ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ປູກໝາກກ້ຽງສ້າງລາຍຮັບໃຫ້ຄອບຄົວໄດ້100ກ່ວາລ້ານກີບຕໍ່ປີ
ການປູກຝັງ ເປັນອີກຫົນທາງໜຶ່ງທີ່ປະ ຊາຊົນລາວຢືດຖືເປັນອາຊີບ ເພື່ອສ້າງລາຍຮັບມາສູ່ຄອບຄົວໃຫ້ມີຢູ່ ມີກິນ ມີຊີວິດການເປັນຢູ່ທີ່ດີຂຶ້ນ. ການປະກອບອາຊີບໃດກໍ່ຕາມຫາກເຮົາມີຄວາມມັກ, ກ້າຕັດ ສິນໃຈ, ເປັນກິດຈະກຳທີ່ບໍ່ຜິດຕໍ່ລະບຽບກົດໝາຍບ້ານເມືອງ ແລະ ມີການປັບປຸງແກ້ໄຂການດໍາລົງຊີວິດກໍສາມາດນໍາມາເປັນບົດຮຽນ ເຮັດໃຫ້ມີຜົນສຳເລັດເຊັ່ນດຽວກັນ ຄືດັ່ງຄອບຄົວຂອງ ທ່ານ ສຸກສີວົງ ທິບພົມວົງ ຢູ່ບ້ານນາໜອງບົວ ເມືອງຊຳເໜືອ ແຂວງຫົວພັນ ທີ່ຢຶດຖືອາຊີບປູກໝາກກ້ຽງເປັນສິນຄ້າເພື່ອສ້າງລາຍຮັບໃຫ້ແກ່ຄອບຄົວ ພາຍໃນຄອບຄົວມີສະມາຊິກທັງໝົດ3ຄົນ ແຮງງານຕົ້ນຕໍ່2ຄົນ.
ທ່ານ ສຸກສີວົງ ທິບພົມວົງ ໃຫ້ສຳພາດວ່າ: ເມື່ອກ່ອນຕົນເອງມີອາຊີບເຮັດທຸລະກິດຄ້າຂາຍທົ່ວໄປ ຕໍ່ມາເຮັດຮ້ານຈອດເຫຼັກ, ຈອດໜາງປະຕູ-ປ້ອງຢ້ຽມຕ່າງໆ, ສ້ອມແປງລົດຈັກ ແລະ ບໍລິການເຊົ່າໂຕະຕັ່ງ, ເຕັ້ນ-ດົນຕີຮັບໃຊ້ງານຕ່າງໆ ແຕ່ກໍ່ຍັງບໍ່ທັນມີລາຍຮັບທີ່ແນ່ນອນ ແລະ ໄດ້ດີປານໃດ. ມາຮອດປີ 2016 ຈິ່ງມີແນວຄິດ ຢາກປູກໝາກກ້ຽງ ຍ້ອນມີຄວາມມັກຮັກອາຊີບການປູກຝັງບວກໃສ່ສະພາບແວດລ້ອມເສດຖະກິດມີຄວາມຫຍຸ້ງຍາກ ການດໍາເນີນທຸລະກິດທີ່ຕົນເຮັດມາກໍບໍ່ຄ່ອຍໄປໄດ້ດີເທົ່າທີ່ຄວນ ອີກອັນໜຶ່ງແມ່ນສັງເກດເບິ່ງ ທ້ອງຕະຫຼາດທີ່ຂາດສິນຄ້າ ຫຼືມີຢູ່ໃນຕະຫຼາດໜ້ອຍບໍ່ພຽງພໍກັບຄວາມຕ້ອງການຂອງຜູ້ບໍລິໂພກ ຕົນເອງຈິ່ງ ຫັນມາປູກໝາກກ້ຽງ ໂດຍໄດ້ຊື້ດິນນໍາປະຊາຊົນຢູ່ບ້ານເມືອງລຽດ ເມືອງວຽງໄຊ ແຂວງຫົວພັນ ໃນເນື້ອທີ່ທັງໝົດ 3ເຮັກຕາ ໃນນີ້ໄດ້ແບ່ງເຮັດໜອງປາ 0,5 ເຮັກຕາ, ປູກໝາກກ້ຽງ 2,5 ເຮັກຕາ ມີຕົ້ນໝາກກ້ຽງ 1500 ຕົ້ນ ໃຊ້ທຶນຂອງຄອບຄົວທັງໝົດ 1 ຕື້ກີບ ຜ່ານການປູກມາຮອດປີ 2020 ໝາກກ້ຽງໃຫ້ໝາກໄດ້ພຽງ 40 ກິໂລ ເທົ່ານັ້ນ, ປີ2022 ໃຫ້ໝາກໄດ້ 4,5 ໂຕນ ຂາຍໃນລາຄາ 15.000 ກີບຕໍ່ກິໂລ, ມີລາຍຮັບ 67.000.000 