ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜູ້ຕ້ອງສົງໄສຕິດເຊື້ອໄວຣັສໂຄໂຣນາໃນລາວ ໄດ້ຮັບການຢືນຢັນບໍ່ພົບເຊື້ອ

ໃນຕອນບ່າຍຂອງວັນທີ 3 ກຸມພາ 2020, ທີ່ນະຄອນຫຼວງວຽງຈັນ,  ດຣ ສີສະຫວາດ ສຸດທານີໄຊ, ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ໃຫ້ສໍາພາດຕໍ່ສື່ມວນຊົນ ກ່ຽວກັບຄວາມຄືບໜ້າຂອງການລະບາດຂອງເຊື້ອພະຍາດອັກເສບປອດທີ່ເກີດຈາກເຊື້ອ novel Corona Virus ໃນ ສປປ ຈີນ, ຊຶ່ງຮອດວັນທີ 3 ກຸມພາ 2020 ນີ້ ມີລາຍງານຜູ້ຕິດເຊື້ອທັງໝົດ ຈຳນວນ 20.438 ຄົນ, ເສຍຊີວິດແລ້ວ 425 ກໍລະນີ, ແລະ ປ່ວຍໜັກ 2.788 ຄົນ. ສ່ວນຄວາມຄືບໜ້າກ່ຽວກັບບຸກຄົນຕ້ອງສົງໄສຕິດເຊື້ອເຊື້ອພະຍາດນີ້ໃນລາວ, ດຣ ສີສະຫວາດ ສຸດທານີໄຊ ໃຫ້ຮູ້ວ່າ: ມາຮອດປະຈຸບັນນີ້, ຢູ່ປະເທດລາວ, ຕົວເລກບຸກຄົນຕ້ອງສົງໄສ ເປັນຜູ້ຕິດເຊື້ອໄວຣັສໂຄໂຣນາ ມີຢູ່ຈຳນວນ 14 ກໍລະນີ, ໃນນັ້ນ ເປັນຄົນລາວ 10 ຄົນ ແລະ ຄົນຈີນ 4 ຄົນ, ໂດຍໃນຂະນະນີ້, 13 ຄົນແມ່ນໄດ້ຖືກວິເຄາະຫາຜົນກວດເປັນທີ່ຮຽບຮ້ອຍແລ້ວ, ແຕ່ບໍ່ພົບເຊື້ອ; ສ່ວນອີກໜຶ່ງກໍລະນີທີີ່ເປັນຄົນລາວ ຕອນນີ້ແມ່ນກຳລັງລໍຖ້າຜົນກວດໃນວັນທີ 5 ມັງກອນ 2020 ນີ້.

