ໃນຕອນເຊົ້າຂອງວັນທີ 9 ສິງຫາ 2024 ທີ່ ຫ້ອງວ່າການສຳນັກງານນາຍົກລັດຖະມົນຕີ, ທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ເປັນປະທານກອງປະຊຸມຄະນະກຳມະການຊີ້ນຳລະດັບຊາດ ເພື່ອການກະກຽມແລະດຳເນີນການເປັນປະທານອາຊຽນຂອງ ສປປ ລາວ ໃນປີ 2024 ໂດຍມີບັນດາທ່ານຮອງນາຍົກລັດຖະມົນຕີ, ລັດຖະມົນຕີ, ເຈົ້າຄອງນະ ຄອນຫຼວງວຽງຈັນ, ຮອງລັດຖະມົນຕີ ແລະ ພະນັກງານກ່ຽວ ຂ້ອງຈາກບັນດາກະຊວງ ຂະແໜງການຕ່າງໆເຂົ້າຮ່ວມ.
ກອງປະຊຸມຄະນະກຳມະການຊີ້້ນຳລະດັບຊາດໃນຄັ້ງນີ້ ໄດ້ປຶກສາຫາລື ແລະ ກວດກາຄືນຄວາມຄືບໜ້າບັນດາໜ້າວຽກຮີບດ່ວນ ຂອງ 14 ອະນຸກໍາມະການ, ໂດຍສະເພາະການກະກຽມເປັນເຈົ້າພາບ ແລະ ປະທານກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ຊຶ່ງຈະຈັດຂຶ້ນໃນວັນທີ 8-11 ຕຸລາ 2024 ທີ່ນະຄອນຫຼວງວຽງ ຈັນ ເຊັ່ນ: ວຽກງານດ້ານເນື້ອໃນ, ດ້ານພະລາທິການ, ພາຫະນະ, ສະຖານທີ່ພັກເຊົາ, ສະຖານທີ່ປະຊຸມ, ວຽກງານປ້ອງກັນຊາດ -ປ້ອງກັນຄວາມສະຫງົບ, ຄວາມພ້ອມຂອງສະໜາມບິນເພື່ອຮັບຮອງບັນດາຍົນພິເສດ, ວຽກງານປະດັບປະດາຕົວເມືອງນະ ຄອນຫຼວງວຽງຈັນ, ວຽກງານເຜີຍແຜ່ໂຄສະນາ ແລະ ວຽກອື່ນໆ ທີ່ກ່ຽວຂ້ອງ.
ກອງປະຊຸມໄດ້ຮັບຟັງການລາຍງານ ແລະ ສະຫຼຸບຕີລາຄາຕໍ່ຜົນສຳເລັດໃນການເປັນເຈົ້າພາບ ແລະ ປະທານກອງປະຊຸມ ໃນໄລຍະ 7 ເດືອນ ຜ່ານມາ ພາຍຫລັງທີ່ ສປປ ລາວ ໄດ້ເລີ່ມປະຕິ ບັດການເປັນປະທານອາຊຽນ ນັບແຕ່ວັນທີ 1 ມັງກອນ 2024 ເປັນຕົ້ນມາ, ໂດຍສະເພາະກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 57 ແລະ ບັນດາກອງປະຊຸມທີ່ກ່ຽວຂ້ອງ, ເຊິ່ງໄດ້ຈັດຂຶ້ນໃນວັນທີ 21-27 ກໍລະກົດ 2024 ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ ທີ່ເປັນກອງປະຊຸມກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ ທີ່ຈະຈັດຂຶ້ນໃນເດືອນຕຸລາ 2024.
ຜ່ານການປຶກສາຫາລື ເຫັນວ່າ ການກະກຽມຄວາມພ້ອມຂອງບັນດາໜ້າວຽກຮີບດ່ວນຂອງ 14 ອະນຸກໍາມະການ ແມ່ນມີຄວາມຄືບຫນ້າຫລາຍສົມຄວນ. ໃນໂອກາດນີ້, ທ່ານນາຍົກລັດ ຖະມົນຕີ ໄດ້ໃຫ້ທິດຊີ້້ນໍາ ແລະ ມອບໝາຍໃຫ້ແຕ່ລະອະນຸກໍາມະ ການ ສືບຕໍ່ດໍາເນີນການໜ້າວຽກຂອງຕົນດ້ວຍຄວາມເອົາໃຈໃສ່ ແລະ ມີຄວາມຮັບຜິດຊອບສູງ ເພື່ອຮັບປະກັນຜົນສຳເລັດຂອງການເປັນປະທານອາຊຽນ ໃນປີ 2024 ຂອງ ສປປ ລາວ, ໂດຍ ສະເພາະການກະກຽມເປັນເຈົ້າພາບ ແລະ ປະທານກອງປະຊຸມ ສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມ ສຸດຍອດທີ່ກ່ຽວຂ້ອງ ທີ່ຈະຈັດຂື້ນໃນວັນທີ 8-11 ຕຸລາ 2024, ຊຶ່ງຈະມີບັນດາຜູ້ນໍາຂັ້ນປະມຸກລັດ ຫຼື ຫົວໜ້າລັດຖະບານ ຂອງບັນດາປະເທດອາຊຽນ ແລະ ຄູ່ຮ່ວມມືພາຍນອກອາຊຽນ ເຂົ້້າຮ່ວມ.
