ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ປູກຕົ້ນໄມ້ເອົາແຕ່ຂະບວນການ ຈະນຳເອົາແຕ່ຄວາມສູນເສຍມາໃຫ້ປະເທດຊາດ.

ໃນແຕ່ລະປີພໍໃກ້ຈະຮອດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ພວກເຮົາມັກໄດ້ຍິນການໃຫ້ສຳພາດ ຫຼື ອອກຂ່າວຂອງບັນດາຂະແໜງການທີ່ກ່ຽວຂ້ອງ ນັບແຕ່ສູນກາງລົງຮອດທ້ອງຖິ່ນຜ່ານສື່ຕ່າງໆ ກ່ຽວກັບການກະກຽມປູກຕົ້ນໄມ້ ໂດຍໄດ້ລະບຸຢ່າງຈະແຈ້ງກ່ຽວກັບເນື້ອທີ່ຄາດໝາຍ, ຈຳນວນເບ້ຍໄມ້ ແລະ ປະເພດໄມ້ທີ່ຈະປູກຢ່າງຄັກແນ່ ເພື່ອແນ່ໃສ່ປະກອບສ່ວນເຮັດໃຫ້ອັດຕາການປົກຫຸ້ມຂອງປ່າໄມ້ຢູ່ໃນລາວນັບມື້ເພີ່ມຂຶ້ນ. ແຕ່ກົງກັນຂ້າມພວກເຮົາບໍ່ເຄີຍໄດ້ຍິນເລີຍກ່ຽວກັບການອອກຂ່າວຢັ້ງຢືນຢ່າງລະອຽດກ່ຽວກັບອັດຕາການລອດເຫຼືອຂອງຕົ້ນໄມ້ທີ່ປູກໄປແລ້ວໃນແຕ່ລະປີວ່າຍັງເຫຼືອໜ້ອຍຫຼາຍປານໃດ ເພາະໃນຕົວຈິງເຫັນວ່າຕົ້ນໄມ້ທີ່ປູກໄປແລ້ວຢູ່ຫຼາຍທ້ອງຖິ່ນມີອັດຕາການລອດເຫຼືອບໍ່ຫຼາຍ ຍ້ອນຂາດການເອົາໃຈໃສ່ໃນການບົວລະບັດຮັກສາ ເຮັດໃຫ້ເກີດມີຄຳຖາມ ແລະ ສຽງວິພາກວິຈານຈາກສັງຄົມບໍ່ໜ້ອຍວ່າ ການປູກຕົ້ນໄມ້ໃນແຕ່ລະປີ ສ່ວນຫຼາຍເຮັດເອົາແຕ່ຮູບການ ຫຼື ພຽງແຕ່ສ້າງຂະບວນການເທົ່ານັ້ນ ເພາະຫຼັງຈາກປູກຕົ້ນໄມ້ໃນແຕ່ລະປີໄປແລ້ວ ບໍ່ມີມາດຕະການບົວລະບັດ ແລະ ປົກປັກຮັກສາທີ່ດີ, ຍ້ອນການແບ່ງຄວາມຮັບຜິດຊອບກັນບໍ່ລະອຽດ, ສູນກາງມອບໃຫ້ແຂວງ, ແຂວງມອບຕໍ່ໃຫ້ເມືອງ, ເມືອງມອບຕໍ່ໃຫ້ບ້ານ ແລະ ກໍລະນີອື່ນໆ ເຮັດໃຫ້ຕົ້ນໄມ້ທີ່ປູກໄປແລ້ວແມ່ນປ່ອຍປະໃຫ້ຟ້າຝົນຫົດນໍ້າໃຫ້ຕາມທຳມະຊາດ ຕົ້ນໃດທີ່ມີຄວາມແຂງແຮງ ແລະ ທົນທານຈຶ່ງສາມາດເຕີບໂຕໄດ້, ສ່ວນຕົ້ນໃດທີ່ບໍ່ແຂງແຮງແມ່ນບໍ່ສາມາດເຕີບໂຕໄດ້ ໃນທີ່ສຸດກໍ່ຕາຍໄປ ເຮັດໃຫ້ສູນເສຍງົບປະມານຂອງລັດຈຳນວນບໍ່ໜ້ອຍໃນແຕ່ລະປີ.

