ສະຫາຍ ບຸນທອງ ຈິດມະນີ ຜູ້ປະຈຳການຄະນະເລຂາທິການສູນກາງພັກ (ຄລສພ) ຮອງປະທານປະເທດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງຄະນະຜູ້ແທນຂັ້ນສູງໜັງສືພິມ ເຍິນເຢິນ ນໍາໂດຍ ສະຫາຍ ເລ ກວັກ ມິງ ກຳມະການສູນກາງພັກ ຫົວ ໜ້າບັນນາທິການໃຫຍ່ ໜັງສືພິມ ເຍິນເຢິນ ສຽງຂອງສູນກາງພັກ-ລັດ ແລະ ປະຊາ ຊົນ ປະທານສະມາຄົມນັກຂ່າວ ຫວຽດນາມ ຮອງຫົວໜ້າຄະນະໂຄສະນາສຶກສາ ສູນກາງພັກກອມມູນິດຫວຽເນາມ ພ້ອມຄະນະ ໃນວັນທີ 7 ມິຖຸນານີ້ ທີ່ຫ້ອງວ່າການສູນກາງພັກ ໃນໂອກາດທີ່ຄະນະດັ່ງກ່າວໄດ້ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງວັນທີ 6-10 ມິຖຸນາ ນີ້.
ໂອກາດນີ້, ສະຫາຍ ຜູ້ປະຈໍາການ ຄລສພ ໄດ້ສະແດງຄວາມຍິນດີຕ້ອນຮັບ ແລະ ດີໃຈທີ່ໄດ້ຕ້ອນຮັບ ສະຫາຍ ເລ ກວັກ ມິງ ພ້ອມຄະນະໃນຄັ້ງນີ້ ຊຶ່ງການມາຢ້ຽມຢາມ ແລະ ເຮັດວຽກຂອງ ສະຫາຍ ແລະ ຄະນະ ເປັນການຈັດຕັ້ງປະຕິບັດການພົວພັນຮ່ວມມືສອງຝ່າຍ ໂດຍສະເພາະ ພາຍຫຼັງການມອບ-ຮັບ ລະບົບເວັບໄຊໃໝ່ຂອງໜັງສືພິມປະຊາຊົນ ທີ່ໜັງສືພິມ ເຍີນເຢິນ ໃຫ້ການຊ່ວຍເຫຼືອໃຫ້ມີຄວາມທັນສະ ໄໝ, ເປັນການປະກອບສ່ວນທີ່ສໍາຄັນ ໃນການຈັດຕັ້ງຜັນຂະຫຍາຍເນຶ້ອໃນຈິດໃຈ ທີ່ການນໍາສູງສຸດຂອງສອງພັກ, ສອງລັດ ລາວ-ຫວຽດນາມ ໄດ້ເປັນເອກະພາບກັນ ເພື່ອຊຸກຍູ້ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ຂອງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມອ້າຍນ້ອງ ໃຫ້ນັບມື້ແຕກດອກອອກຜົນຍິ່ງໆຂຶ້ນ. ພ້ອມນີ້, ກໍໄດ້ຕີລາຄາສູງ ແລະ ສະແດງຄວາມຊົມເຊີຍຕໍ່ ໜັງສືພິມ ເຍີນເຢິນ ສຽງຂອງພັກ-ລັດ ແລະ ປະຊາຊົນຫວຽດນາມ ທີ່ມີບົດບາດສຳຄັນໃນການຊຸກຍູ້ ເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລາວ-ຫວຽດນາມ, ຫວຽດນາມ-ລາວ ໃຫ້ນັບມື້ເຂົ້າສູ່ລວງເລິກ ແລະ ມີປະສິດທິຜົນສູງ.
ສະຫາຍ ບຸນທອງ ຈິດມະນີ ຍັງໄດ້ຕີລາຄາສູງ ຕໍ່ຜົນສໍາເລັດການພົວພັນຮ່ວມມື ລະຫວ່າງ ໜັງສືພິມ ປະຊາຊົນ ແລະ ໜັງສືພິມ ເຍີນເຢິນ ໃນໄລຍະຜ່ານມາ ແລະ ແຜນການຮ່ວມມືໃນຕໍ່ໜ້າ ໂດຍສະເພາະແມ່ນ ໜັງສືພິມເຍີນເຢິນ ໄດ້ໃຫ້ການສະ ໜັບສະໜູນ ແລະ ຊ່ວຍເຫຼືອ ໜັງສືພິມປະຊາຊົນ ໃນການສ້າງບຸກຄະລາກອນ, ອຸປະ ກອນຮັບໃຊ້ວິຊາສະເພາະເພື່ອຕອບສະໜອງ ຄວາມຮຽກຮ້ອງຕ້ອງການຂອງສັງຄົມ ຢ່າງທັນການ ແລະ ທັນສະໄໝ. ການຢ້ຽມຢາມ ແລະ ເຮັດວຽກຢູ່ ສປປ ລາວ ຂອງສະຫາຍ ເລ ກວັກ ມິງ ພ້ອມຄະນະ ໃນຄັ້ງນີ້ ແມ່ນມີຄວາມໝາຍສໍາຄັນທີ່ສຸດ ປະ ກອບສ່ວນຊ່ວຍເຫຼືອໃນການສ້າງເວັບໄຊໃໝ່ ໃຫ້ໜັງສືພິມ ປະຊາຊົນ ມີຄວາມທັນສະໄໝ ຮັບໃຊ້ໜ້າທີ່ການເມືອງຂອງຕົນ ໂດຍສະເພາະແມ່ນໃນໄລຍະການໂຄສະນາ ໃຫ້ແກ່ການເປັນປະທານອາຊຽນຂອງ ສປປ ລາວ.