ກີບ, ມາຮອດປີ 2023ນີ້ ເຫັນວ່າໝາກກ້ຽງເປັນໝາກຫຼາຍສົມຄວນບາງຕົ້ນໄດ້ເຖິງ 30 ກິໂລ. ປີນີ້ຄາດວ່າຈະຂາຍໝາກກ້ຽງອອກປະມານ 7 ໂຕນ, ລາຄາຂາຍຍ່ອຍແມ່ນ 20.000 ກີບຕໍ່ກິໂລ, ຂາຍຍົກຈໍານວນຫຼາຍແມ່ນລາຄາ 15.000 ກີບຕໍ່ກິໂລ, ຈະສ້າງລາຍຮັບໄດ້ 100 ກວ່າລ້ານກີບ ບ່ອນຂາຍແມ່ນຕະຫຼາດຊຳເໜືອ,ວຽງໄຊ ແລະ ແມ່ຄ້າມາຊື້ຢູ່ກັບສວນເລີຍ ບົດຮຽນການປູກແມ່ນໄດ້ຮັບການແນະນຳເຕັກນິກການປູກ, ການບົວລະບັດຮັກສາ ດ້ານວິຊາການຈາກ ພະແນກກະສິກຳ ແຂວງ ແລະໄດ້ຄົ້ນຄວ້າຮຽນຮູ້ ຈາກຄູ່ມື, ອິນເຕີເນັດ, ຢູທູບຮຽນດ້ວຍຕົນເອງ, ສຳລັບແນວພັນແມ່ນເອົາມາຈາກເມືອງວັງວຽງ ແຂວງວຽງຈັນ ໂດຍຊື້ແກ່ນມາກ້າເອງ ກິໂລ 3 ແສນກີບ ວິທີປູກແມ່ນຕ້ອງຂຸດຂຸມ 60×60 ໄລະຍະຫ່າງຂອງຕົ້ນ 4 ແມັດ ກ່ອນປູກແມ່ນເອົາຝຸ່ນຄອກລົງຮອງພື້ນແລ້ວຈຶ່ງເອົາຕົ້ນໝາກກ້ຽງລົງປູກຫົດນ້ຳປົກກະຕິ, ພາຍຫຼັງປູກໄດ້1ປີ ຈິ່ງນຳເອົາຝຸ່ນຊີວະພາບ ຫຼືຝຸ່ນບົ່ມໃສ່ອີກ ການບົວລະບັດຮັກສາກໍບໍ່ຫຍຸ້ງຍາກປານໃດມີແຕ່ຕັດ ຫຍ້າຂ້າບົ້ງເທົ່ານັ້ນກໍສາມາດເກັບກູ້ຜົນຜະລິດອອກຂາຍໄດ້ ປະຈຸບັນນີ້, ທ່ານ ສຸກສີວົງ ທິບພົມວົງ ໄດ້ເປີດບໍລິການໃຫ້ທຸກທ່ານເຂົ້າໄປທ່ຽວຊົມ, ໄປກິນ ແລະຊື້ຂາຍຢ່າງເປັນທາງການແລ້ວ.ນອກຈາກປູກໝາກກ້ຽງແລ້ວຍັງໄດ້ລ້ຽງປາໃນໜອງ, ລ້ຽງເປັດ-ໄກ່ ຕື່ມອີກເພື່ອເປັນອາຫານຂາຍໃຫ້ແກ່ແຂກຄົນທີ່ເຂົ້າມາທ່ຽວສວນໝາກກ້ຽງ, ລາຍຮັບຈາກການຂາຍປາ, ເປັດ-ໄກ່ ແມ່ນໄດ້ 60 ລ້ານກວ່າກີບ ລວມລາຍຮັບທັງໝົດ 180 ກວ່າລ້ານກີບຕໍ່ປີ ເຊິ່ງໄດ້ເຮັດໃຫ້ຊີວິດການເປັນຢູ່ດີຂຶ້ນ, ມີເງິນໃຊ້ຈ່າຍ ໃນຄອບຄົວ. ທ່ານ ລິດທະສອນ ຮອງຫົວໜ້າຂະແໜງປູກຝັງພະແນກກະສິກຳ ແລະ ປ່າໄມ້ ແຂວງຫົວພັນໄດ້ເວົ້າວ່າ: ໄລຍະຜ່ານມາໄດ້ເອົາໃຈໃສ່ຊຸກຍູ້ສົ່ງເສີມໃຫ້ປະຊາຊົນປູກຝັງ-ລ້ຽງສັດໃຫ້ຫຼາຍກາຍເປັນສິນຄ້າ ເປັນຕົ້ນໄດ້ສົ່ງວິຊາການລົງໄປແນະນໍາເຕັກນິກການປູກ,ວິທີການບົວລະບັດຮັກສາຕົ້ນໝາກກ້ຽງໃຫ້ ຄອບຄົວທ່ານສຸກສີວົງຢູ່ບ້ານເມືອງລຽດເມືອງວຽງໄຊເປັນປົກກະຕິ.