ປັດຈຸບັນ, ບັນດາຂະແໜງການນັບແຕ່ສູນກາງ ແລະ ທ້ອງຖິ່ນໄດ້ກະກຽມເບ້ຍໄມ້ທີ່ຈະປູກໄວ້ພ້ອມແລ້ວ ໂດຍປະຕິບັດຕາມແຈ້ງການຂອງກະຊວງກະສິກຳ ແລະ ປ່າໄມ້ ສະບັບເລກທີ 0035 ລົງວັນທີ 10 ພຶດສະພາ 2019 ກ່ຽວກັບການສ້າງຂະບວນການປູກຕົ້ນໄມ້ ແລະ ຟື້ນຟູປ່າ ເນື່ອງໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ໂດຍອີງຕາມເງື່ອນໄຂ ແລະ ຄວາມເໝາະສົມຂອງແຕ່ລະທ້ອງຖິ່ນ. ໃນນີ້ສະເພາະຢູ່ນະຄອນຫຼວງວຽງຈັນ ໃນຕົ້ນເດືອນມີນາປີນີ້ໄດ້ເກີດມີໄຟໄໝ້ລາມປ່າຢູ່ເຂດພູພະນັງ ແລະ ເຂດອື່ນໆຂອງ 3 ເມືອງຄື: ສັງທອງ, ສີໂຄດຕະບອງ ແລະ ນາຊາຍທອງ ເຮັດໃຫ້ເນື້ອທີ່ປ່າໄມ້ເສຍຫາຍຫຼາຍກວ່າ 400 ເຮັກຕາ ແລະ ນະຄອນຫຼວງວຽງຈັນໄດ້ວາງຄາດໝາຍໄວ້ວ່າ ຈະປູກຕົ້ນໄມ້ໃຫ້ໄດ້ຫຼາຍກວ່າ 300 ເຮັກຕາ, ໃນນີ້ຫຼາຍກວ່າໝູ່ແມ່ນຢູ່ເມືອງສັງທອງ 120 ກວ່າເຮັກຕາ, ຮອງມາແມ່ນເມືອງໄຊທານີ 100 ເຮັກຕາ ແລະ ອື່ນໆ.

ທ່ານ ຫຼ້າສາຍ ນວນທາສິງ ຫົວໜ້າພະແນກກະສິກຳ ແລະ ປ່າໄມ້ນະຄອນຫຼວງວຽງຈັນໃຫ້ສຳພາດວ່າ: ການປູກຕົ້ນໄມ້ຢູ່ນະຄອນຫຼວງວຽງຈັນປີນີ້ ປະຕິບັດຄືທຸກໆປີຜ່ານມາ ໂດຍເນັ້ນໃຫ້ພາກລັດ ແລະ ເອກະຊົນຮ່ວມກັນປູກ ນອກຈາກປູກໃນເນື້ອທີ່ທີ່ເໝາະສົມແລ້ວ ຍັງເນັ້ນໃສ່ປູກຕົ້ນໄມ້ເພື່ອສ້າງນະຄອນຫຼວງວຽງຈັນໃຫ້ກາຍເປັນຕົວເມືອງສີຂຽວ ແລະ ໜ້າຢູ່.

ລັດຖະບານໄດ້ວາງຄາດໝາຍເຮັດໃຫ້ອັດຕາການປົກຫຸ້ມຂອງເນື້ອທີ່ປ່າໄມ້ຢູ່ໃນລາວກວມ 70 ສ່ວນຮ້ອຍໃນປີ 2020 ຕາມທິດການພັດທະນາແບບຍືນຍົງ ແລະ ການເຕີບໂຕສີຂຽວຂອງອົງການສະຫະປະຊາຊາດວາງອອກ, ແຕ່ມາຮອດປີ 2017 ຜ່ານມາ ອັດຕາການປົກຫຸ້ມຂອງເນື້ອທີ່ປ່າໄມ້ຢູ່ໃນລາວ ຖ້າອີງໃສ່ມາດຕະຖານຂອງລາວຢູ່ທີ່ 60 ກວ່າສ່ວນຮ້ອຍ ແຕ່ຖ້າອີງໃສ່ມາດຕະຖານສາກົນຢູ່ທີ່ 79 ສ່ວນຮ້ອຍຂອງເນື້ອທີ່ທົ່ວປະເທດ.

