ປ່ຽນປ້າຍທະບຽນ ຈາກ “ກຳແພງນະຄອນວຽງຈັນ” ມາເປັນ “ນະຄອນຫຼວງວຽງຈັນ” ຢ່າງເປັນທາງການ.

ພິທີປ່ຽນປ້າຍທະບຽນ ຈາກ “ກຳແພງນະຄອນວຽງຈັນ” ມາເປັນ “ນະຄອນຫຼວງວຽງຈັນ” ຢ່າງເປັນທາງການຈັດຂຶ້ນໃນຕອນເຊົ້າວັນທີ 1 ມີນາ 2024 ທີ່ກອງຄຸ້ມຄອງພາຫະນະ ແລະ ການຂັບຂີ່ ນະຄອນຫລວງວຽງຈັນ ໂດຍການໃຫ້ກຽດເຂົ້າຮ່ວມຂອງ ທ່ານ ອາດສະພັງທອງ ສີພັນດອນ, ເຈົ້າຄອງນະຄອນຫຼວງວຽງຈັນ ແລະ ທ່ານ ງາມປະສົງ ເມືອງມະນີ, ລັດຖະມົນກະຊວງ ໂຍທາທິການ ແລະ ຂົນສົ່ງ, ພ້ອມພາກສ່ວນກ່ຽວຂ້ອງ.

ນະຄອນ ຫຼວງວຽງຈັນ ໄດ້ຮັບການປ່ຽນຊື່ມາຈາກ “ກຳແພງນະຄອນວຽງຈັນ” ມາຕັ້ງແຕ່ປີ 2006 ຕາມດໍາລັດເລກທີ 32/ສປປລ, ລົງວັນທີ 28 ພຶດສະພາ 2006. ຊຶ່ງບັນດານິຕິກຳ ແລະ ເອກະສານຫລາຍຢ່າງໄດ້ຮັບການປັບປຸງປ່ຽນຊື່ໃຫ້ສອດຄ່ອງ ແຕ່ຍັງມີໃບທະບຽນຍານພາຫະນະ ຍານພາຫະນະ ທີ່ຍັງບໍ່ທັນໄດ້ຮັບການປ່ຽນເທື່ອ ຊຶ່ງຜ່ານມາທາງກະຊວງ ໂຍ ທາທິການ ແລະ ຂົນສົ່ງ ແລະ ກະຊວງປ້ອງກັນຄວາມສະຫງົບ ໄດ້ປະສານສົມທົບກັນເພື່ອປັບປຸງໃຫ້ສອດຄ່ອງກັບການປ່ຽນແປງດັ່ງກ່າວ.

ມາຮອດເວລານີ້ເງື່ອນໄຂຕ່າງ ໆ ແມ່ນໄດ້ອຳນວຍຄວາມສະດວກແລ້ວ, ໂດຍປະຕິບັດຕາມຂໍ້ຕົກລົງຂອງກະຊວງ ໂຍທາທິການ ແລະ ຂົນສົ່ງ ສະບັບເລກທີ 37899/ຍທຂ, ລົງວັນທີ່ 25 ທັນວາ 2023 ວ່າດ້ວຍມາດຕະຖານເຕັກນິກຂອງປ້າຍທະບຽນ ຍານພາຫະນະທາງບົກ ແລະ ຕາມແຈ້ງການຂອງຫ້ອງການກະຊວງ ຍທຂ ສະບັບເລກທີ 88/ຫກ, ລົງວັນທີ່ 3 ມັງກອນ 2024 ເລື່ອງ: ການປ່ຽນຊື່ປ້າຍທະບຽນຍານພາຫະນະທາງບົກ ມາເປັນນະຄອນຫຼວງວຽງຈັນ, ຊຶ່ງການປ່ຽນ ຊື່ດັ່ງກ່າວແມ່ນຈະເລີ້ມໃນວັນທີ 1 ມີນາ 2024.

