(19.2.2021) ຜູ້ລົງສະຫມັກຮັບເລືອກຕັ້ງເປັນສະມາຊິກສະພາແຫ່ງຊາດ (ສສຊ) ຊຸດທີ IX ປະຈໍາເຂດເລຶອກຕັ້ງທີ 1 ນະຄອນຫລວງວຽງຈັນ ຈໍານວນ 6 ທ່ານ, ຍິງ 2 ທ່ານ ນໍາໂດຍ ທ່ານ ອານຸພາບ ຕຸນາລົມ, ຄະນະເລຂາທິການສູນ ກາງພັກ, ປະທານສະພາປະຊາຊົນນະຄອນຫລວງວຽງຈັນ ເຄື່ອນໄຫວພົບປະຜູ້ມີສິດປ່ອນບັດເລືອກຕັ້ງຢູ່ສູນກາງສະ ຫະພັນກໍາມະບານລາວ ໂດຍມີ ທ່ານ ນາງ ອາລີ ວົງໜໍ່ບຸນທຳ, ກຳມະການສູນກາງພັກ, ປະທານສູນກາງສະຫະພັນກຳມະບານລາວ ແລະ ພະນັກງານພາຍໃນສູນກາງສະຫະ ພັນກຳມະບານລາວ ໃຫ້ການຕ້ອນຮັບ.
ໃນໂອກາດນີ້ ຜູ້ລົງສະຫມັກຮັບເລືອກຕັ້ງ ທັງ 6 ທ່ານ ໄດ້ຜັດປ່ຽນກັນແນະນຳຕົວ ແລະ ສະເໜີຜົນງານ ກໍຄື ຜົນ ສຳເລັດໃນການເຄື່ອນໄຫວວຽກງານຂອງຕົນໄລຍະຜ່ານມາ, ລວມເຖີງສະເໜີວິໃສທັດຂອງຕົນຖ້າຫາກໄດ້ຮັບເລຶອກເປັນ ສສຊ ຊຸດທີ IX ໃຫ້ຜູ້ມີສິດປ່ອນບັດເລືອກຕັ້ງຢູ່ສູນກາງສະຫະພັນກໍາມະບານລາວໄດ້ຮັບຮູ້, ພ້ອມນີ້ ຍັງໄດ້ຍົກໃຫ້ເຫັນເຖີງຄວາມສໍາຄັນຂອງການເລືອກຕັ້ງ ສສຊ ກໍຄື ການເລືອກເອົາຕົວແທນຂອງປະຊາຊົນເຂົ້າໄປນັ່ງໃນສະພາແຫ່ງຊາດ ເພື່ອພິຈາລະນາຕົກລົງບັນຫາສໍາຄັນຂອງຊາດ ແລະ ການນຳເອົາຄໍາຄິດເຫັນ ແລະ ຄໍາສະເໜີຕ່າງໆ ຂອງປະຊາຊົນໄປສະເໜີຕໍ່ກອງປະຊຸມສະພາແຫ່ງຊາດ ເພື່ອໃຫ້ພາກສ່ວນກ່ຽວຂ້ອງຂອງລັດຖະບານຊ່ວຍແກ້ໄຂໃຫ້ດີຂຶ້ນ.
ປັດຈຸບັນ, ສູນກາງສະຫະພັນກໍາມະບານລາວ ມີສະມາ ຊິກທັງໝົດ 227.718 ຄົນ, ຍິງ 103.696 ຄົນ ເຊີ່ງລ້ວນແຕ່ເປັນຜູ້ທີ່ມີເງື່ອນໄຂປ່ອນບັດເລືອກຕັ້ງເອົາ ສສຊ ຊຸດທີ IX ແລະ ການເລືອກເອົາສະມາຊິກສະພາປະຊາຊົນຂັ້ນແຂວງ ຊຸດທີ II ທີ່ຈະຈັດຂຶ້ນໃນວັນອາທິດ ວັນທີ 21 ກຸມພາ 2021.
ຂ່າວ: ບຸນຕຽງ ຈັນທະວົງ
ພາບ: ຕາລິເຊ່ຍ
Loading...