ຈາກຜົນສໍາເລັດໃນການເລືອກອາຊີບສ້າງເສດຖະກິດຄອບຄົວດ້ວຍການປູກໝາກກ້ຽງໄດ້ເຮັດໃຫ້ຊີວິດການ ເປັນຢູ່ຂອງຄອບຄົວດີຂຶ້ນ ແລະ ກາຍເປັນຄອບຄົວແບບຢ່າງຢູ່ໃນບ້ານເມືອງລຽດ ທ່ານ ທອງຄໍາ ພອນວິຈິດ ນາຍບ້ານໆເມືອງລຽດເມືອງວຽງໄຊ ເວົ້າວ່າ: ຄອບຄົວທ່ານສຸກສີວົງ ເປັນຄອບຄົວທີ່ມີຄວາມດຸໝັ່ນຂະຫຍັນພຽນ, ເຮັດແທ້ທຳຈິງສ້າງເສດຖະກິດຄອບຄົວບົນພື້ນຖານການເພິ່ງຕົນເອງ, ສ້າງຄວາມເຂັ້ມແຂງດ້ວຍຕົນເອງກຸມຕົນເອງ, ທັງເປັນແບບຢ່າງທີ່ດີໃຫ້ແກ່ປະຊາຊົນພາຍໃນບ້ານ; ນີ້ກໍຍ້ອນຄວາມດຸໝັ່ນຂະຫຍັນພຽນ, ຄວາມສາມັກຄີເປັນເອກະພາບຂອງຄົນພາຍໃນຄອບຄົວບວກໃສ່ ຄວາມເອົາໃຈໃສ່ຂອງພັກ-ລັດ ທີ່ມີແນວທາງອັນຖືກຕ້ອງ ໃນການຊີ້ນໍາ-ນໍາພາປະຊາຊົນບັນດາເຜົ່າ ເວົ້າລວມ ເວົ້າສະເພາະຄອບຄົວທ່ານ ສຸກສີວົງ ໃນການສ້າງເສດຖະກິດຄອບຄົວຕາມທ່າແຮງ ແລະ ເງື່ອນໄຂຂອງຄອບຄົວເພື່ອພັດທະນາຊີວິດການເປັນຢູ່ຫຼຸດພົ້ນອອກຈາກຄວາມທຸກຍາກ ເທື່ອລະກ້າວທັງເປັນການປະກອບສ່ວນ ຈັດຕັ້ງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນໃຫ້ບັນລຸຕາມຄາດໝາຍ ເທື່ອລະກ້າວ. ສໍາລັບແຜນການໃນຕໍ່ໜ້າ ແມ່ນຈະສືບຕໍ່ປູກໝາກກ້ຽງຕື່ມ 200 ຕົ້ນ ຂະຫຍາຍການລ້ຽງປາກະຊັງ, ປາດຸກພັນ, ລ້ຽງເປັດພັນໄຂ່ ແລະ ໄກ່ລາດອີກ ເພື່ອພັດທະນາເສດຖະກິດຄອບຄົວໃຫ້ເຂັ້ມແຂງຂຶ້ນເລື້ອຍໆ.
ຂ່າວ:ພວງວອນ
ພາບ: ສີອຳພອນ