ວັນທີ່ 14 ພຶດສະພາ 2021 ນີ້ ດຣ ວິລະສັກ ບານຸວົງ ຫົວໜ້າຂະແໜງຄວບຄຸມພະຍາດຕິດຕໍ່ ພະແນກສາທາລະນະສຸກແຂວງຫຼວງພະບາງ ແລະ ດຣ ທອງພຸດ ສຸກກະເສີມ ອຳນວຍການໂຮງໝໍແຂວງ ໄດ້ຕາງໜ້າຄະນະສະເພາະກິດ ເພື່ອປ້ອງກັນ ຄວບຄຸມ ແລະແກ້ໄຂການລະບາດ ຂອງພະຍາດໂຄວິດ 19 ຢູ່ແຂວງຫຼວງພະບາງ ຖະແຫຼງຂ່າວປະຈໍໍາວັນກ່ຽວກັບການເຝົ້າລະວັງ COVID-19 ຢູ່ແຂວງຫຼວງພະບາງ, ເຊີ່ງ ດຣ ວິລະສັກ ບານຸວົງ ໄດ້ກ່າວວ່າ: ປະຈຸບັນແຂວງຫຼວງພະບາງ ມີສູນຈໍາກັດບໍລິເວນ ແຮງງານ ແລະບຸກຄົນສຳພັດ-ໃກ້ສິດກັບຜູ້ຕິດເຊື້ອ ຈຳນວນ 17 ສູນ ໃນ 11 ເມືອງ ແລະນະຄອນ ຫຼວງພະບາງ, ພ້ອມທັງສືບຕໍ່ຕັ້ງຈຸດກວດກາຄົນເຂົ້າ-ອອກເມືອງ ຈຳນວນ 30 ຈຸດ ເພື່ອໃຫ້ບໍ່ມີການລັກລອບເຂົ້າເມືອງ ຂອງບຸກຄົນທົ່ວໄປ ໂດຍບໍ່ໄດ້ຮັບອານຸຍາດ, ມາຮອດ ວັນທີ່ 14 ພຶດສະພາ 2021 ມີຜູູ້ເຂົ້າຈໍາກັນບໍລິເວນທັງໝົດ 137 ຄົນ, ໄດ້ເກັບຕົວຢ່າງມາກວດວິເຄາະຫາເຊື້ອພະຍາດ COVID-19 ທັງໝົດ 26 ຕົວຢ່າງ ຜົນກວດທັງໝົດ ແມ່ນບໍ່ພົບຜູ້ຕິດເຊື້ອໃໝ່ ລວມເປັນເວລາ 13 ວັນຕິດຕໍ່ກັນທີ່ບໍ່ມີຜູ້ຕິດເຊື້ອໃໝ່, ຈຳນວນຜູ້ຕິດເຊື້ອສະສົມມີທັງໝົດ 13 ຄົນ, ຍີງ 9 ຄົນ, ສຳລັບການໃຫ້ວັກຊີນປ້ອງກັນພະຍາດໂຄວິດ 19 ມາຮອດປະຈຸບັນໄດ້ສັກໃນເຂັມທີ່ 2 ຫຼາຍກວ່າ 24.200 ຄົນ ແລະເຂັມທີ່ 1 ໃນຮອບທີ່ 3 ຫຼາຍກ່ວາ 6.700 ຄົນ ແລະຍັງສືບຕໍ່ດຳເນີນການສັກວັກຊີນຢູ່ບັນດາໂຮງໝໍເມືອງ, ໂຮງໝໍນ້ອຍ ແລະຕາມຈຸດທີ່ກຳນົດໄວ້ຢູ່ນະຄອນ ຫຼວງພະບາງ ທັງໄດ້ຈັດຕັ້ງທີມງານສັກວັກຊີນເຄື່ອນທີ່ ເພື່ອເພີ່ມອັດຕາພູມຄຸ້ມກັນຂອງພະຍາດໂຄວິດ 19 ໃຫ້ສູງຂື້ນ. ໂອກາດດຽວກັນ ດຣ ທອງພຸດ ສຸກກະເສີມ ໄດ້ໃຫ້ຮູ້ວ່າ: ການປີ່ນປົວຜູ້ຕິດເຊື້ອພະຍາດໂຄວິດ 19 ຢູ່ແຂວງຫຼວງພະບາງ ຈຳນວນ 13 ຄົນ ທີມແພດ ໄດ້ສຸມໃສ່ປີ່ນປົວຕາມອາການ ທັງໄດ້ເກັບຕົວຢ່າງມາກວດຄືນຈຳນວນ 2 ຮອບ ຜົນກວດແມ່ນບໍ່ພົບເຊື້ອ ແລະຈະນຸຍາດໃຫ້ອອກໂຮງໝໍ ຈຳນວນ 6 ຄົນ ເພື່ອໄປຕິດຕາມອາການຕົວເອງຢູ່ເຮືອນອີກ 14 ວັນ ແລະຈະມີການກວດຫາເຊື້ອຄືນອີກ ຫາກບໍ່ພົບເຊື້ອໂຄວິດ 19 ຈື່ງຈະອານຸຍາດໃຫ້ໃຊ້ຊີວິດຕາມປົກກະຕິ.
ໂອກາດການຖະແຫຼງຂ່າວປະຈໍໍາວັນ ຄັ້ງນີ້ ຄະນະສະເພາະກິດແຂວງຫຼວງພະບາງໄດ້ຮຽກຮ້ອງໃຫ້ທຸກພາກສ່ວນໃນສັງຄົມ ພາຍໃນແຂວງຫຼວງພະບາງ ສືບຕໍ່ປະຕິບັດມາດຕະການທີ່ຄະນະສະເພາະກິດວາງອອກໃຫ້ເຂັ້ມງວດ ເຖີງວ່າແຂວງຫຼວງພະບາງ ຈະບໍ່ພົບຜູ້ຕິດເຊື້ອໃໝ່ກໍ່ຕາມ ແຕ່ເຫັນວ່າຍັງມີຄວາມສ່ຽງທີ່ຈະເກີດມີການລະບາດຕື່ມ ຫາກທຸກຄົນບໍ່ຮ່ວມແຮງ ຮ່ວມໃຈກັນປະຕິບັດມາດຕະການຢ່າງເຂັ້ມງວດ, ພ້ອມນີ້ ຄະນະສະເພາະກິດຂອງແຂວງ ໄດ້ຮຽກຮ້ອງໃຫ້ບັນດາເມືອງ ແລະນະຄອນ ຫຼວງພະບາງ ສືບຕໍ່ເຂັ້ມງວດໃນການກວດກາຄົນເຂົ້າ-ອອກເມືອງ ແນໃສ່ບໃຫ້ມີບຸກຄົນຈາກຕ່າງແຂວງ ແລະຕ່າງປະເທດ ເຂົ້າມາແຂວງຫຼວງພະບາງໂດຍບໍ່ໄດ້ຮັບອານຸຍາດ ຢ່າງເດັດຂາດ ເພື່ອຮັບປະກັນເຮັດໃຫ້ແຂວງຫຼວງພະບາງມີຄວາມປອດໄພຈາກພະຍາດໂຄວິດ 19.
ຂ່າວ: ອາພຸດເດດ ບຸບຜາ
Loading...