ສຳລັບຍານພາຫະນະທາງບົກທີ່ມາຂຶ້ນທະ ບຽນເລີ້ມແຕ່ວັນທີ່ 1 ມີນາ 2024 ຈະໄດ້ປ່ຽນຊື່ປ້າຍທະບຽນ ຈາກ ກຳແພງນະຄອນ ມາເປັນນະຄອນຫຼວງວຽງຈັນ ໄປເລີຍ. ຍານພາຫະ ນະທາງບົກ ທີ່ຂຶ້ນທະບຽນແລ້ວ ຊື່ປ້າຍກຳແພງນະຄອນ ຖ້າຢາກສືບຕໍ່ນໍາໃຊ້ ກໍ່ສາມາດນໍາໃຊ້ໄດ້ ຈົນກວ່າໃບທະບຽນຈະໝົດອາຍຸ ຈຶ່ງປ່ຽນເປັນນະຄອນຫຼວງວຽງຈັນ ຫລື ຖ້າມີຈຸດປະສົງຢາກປ່ຽນກ່ອນ ກໍ່ສາມາດປ່ຽນ ໄດ້ຕາມຄວາມສະມັກໃຈ ແຕ່ລະຫັດປ້າຍ ແລະ ຕົວເລກທະບຽນ ແມ່ນໃຫ້ຮັກສາໄວ້ຄືເກົ່າ.

ໃນໂອກາດນີ້, ທ່ານ ອາດສະພັງທອງ ສີພັນດອນ, ເຈົ້າຄອງນະຄອນຫລວງວຽງຈັນ ໄດ້ຮຽກຮ້ອງມາຍັງພາກສ່ວນກ່ຽວຂ້ອງຕ້ອງເອົາໃຈໃສ່ເລີ່ມຈາກການສ້າງຄວາມຮັບຮູ້ເຂົ້າໃຈວ່າ ເຫດຜົນ ແລະ ເງື່ອນໄຂ ການປ່ຽນປ້າຍທະບຽນ ແມ່ນປະຕິບັດໃຫ້ສອດຄ່ອງກັບຄວາມເປັນຈິງ ໃຫ້ ຖືກກັບຊື້ເອີ້ນຂອງນະຄອນຫຼວງວຽງຈັນ ແຕ່ການປະຕິບັດ ແມ່ນໃຫ້ດໍາເນີນ ການດ້ວຍຄວາມຄ່ອງຕົວ ບໍ່ແມ່ນການບັງຄັບປະຕິບັດມື້ໜຶ່ງຍາມດຽວ ດັ່ງນັ້ນ ຮຽກຮ້ອງການໃຫ້ຜູ້ອອກຂ່າວ ຜູ້ໄດ້ຮັບຂໍ້ມູນ ແລ້ວສົ່ງຕໍ່ຂໍ້ມູນ ຕ້ອງໄດ້ມີ ສະຕິ ໃນການສະແດງຄວາມຄິດເຫັນໃຫ້ຖືກຕ້ອງແລະສອດຄ່ອງ.

ພ້ອມນີ້ ໄດ້ຮຽກຮ້ອງມາຍັງເຈົ້າໜ້າທີ່ທີ່ຮັບຜິດ ຊອບວຽກງານທີ່ກ່ຽວຂ້ອງ ຕ້ອງ ໄດ້ຮັກສາຈັນຍາບັນໃນການໃຫ້ການບໍລິການແກ່ສັງຄົມດ້ວຍຄວາມເປັນເຈົ້າ ການແລະ ໃຫ້ຖືກ ຕ້ອງຕາມລະບຽບກົດໝາຍ, ສໍາຄັນແມ່ນການອອກນິຕິກຳ, ລະບຽບການ, ຄູ່ມືແນະນໍາອັນລະອຽດ ພ້ອມທັງປະຊາສໍາພັນໃຫ້ສັງຄົມໄດ້ຮັບຊາບຢ່າງທົ່ວເຖິງ.

Cr: ຂ່າວອອນລາຍ, ວສລ