ທ່ານຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຍັງໃຫ້ຮູ້ຕື່ມອີກວ່າ: ປັດຈຸບັນ, ກະຊວງສາທາລະນະສຸກ ຍັງຈະໄດ້ສືບຕໍ່ຕິດຕາມສະຖານະການຢ່າງໃກ້ຊິດ, ໂດຍໄດ້ກໍານົດຈຸດປະສານງານໃນການປະຕິບັດມາດຕະການປ້ອງກັນ, ກະກຽມຄວາມພ້ອມດ້ານຕ່າງໆ, ໃຫ້ຂໍ້ມູນແກ່ຜູ້ໂດຍສານຂາເຂົ້າ-ຂາອອກ, ພ້ອມທັງກະກຽມຄວາມພ້ອມໃນການຄັດກອງຜູ້ໂດຍສານທີ່ເດີນທາງມາຈາກປະເທດທີ່ມີລາຍງານການລະບາດ, ລວມທັງ ໂຮງໝໍທີ່ເປັນຕາໜ່າງເຝົ້າລະວັງເພື່ອຕິດຕາມອາການກໍລະນີສົງໃສ. ດຣ ສີສະຫວາດ ສຸດທານີລະໄຊ ຍັງໄດ້ໃຫ້ຮູ້ເຖິງວິທີປ້ອງກັນພະຍາດຮ້າຍແຮງດັ່ງກ່າວນີ້ວ່າ: ຕ້ອງຫລີກລ້ຽງເດີນທາງໄປເຂດທີ່ມີການລະບາດ ຫລື ເຂດຊຸມຊົນແອອັດ; ແຕ່ຖ້າເປັນກໍລະນີຈໍາເປັນແທ້ໆທີ່ຈະຕ້ອງໄປ ກໍ່ຂໍໃຫ້ໃສ່ຜ້າອັດປາກ, ແລະ ຫລີກລ່ຽງການສໍາຜັດໃກ້ຊິດກັບຄົນທີ່ມີອາການຄ້າຍຄືພະຍາດນີ້ ເຊັ່ນ: ເປັນໄຂ້, ໄອ, ເຈັບຄໍ, ແລະຫາຍໃຈຍາກ. ຖ້າມີອາການທີ່ກ່າວມານີ້ ກໍ່ຄວນຮີບໄປພົບແພດໝໍທີ່ຢູ່ໃກ້ບ້ານ, ແລະ ແຈ້ງປະຫວັດການເດີນທາງຂອງທ່ານໃນໄລຍະ 2-3 ອາທິດຜ່ານມາ; ຖ້າທ່ານຫາກໄດ້ເດີນທາງໄປເຂດທີ່ມີການລະບາດພະຍາດດັ່ງກ່າວ ໃນໄລຍະ 14ມື້ ກ່ອນມີອາການ, ຂໍໃຫ້ຫລີກລ່ຽງການສໍາຜັດ ຫລື ການກິນສັດປ່າ, ແລະ ໃຫ້ປະຕິບັດຢ່າງເຂັ້ມງວດຕາມຫຼັກມາລະຍາດ ໃນການໄອ-ການຈາມ ດ້ວຍການອັດປາກ ແລະ ດັງ, ການໃຊ້ຜ້າອັດປາກ, ແລະ ການລ້າງມືທຸກຄັ້ງດ້ວຍນໍ້າສະອາດ, ພ້ອມສະບູ ຫລື ນໍ້າຢາຂ້າເຊື້ອ.

ດຣ ສີສະຫວາດ ສຸດທານີໄຊ ຮອງຫົວໜ້າກົມຄວບຄຸມພະຍາດຕິດຕໍ່                Dr Mark Jacobs ຜູ້ແທນອົງການອະນາໄມໂລກປະຈໍາລາວ

ສ່ວນອົງການອະນາໄມໂລກປະຈໍາລາວຈະສຶບຕໍ່ຮ່ວມມືກັບກະຊວງສາທາລະນະສຸກຂອງລາວ ເພື່ອຕິດຕາມເຝົ້າລະວັງການແຜ່ລະບາດຂອງພະຍາດນີ້ຢ່າງຕໍ່ເນື່ອງ ໂດຍສະເພາະການບົ່ງມະຕິພະຍາດທໃຫ້ມີຄວາມວ່ອງໄວຂຶ້ນກວ່າເກົ່າ ເພື່ອປ້ອງກັນການແຜ່ລະບາດຂອງເຊື້ອພະຍາດ ແລະຈະໃຫ້ການຊ່ວຍເຫລືອລາວທຸກຮູບແບບ ໃນການປ້ອງກັນ ແລະສະກັດກັ້ນພະຍາດອັກເສບປອດສາຍພັນໃໝ່ ຫລື ໂຄໂຣນາໄວຣັສ  ພ້ອມທັງຮຽກຮ້ອງໃຫ້ທຸກຄົນໃນສັງຄົມ ເປັນເຈົ້າການຊ່ວຍກັນໃນການປ້ອງກັນພະຍາດນີ້ ຖ້າມີອາການໄຂ້, ໄອ, ເຈັບຄໍ, ຫາຍໃຈຍາກ ໃຫ້ເຂົ້າໄປພົບແພດໝໍໂດຍດ່ວນ ຫລືພົບກໍລະນີສົງໄສ ໃຫ້ໂທແຈ້ງສາຍດ່ວນຂອງກະຊວງສາທາລະນະສຸກ ໝາຍເລກ 166 ຕະຫລອດ 24ຊົ່ວໂມງ