ່າວ.
ທ່ານທູດ Marciulionyte, ກໍໄດ້ກ່າວຢ້ຳເຖິງບັນຫາສຳຄັນ ທີ່ເປັນອຸປະສັກຕໍ່ການພັດທະນາພາກເອກະຊົນ ໂດຍທ່ານໄດ້ກ່າວວ່າ “ ໃນຫລາຍໆບັນຫາທີ່ພົ້ນເດັ່ນ ສຳລັບປີ 2024 ນີ້ ພວກເຮົາໄດ້ປຶກສາຫາລື ແລະ ເຫັນດີເປັນເອກະພາບພາຍໃນອົງກອນຜູ້ໃຫ້ທຶນ, ສະພາການຄ້າຕ່າງປະເທດ ກຳນົດບາງບັນຫາທີ່ເປັນບູລິມະສິດ ເພື່ອສະເໜີພິຈາລະນາແກ້ໄຂ ”.
ຂະນະທີ່ ທ່ານທູດ Variava, ກໍໄດ້ກ່າວສະແດງຄວາມຊົມເຊີຍຕໍ່ກັບການປຶກສາຫາລືທີ່ເປັນປະ ໂຫຍດ ແລະ ກົງໄປກົງມາ ກ່ຽວກັບບັນດາການປະຕິຮູບດ້ານນະໂຍບາຍຂອງລັດຖະບານ ແນໃສ່ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການດຳເນີນທຸລະກິດ, ຊຸກຍູ້ການຄ້າ ແລະ ການລົງທຶນ.
ທີ່ມາ: ເສດຖະກິດ-ການຄ້າ