ໂອກາດດຽວກັນ, ສະຫາຍ ເລ ກວັກ ມິງ ໄດ້ສະແດງຄວາມຂອບໃຈຢ່າງຈິງໃຈ ຕໍ່ສະຫາຍ ບຸນທອງ ຈິດມະນີ ທີ່ໄດ້ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້; ພ້ອມທັງໄດ້ລາຍງານວ່າ ຄະນະໂຄສະນາສຶກສາສູນກາງພັກກອມມູນິດຫວຽດນາມ ແລະ ຄະນະໂຄສະນາອົບຮົມສູນກາງພັກປະຊາຊົນປະຕິວັດລາວ ໄດ້ມີການພົວພັນຮ່ວມມືກັນ ແລະ ໃຫ້ການຊ່ວຍເຫຼືອສະໜັບສະໜູນໜັງສືພິມປະຊາຊົນ ໂດຍສະເພາະໃນການປັບປຸງເວັບໄຊຂອງໜັງສືພິມປະຊາຊົນ ຕາມການສະເໜີ. ໜັງສືພິມປະຊາຊົນ ເປັນສື່ທີ່ມີຄວາມສຳຄັນຂອງພັກ ເປັນກະບອກສຽງຂອງສູນກາງພັກ ຊຶ່ງນັບມື້ແມ່ນມີຄວາມຈໍາເປັນທີ່ຕ້ອງໄດ້ຫັນໄປສູ່ຄວາມທັນສະໄໝ, ຫັນເປັນດີຈີຕອນ; ໃນໄລຍະຜ່ານມາ, ໜັງສືພິມເຍິນເຢິນ ກໍໄດ້ສົ່ງວິຊາການມາຊ່ວຍໜັງສືພິມປະຊາຊົນ ແລະ ໄດ້ມີພິທີມອບ-ຮັບກັນໃນມື້ນີ້; ພວກເຮົາຍິນດີທີ່ຈະສືບຕໍ່ຮ່ວມມື, ຊ່ວຍແນະນໍາ ແລະ ສ້າງພະນັກງານ-ນັກຂ່າວ ໃຫ້ໄດ້ຮັບການກໍ່ສ້າງໃນດ້ານການຂຽນບົດ, ຂຽນຂ່າວ ແລະ ດ້ານເຕັກນິກຕ່າງໆ. ສະຫາຍ ຍັງໄດ້ສະແດງຄວາມເຊື່ອໝັ້ນວ່າ ຈະພ້ອມກັນສືບຕໍ່ຮ່ວມມື ຕາມຂໍ້ຕົກລົງຂອງສອງຝ່າຍ ເພື່ອພ້ອມກັນສືບຕໍ່ເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງປະເທດ ລາວ-ຫວຽດນາມ, ເວົ້າລວມ, ເວົ້າສະເພາະ ລະຫວ່າງໜັງສືພິມເຍິນເຢິນ ແລະ ໜັງສືພິມປະຊາຊົນ.
ສະຫາຍ ຜູ້ປະຈໍາການ ຄລສພ ຍັງໄດ້ສະແດງຄວາມຂອບໃຈ ຕໍ່ພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ທີ່ຍາມໃດກໍໄດ້ໃຫ້ການຊ່ວຍເຫຼືອ ແລະ ສະໜັບສະໜູນແກ່ ສປປ ລາວ ຕະຫຼອດໄລຍະຜ່ານມາ ແລະ ໄດ້ຕາງໜ້າໃຫ້ ພັກ, ລັດ ແລະ ປະຊາຊົນລາວບັນດາເຜົ່າ ຢືນຢັນຄືນອີກຄັ້ງໜຶ່ງວ່າພັກ, ລັດຖະບານ ແລະ ປະຊາຊົນລາວບັນດາເຜົ່າ ຈະສືບຕໍ່ເຮັດສຸດຄວາມສາມາດຂອງຕົນຮ່ວມກັບພັກ, ລັດຖະບານ ແລະ ປະຊາຊົນຫວຽດນາມອ້າຍນ້ອງ ເພີ່ມພູນຄູນສ້າງສາຍພົວພັນມິດຕະພາບ ອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ໃຫ້ນັບມື້ແຕກດອກອອກຜົນຍິ່ງໆຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນ ສອງຊາດ. ພ້ອມທັງ, ອວຍພອນໃຫ້ການມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງສະຫາຍ ເລ ກວັກ ມິງ ພ້ອມດ້ວຍຄະນະ ໃນຄັ້ງນີ້ ຈົ່ງປະສົບຜົນສໍາເລັດຢ່າງຈົບງາມ.
(ຂ່າວ-ພາບ: ສຸກສະຫວັນ)
