ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜູ້ຕິດເຊື້ອໂຄວິດ 19 ຍັງບໍ່ມີລາຍງານຜູ້ເສຍຊີວິດ ຂະນະຜູ້ຕິດເຊື້ອໄຂ້ເລືອດອອກເສຍຊີວິດແລ້ວ 9 ຄົນ

ຈໍານວນຜູ້ຕິດເຊື້ອພະຍາດໂຄວິດ19 ຢູ ສປປ ລາວ ມີທັງໝົດ 20ຄົນ ປິ່ນປົວດີແລ້ວ 19ຄົນ, ຍັງສືບຕໍ່ປິ່ນປົວຢູ່ໂຮງໝໍມິດຕະພາບ 1ຄົນ ອາການຍັງແຂງແຮງປົກກະຕິດີ ຂະນະທີ່ການລະບາດທົ່ວໂລກມີເຖິງ 18ລ້ານກວ່າຄົນ, ເພີ່ມຂຶ້ນໃນມື້ດຽວເກືອບ ສອງແສນຄົນ, ເສຍຊີວິດ 69.000ກວ່າຄົນ.
ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໃຫ້ຮູ້ໂອກາດຖະແຫລງຂ່າວ ໃນຕອນເຊົ້າວັນທີ 4 ສິງຫາ 2020, ເຖິງການເຝົ້າລະວັງ COVID-19 ຢູ່ລາວ ວ່າ: ໃນມື້ຜ່ານມາ ທົ່ວປະເທດມີຜູ້ເດີນທາງເຂົ້າມາ ມີທັງໝົດ 1,884 ຄົນ: ໃນນັ້ນຈຸດຜ່ານດ່ານລາວ-ໄທ 1,047 ຄົນ ມີແຮງງານລາວກັບມາແຕ່ໄທ 462 ຄົນ; ຈຸດຜ່ານດ່ານລາວ – ຈີນ 18 ຄົນ, ທັງໝົດ ແມ່ນຄົນຂັບລົດສົ່ງສິນຄ້າ; ຈຸດຜ່ານດ່ານລາວ – ຫວຽດນາມ 613 ຄົນ, ທັງໝົດແມ່ນຄົນຂັບລົດສົ່ງສິນຄ້າ, ຈຸດຜ່ານດ່ານ ລາວ-ກຳປູເຈຍ 6 ຄົນ, ທັງໝົດ ແມ່ນພະນັກງານການທູດຄົນລາວ; ຜ່ານສະໜາມບິນສາກົນວັດໄຕ 200 ຄົນ ໃນນັ້ນມີຄົນຈີນ 154 ຄົນ, ລາວ 5 ຄົນ ແລະ ຄົນຕ່າງປະເທດ 41 ຄົນ; ທຸກຄົນແມ່ນໄດ້ແທກອຸນຫະພູມຮ່າງກາຍ, ແລະໄດ້ເກັບຕົວຢ່າງມາກວດ ແລ້ວນຳສົ່ງໄປຫາສະຖານທີ່ ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.
ປະຈຸບັນ ທົ່ວປະເທດ ສູນຈໍາກັດບໍລິເວນທີ່ຍັງເປີດຢູ່ມີ ທັງໝົດ 52 ສູນ, ມີຜູ້ຖືກຈຳກັດບໍລິເວນຢູ່ສູນ 3,004 ຄົນ, ພ້ອມກັນນັ້ນ ໃນມື້ຜ່ານມາ ໄດ້ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດທັງໝົດ 447 ຄົນ, ໃນນັ້ນ ແຮງງານລາວມາແຕ່ໄທ 234 ຕົວຢ່າງ, ແຮງງານຈີນ 4 ຕົວຢ່າງ, ແຮງງານຫວຽດນາມ 4 ຕົວຢ່າງ , ບຸກຄົນທົ່ວໄປທີ່ບໍ່ມີອາການ 203 ຕົວຢ່າງ ແລະ ບຸກຄົນທົ່ວໄປທີ່ມີອາການ 2 ຕົວຢ່າງ; ຜົນກວດວິເຄາະທັງໝົດແມ່ນ ບໍ່ພົບເຊື້ອ ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 03 ສິງຫາ 2020 ໄດ້ເກັບຕົວຢ່າງມາກວດທັງໝົດ 28,547 ຕົວຢ່າງ, ກວດພົບເຊື້ອສະສົມ 20 ຄົນ.
ດຣ. ສີສະຫວາດ ສຸດທານີລະໄຊ ຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໃຫ້ຮູ້ສະພາບຂອງພະຍາດໄຂ້ຍຸງລາຍ ຢູ່ໃນປະເທດເຮົາວ່າມີຈໍານວນເພີ່ມຂຶ້ນໃນແຕ່ລະວັນ, ສະເພາະວັນທີ 3 ສິງຫາ 2020 ມີຜູ້ຕິດເຊື້ອທັງໝົດ 69 ກໍລະນີ, ມາຮອດປະຈຸບັນ ມີຜູ້ຕິດເຊື້ອໄຂ້ຍຸງສະສົມທັງໝົດ 4,325 ຄົນ, ຫຼາຍກວ່າໝູ່ແມ່ນ ນະຄອນຫຼວງວຽງຈັນ ມີເຖິງ 979 ຄົນ, ແຂວງວຽງຈັນ 449 ກໍລະນີ, ບໍລິຄຳໄຊ 522 ກໍລະນີ ແລະ ແຂວງອັດຕະປື 371 ກໍລະນີ. ເສຍຊີວິດ 9 ຄົນ ຄື: ນະຄອນຫຼວງ 4 ຄົນ, ບໍລິຄຳໄຊ 2 ຄົນ, ຄຳມ່ວນ 1 ຄົນ, ໄຊຍະບູລີ 1 ຄົນ ແລະ ຊຽງຂວາງ 1 ຄົນ.