ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ່ 6 ກັນຍາ ປີ 2022, ທ່ານນາງ ດຣ. ເພຍ ເຣເບລໂລ ບີຣໂຕ, ຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ, ໄດ້ເຂົ້າຢ້ຽມຂໍ່ານັບ ພະນະທ່ານ ມາໄລທອງ ກົມມະສິດ, ລັດຖະມົນຕີກະຊວງອຸດສາຫະກຳ ແລະ ການຄ້າ ເເຫ່ງ ສປປ ລາວ.
ໃນການເຂົ້າຢ້ຽມຂໍ່ານັບໃນຄັ້ງນີ້, ທ່ານ ນາງເພຍ ເຣເບລໂລ ບີຣໂຕ, ຜູ້ຕາງໜ້າ ອົງການຢູນິເຊັບ ປະຈຳ ສປປ ລາວ ໄດ້ສະເເດງຄວາມຍິນດີກັບພະນະທ່ານ ມາໄລທອງ ກົມມະສິດ ໃນໂອກາດທີ່ທ່ານໄດ້ຖືກແຕ່ງຕັ້ງເປັນ ລັດຖະມົນຕີກະຊວງອຸດສາຫະກຳ. ພ້ອມນີ້້ ທ່ານ ຍັງໄດ້ຍົກໃຫ້ເຫັນເຖິງບົດບາດຂອງ ກະຊວງ ແລະ ພາກເອກະຊົນໃນການປົກປ້ອງ ແລະ ສະໜັບສະໜູນເດັກນ້ອຍໃນ ສປປ ລາວ.
ນອກນັ້ນ, ທ່ານນາງ ດຣ. ເພຍ ເຣເບລໂລ ບີຣໂຕ ກໍ່ໄດ້ເເບງປັນຂໍ້ມູນກ່ຽວກັບວຽກງານ ເເລະ ໂຄງການຕ່າງໆລະຫວ່າງ ອົງການຢູນິເຊັບ ເເລະ ລັດຖະບານເເຫ່ງ ສປປ ລາວ, ເຊັ່ນ: ວຽກງານການສົ່ງເສີມການສຶກສາທີ່ມີຄຸນນະພາບ; ການສ້າງໂອກາດ ໃນການເຮັດວຽກເຮັດງານທໍາ ທີ່ເໝາະສົມສໍາລັບເດັກນ້ອຍທີ່ມີອາຍຸຖືກຕ້ອງຕາມກົດໝາຍສໍາລັບການເຮັດວຽກ, ລວມເຖິງການຝຶກອົບຮົມວິຊາຊີບ ແລະ ວິຊາສະເພາະ; ແລະ ການພັດທະນານະໂຍບາຍສຳລັບສະຖານທີ່ເຮັດວຽກທີ່ເປັນມິດກັບຄອບຄົວເດັກ ເພື່ອຊຸກຍູ້ຄວາມສະເໝີພາບລະຫວ່າງເພດ ແລະ ປົກປ້ອງຊີວິດການເປັນຢູ່ຂອງບັນດາລູກຂອງພະນັກງານ.
ພະນະທ່ານ ມາໄລທອງ ກົມມະສິດ ໄດ້ສະເເດງຄວາມຂອບໃຈຕໍ່ ອົງການຢູນິເຊັບ ທີ່ໄດ້ສືບຕໍ່ໃຫ້ການສະໜັບສະໜູນເເກ່ລັດຖະບານເເຫ່ງ ສປປ ລາວ ເພື່ອປັບປຸງສະຫວັດດີການຂອງເດັກ ແລະ ຄອບຄົວ ໃນ ສປປ ລາວ ຢ່າງບໍ່ອິດເໝື່ອຍມາເປັນເວລາ 50 ປີ. ທ່ານຍັງໄດ້ກ່າວວ່າ ລັດຖະບານແຫ່ງ ສປປ ລາວ ຫວັງວ່າຈະສາມາດເສີມສ້າງການຮ່ວມມືກັບ ອົງການຢູນິເຊັບ ໃຫ້ເເໜ້ນເເຟ້ນຂຶ້ນຍິ່ງກວ່າເກົ່າພາຍໃຕ້ ແຜນງານການຮ່ວມມື ສົກປີ 2022-2026 ອີກເຊັ່ນດຽວກັນ.
ພະນະທ່ານ ມາໄລທອງ ກົມມະສິດ ຍັງໄດ້ກ່າວເຖິງ ບົດບາດຂອງແມ່ຍິງ ໃນຂົງເຂດທຸລະກິດ ທີ່ມີຄວາມຄ່ອງແຄ້ວ ແລະ ລະອຽດ ກວ່າຜູ້ຊາຍ. ແຕ່ ແມ່ຍິງ ມີຄວາມຮັບຜິດຊອບຫລາຍດ້ານ ບໍ່ວ່າດ້ານວຽກງານ ກໍ່ຄືຄອບຄົວ, ດັ່ງເຮັດໃຫ້ ແມ່ຍິງມີວຽກລົ້ນມື ແລະ ບໍ່ມີໂອກາດ ພັດທະນາຕົນເອງຕາມຄວນ. ທ່ານຄິດວ່າ ຫາກອົງການຢູນີເຊັບ ຫາກມີໂຄງການສ້າງຄວາມເຂັ້ມແຂງ ໃຫ້ແມ່ຍິງ ແລະ ຊ່ວຍ ປັບປຸງ ສະພາບແວດລ້ອມ ການເຮັດວຽກຂອງແມ່ຍິງ ກໍ່ຈະເປັນການດີ ທີ່ສຸດ ສໍາລັບແມ່ຍິງລາວ.
ທ່ານນາງ ດຣ. ເພຍ ເຣເບລໂລ ບີຣໂຕ ໄດ້ສະຫຼຸບການເຂົ້າພົບໃນຄັ້ງນີ້ໂດຍສະແດງຄວາມຂອບໃຈຕໍ່ທ່ານລັດຖະມົນຕີທີ່ໄດ້ໃຫ້ການຕ້ອນຮັບຢ່າງອົບອຸ່ນ ເເລະ ຍັງໄດ້ຢືນຢັນຄືນໃໝ່ເຖີງຄຳໝັ້ນສັນຍາຂອງ ອົງການຢູນິເຊັບ ທີ່ຈະສືບຕໍ່ເຮັດວຽກຢ່າງໃກ້ຊິດກັບ ລັດຖະບານ ໃນບັນດາໂຄງາການຕ່າງໆ ພາຍໃຕ້ ແຜນງານການຮ່ວມມື ສົກປີ 2022-2026.