ວັນທີ 20 ກັນຍາ 2024 ທ່ານ ທອງໃສ ໄຊຍະວົງຄໍາດີ ເຈົ້າເມືອງອຸທຸມພອນ ແຂວງສະຫວັນນະເຂດພ້ອມດ້ວຍຄະນະ ໄດ້ນໍາເອົານົກທີ່ຍຶດໄດ້ໄປປ່ອຍຄືນສູ່ປ່າທໍາມະຊາດ (ປ່າສະຫງວນ ດົງນາຕາດ) ທີ່ວັດປ່າຫຼັກ 19 ນະຄອນໄກສອນ ພົມວິຫານ.
ນົກທີ່ນໍາໄປປ່ອຍຄັ້ງນີ້ເປັນ ນົກຫອນຈຸກແກ້ມແດງ ຫຼື ນົກກະຫຼິວຫອນຈຸກ ທີ່ຍຶດໄດ້ຈາກພໍ່ຄ້າຊາວຕ່າງປະເທດ, ໃນວັນທີ 19 ກັນຍາ 2024, ມີຈໍານວນ 906 ໂຕ, ເຊິ່ງນົກຫອນຈຸກແກ້ມແດງ ແມ່ນປະເພດສັດຄຸ້ມຄອງ ຫຼື ບັນຊີ II ປະກອບດ້ວຍ 61 ຊະນິດ, ໃນນີ້ສັດລ້ຽງລູກດ້ວຍນົມ 21 ຊະນິດ, ສັດເລືອຄານ 07 ຊະນິດ, ສັດປີກ 24 ຊະນິດ, ສັດເຄິ່ງບົກ-ເຄິ່ງນໍ້າ 01 ຊະນິດ ແລະ ແມງໄມ້ 08 ຊະນິດ
ອີງຕາມກົດໝາຍ ວ່າດ້ວຍສັດປ່າ ( ສະບັບປຸງ )ໃນໝວດທີ II ມາດຕາ 12 ( ປັບປຸງ ) ສັດປ່າບັນຊີ II ແມ່ນສັດປ່າທີ່ບໍ່ຖືກໄພຂົ່ມຂູ່ຕໍ່ການສູນພັນ, ມີຄຸນປະໂຫຍດທາງດ້ານລະບົບນິເວດ, ເສດຖະກິດ-ສັງຄົມ ແລະ ການສຶກສາຄົ້ນຄວ້າດ້ານວິທະຍາສາດ, ສັດປ່າ ບັນຊີ II ຕ້ອງມີການຄຸ້ມຄອງ, ປົກປັກຮັກສາ, ພັດທະນາ ແລະ ຄວບຄຸມການນໍາໃຊ້
