ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ປູກຫຍ້າ-ລ້ຽງງົວ ອີກໜຶ່ງອາຊີບທີ່ພາຄອບຄົວພົ້ນທຸກ

ໂດຍຍືດໝັ້ນຕາມແນວທາງ, ນະໂຍບາຍຂອງພັກ ແລະ ລັດຖະບານວາງອອກ ເພື່ອສູ້ຊົນໃຫ້ຄອບຄົວຫຼຸດພົ້ນອອກຈາກຄວາມທຸກຍາກ ແລະ ພັດທະນາໃຫ້ຮັ່ງມີຂຶ້ນເລື້ອງໆດ້ວຍການປູກຝັງ-ລ້ຽງສັດເປັນສິນຄ້າ, ໜຶ່ງໃນນັ້ນຄອບຄົວຂອງ ນາງ ພີມພອນ ເພັງສະຫວັດ ອາຍຸ 30 ປີ, ຢູ່ບ້ານ ໂພນສະອາດ, ເມືອງພຽງ, ແຂວງ ໄຊຍະບູລີ ທີ່ຍຶດຖືອາຊີບລ້ຽງງົວຕິດພັນກັບການປູກຫຍ້າ, ເພື່ອສ້າງລາຍຮັບເຂົ້າຄອບຄົວ ຈົນສາມາດຫຼຸດພົ້ນອອກຈາກຄວາມທຸກຍາກໄດ້.

ນາງ ພີມພອນ ເພັງສະຫວັດ ໄດ້ໃຫ້ຮູ້ວ່າ: ພາຍໃນຄອບຄົວມີຈໍານວນພົນທັງໝົດ 3 ຄົນ, ຍິງ 3 ຄົນ, ມີແຮງງານຕົ້ນຕໍ 1 ແຮງງານ ແລະ ດ້ວຍຄວາມຢາກເຮັດຢາກສ້າງ ແລະ ສະຫງວນຮັກ ໃນການປູກ – ການລ້ຽງ ແລະ ທໍາມາຫາກິນຖືກຕ້ອງຕາມລະບຽບກົດໝາຍ, ໂດຍອີງໃສ່ສະພາບທີ່ຕັ້ງ, ຈຸດພິເສດຂອງບ້ານ ແລະ ເງື່ອນໄຂເອື້ອອໍານວຍໃນທ້ອງຖິ່ນ ທີ່ເໝາະສົມໃຫ້ແກ່ການລ້ຽງສັດ, ເຊິ່ງໄດ້ເລີ່ມລ້ຽງງົວແຕ່ປີ 2012 ເປັນຕົ້ນມາ ໃນເບື້ອງຕົ້ນມີງົວ 25 ໂຕ ໄດ້ລ້ຽງແບບປະຖົມປະຖານ( ປະປ່ອຍຫາກິນຕາມທໍາມະຊາດ, ຕາມເຂດຈັດສັນຂອງບ້ານ ), ປີ 2014 ຈໍານວນງົວໄດ້ເພີ່ມຂຶ້ນເປັນ 35 ໂຕ, ເຮັດໃຫ້ຫຍ້າທໍາມະຊາດບໍ່ພຽງພໍ ສັດຈ່ອຍ ແລະ ຕາຍຈໍານວນໜຶ່ງ, ການສັກຢາກັນພະຍາດກໍ່ພົບຄວາມຫຍຸ້ງຍາກ, ເພື່ອແກ້ໄຂຕໍ່ບັນຫາດັ່ງກ່າວຈຶ່ງໄດ້ສຶກສາຂໍ້ມູນ-ເຕັກນິກນໍາປື້ມຄູ່ມືໃນການລ້ຽງສັດ, ໄດ້ສຶກສານໍາວິຊາການລ້ຽງສັດຂັ້ນເມືອງ ແລະ ຂໍ້ມູນອື່ນໆເພື່ອເປັນພື້ນຖານໃຫ້ແກ່ການລ້ຽງສັດແບບເປັນຟາມ, ມາຮອດປີ 2015 ໄດ້ມີແນວຄິດລິເລີ່ມຫັນວິທີການລ້ຽງແບບປະຖົມປະຖານ, ລ້ຽງແບບທໍາມະຊາດໃນເມື່ອກ່ອນ ຫັນມາລ້ຽງແບບເປັນຄອກ ເປັນຟາມ ໃນເນື້ອທີ່ 26 ເຮັກຕາ ພ້ອມທັງໄດ້ລ້ອມຮົ້ວ ແລະ ປູກຫຍ້າຈໍານວນ 20 ເຮັກຕາ, ຫຍ້າທີ່ນໍາມາປູກມີ ຫຍ້າເນເປຍ, ລູຊີ, ກີນນີ, ໂມລາໂຕ ໂດຍແບ່ງເປັນ 4 ລັອກ ເພື່ອເອົາສັດເຂົ້າກິນ ໝູນວຽນເປັນແຕ່ລະລັອກ, ໄດ້ເຮັດຄອກໃຫ້ສັດເພື່ອຊົ້ນແດດຊົ້ນຝົນ ແລະ ເຮັດຄອກແຄບ ເພື່ອສະດວກໃນການກວດກາສຸຂະພາບສັດ ແລະ ສັກຢາປ້ອງກັນພະຍາດຕາມລະດູການ, ຈຶ່ງເຮັດໃຫ້ສັດເພີ່ມຂຶ້ນໃນແຕ່ລະປີ,  ປະຈຸບັນມີງົວທັງໝົດ 73 ໂຕ, ປີຜ່ານມາມີລາຍຮັບເຂົ້າຄອບຄົວຈາກການຂາຍງົວອອກເປັນຄັ້ງທໍາອິດຈໍານວນ 5 ໂຕ ໄດ້ເງິນ 20.000.000 ກີບ, ນອກຈາກມີລາຍຮັບຈາກຂາຍງົວແລ້ວ ຍັງມີລາຍຮັບຈາກຮ້ານເສີມສວຍອີກ 10.000.000 ກີບ/ປີ, ລວມລາຍຮັບທັງໝົດ 30.000.000 ກີບ/ປີ, ສະເລ່ຍຕໍ່ຄົນໜຶ່ງ 10.000.000 ກີບ/ຄົນ/ປີ,  ຍ້ອນຄວາມດຸໝັ່ນ ແລະ ອົດທົນ ຈຶ່ງເຮັດໃຫ້ພື້ນຖານ ຊີວິດການເປັນຢູ່ຂອງຄອບຄົວ ນາງ ພີມພອນ ເພັງສະຫວັດ ນັບມື້ດີຂຶ້ນເລື້ອຍໆ, ຜ່ານການສະສົມລາຍຮັບໃນແຕ່ລະປີ ນາງ ພີມພອນ ເພັງສະຫວັດ ສາມາດປຸກເຮືອນໄດ້ 1 ຫຼັງ ແລະ ມີລົດໃຫຍ່ 1 ຄັນ.

ນັກຂ່າວ: ຫ້ອງວ່າການແຂວງ ໄຊຍະບູລີ

ໂດຍ: ອຸ່ນເຮືອນ ໂພທິລັກ