ທ່ານ ຊູຊາດ ໄຊຍະກຸມມານ ຫົວໜ້າກົມປ່າໄມ້, ກະຊວງກະສິກຳ ແລະ ປ່າໄມ້ ໃຫ້ສຳພາດວ່າ: ເພື່ອເຮັດໃຫ້ອັດຕາການປົກຫຸ້ມຂອງເນື້ອທີ່ປ່າໄມ້ໃນລາວບັນລຸຕາມຄາດໝາຍທີ່ວາງໄວ້ ມັນຮຽກຮ້ອງໃຫ້ທຸກພາກສ່ວນໃນສັງຄົມເປັນເຈົ້າການປູກຕົ້ນໄມ້, ຄຸ້ມຄອງ ແລະ ປົກປັກຮັກສາປ່າໄມ້ ຮ່ວມກັນໃຫ້ຈິງຈັງກວ່າເກົ່າ ດ້ວຍການປະຕິບັດບັນດາມາດຕະການທີ່ຂັ້ນເທິງວາງອອກຢ່າງເຂັ້ມງວດ ແລະ ບໍ່ຄວນມອບຄວາມຮັບຜິດຊອບວຽກງານນີ້ໃຫ້ກົມປ່າໄມ້ພຽງຢ່າງດຽວ. ທ່ານຜູ້ຟັງທີ່ເຄົາລົບ! ການປູກຕົ້ນໄມ້ບໍ່ໄດ້ຈຳກັດສະເພາະຕ້ອງປູກໃນໂອກາດວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາເທົ່ານັ້ນ ແຕ່ສາມາດປູກໄດ້ຕະຫຼອດລະດູຝົນ ໂດຍອີງຕາມສະພາບເງື່ອນໄຂ ແລະ ຄວາມເໝາະສົມຂອງແຕ່ລະທ້ອງຖິ່ນ. ດັ່ງນັ້ນ ຈຶ່ງຮຽກຮ້ອງມາຍັງທຸກພາກສ່ວນ ແລະ ທຸກຄົນໃນສັງຄົມຈົ່ງຫັນມາປູກຕົ້ນໄມ້ໃຫ້ຫຼາຍຂຶ້ນ. ເມື່ອປູກແລ້ວຕ້ອງມີມາດຕະການບົວລະບັດ ແລະ ປົກປັກຮັກສາໃຫ້ດີ ເພື່ອໃຫ້ຕົ້ນໄມ້ທີ່ປູກໄປນັ້ນຈະເລີນເຕີບໂຕໄວເປັນປ່າໄມ້ທີ່ຂຽວງາມ ແລະ ອຸດົມສົມບູນໃນຕໍ່ໜ້າ. ຫ້າມເດັດຂາດບໍ່ໃຫ້ຖືເອົາການປູກຕົ້ນໄມ້ເປັນພຽງການສ້າງຂະບວນການ ແລະ ປູກໃນເນື້ອທີ່ເກົ່າເປັນປະຈຳທຸກປີ ບົນພື້ນຖານການປະຢັດມັດທະຍັດ. ສ່ວນຜູ້ທີ່ໄປປູກຕົນໄມ້ຕ້ອງຄຳນຶງເຖິງຫຼັກການປູກຕົ້ນໄມ້ທີ່ຖືກຕ້ອງ ບໍ່ແມ່ນໄປປູກເພື່ອເອົາຂະບວນການ, ປູກພໍແລ້ວມື ແລະ ພໍໄດ້ຖ່າຍຮູບລົງເຟສບຸກເທົ່ານັ້ນ. ເມື່ອປູກສຳເລັດແລ້ວຂະແໜງການທີ່ກ່ຽວຂ້ອງນັບແຕ່ສູນກາງລົງຮອດທ້ອງຖິ່ນຕ້ອງມອບຄວາມຮັບຜິດຊອບໃຫ້ກັນບົວລະບັດຮັກສາຢ່າງລະອຽດ ຢ່າຖີ້ມຮັບຜິດຊອບໃຫ້ກັນຄືທີ່ຜ່ານມາ ຖ້າບໍ່ດັ່ງນັ້ນ, ຈະເຮັດໃຫ້ຕົ້ນໄມ້ທີ່ປູກໄປຖືກປ່ອຍປະໄປຕາມທຳມະຊາດ ໃນທີ່ສຸດກໍ່ຕາຍໄປເອງ ເຮັດໃຫ້ສູນເສຍ