ຜູ້ຮັບສະຫມັກເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ປະຈຳເຂດເລືອກຕັ້ງທີ 4 ແຂວງອຸດົມໄຊ ແລະ ຜູ້ລົງຮັບສະຫມັກເລືອກຕັ້ງເປັນສະມາຊິກສະພາປະຊາຊົນຂັ້ນແຂວງ ຊຸດທີ 2 ປະຈຳເມືອງນາຫມໍ້ ໄດ້ສະເໜີຕົວ ໃນຕອນເຊົ້າວັນທີ 9 ກຸມພານີ້ ທີ່ສະໂມສອນເມືອງນາຫມໍ້ ໂດຍການເຂົ້າຮ່ວມຂອງ ທ່ານ ສົມຈິດ ປັນຍາສັກ ຮອງເຈົ້າແຂວງ, ທ່ານ ປອ ວົງສະຫວັນ ໄຊຍະວົງ ກຳມະການພັກແຂວງ, ເລຂາພັກເມືອງ, ເຈົ້າເມືອງໆນາຫມໍ້, ມີຄະນະປະຈຳພັກເມືອງ, ກຳມະການພັກເມືອງ, ຫົວຫນ້າ, ຮອງຫົວຫນ້າຫ້ອງການ, ສອງກອງບັນຊາການ ປກຊ – ປກສ ແລະ ຂະແຫນງການອ້ອມຂ້າງເມືອງ.

ການສະເຫນີຕົວ ຂອງຜູ້ສະຫມັກຮັບເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ 2 ປະຈຳເຂດເລືອກຕັ້ງເມືອງນາຫມໍ້ ໃນຄັ້ງນີ້ ກໍເພື່ອປະຕິບັດຕາມ ຄໍາແນະນໍາຂອງຄະນະປະຈໍາການຄະນະກຳມະການເລືອກຕັ້ງລະດັບຊາດ ກ່ຽວກັບການໂຄສະນາຫາສຽງ ຂອງຜູ້ຮັບສະຫມັກເລືອກຕັ້ງເປັນສະມາຊິກສະພາແຫ່ງຊາດ ຊຸດທີ IX ແລະ ສະມາຊິກສະພາປະຊາຊົນ ຂັ້ນແຂວງ ຊຸດທີ II ໃຫ້ຜູ້ມີສິດປ່ອນບັດເລືອກຕັ້ງ ຮັບຮູ້, ເຂົ້າໃຈຢ່າງຖືກຕ້ອງ ຕໍ່ປະຫວັດຄວາມເປັນມາ, ຜົນງານ ແລະ ວິໄສທັດ ຂອງຜູ້ຮັບສະຫມັກເລືອກຕັ້ງ ແຕ່ລະທ່ານ ພ້ອມທັງສາມາດ ຕັດສິນໃຈ ວ່າຈະເລືອກເອົາທ່ານໃດ ມາເປັນຜູ້ຕາງຫນ້າໃຫ້ແກ່ຕົນເອງ, ຜູ້ຕາງຫນ້າປະຊາຊົນບັນດາເຜົ່າ ໃນທົ່ວແຂວງ ເພື່ອປະຕິບັດສິດ, ອຳນາດຂອງປະຊາຊົນ ຢູ່ໃນສະພາ. ຜູ້ຮັບສະຫມັກເລືອກຕັ້ງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 4 ແຂວງອຸດົມໄຊ ມີທັງຫມົດ 10 ທ່ານ, ຍິງ 2 ທ່ານ ໃນນັ້ນ ມາຈາກ ສູນກາງ 3 ທ່ານ ແລະ  ຂັ້ນແຂວງ 7 ທ່ານ ແລະ ໄດ້ຈັດແບ່ງກັນລົງເຄື່ອນໄຫວ ສະເຫນີຕົວ ຫາສຽງ ຢູ່ບັນດາເມືອງ ຕາມແຜນການທີ່ກຳນົດ ທັງຫມົດ 3 ຄະນະ.

ສະເພາະຄະນະທີ່ລົງສະເຫນີຕົວຢູ່ທີ່ເມືອງນາຫມໍ້ ແບ່ງເປັນ 2 ຄະນະ ເຊິ່ງມີຜູ້ຮັບສະຫມັກເລືອກຕັ້ງເປັນສະມາຊິກສະພາແຫ່ງຊາດ ຈຳນວນ 3 ທ່ານ ຄື: ນ້ຳເບີ 6 ທ່ານ ນິສິດ ແກ້ວປັນຍາ ຮອງເລຂາຄະນະບໍລິຫານງານພັກກະຊວງພາຍໃນ, ນ້ຳເບີ 3 ທ່ານ ນາງ ຄຳພອນ ພິມມະຈັນ ຮອງເລຂາຫນ່ວຍພັກ,ເລຂາທິການສະພາປະຊາຊົນແຂວງ ແລະ ນ້ຳເບີ 4 ທ່ານ ສົມດີ ເຕັງເບຼຍຈື ກຳມະການພັກແຂວງ, ເລຂາຄະນະບໍລິຫານງານຊາວຫນຸ່ມແຂວງ ແລະ ຜູ້ລົງຮັບສະຫມັກເລືອກຕັ້ງ ເປັນສະມາຊິກສະພາປະຊາຊົນແຂວງ ປະຈຳເຂດ ເມືອງນາຫມໍ້ ຈຳນວນ 6 ທ່ານ ມາຈາກຂັ້ນແຂວງ 2 ທ່ານ ຄື: ເບີ 1 ທ່ານ ຄຳເຜີຍ ງອນວັນຄຳ ກຳມະການປະຈຳພັກແຂວງ, ປະທານກຳມະການເສດຖະກິດແຜນການ – ການເງິນ ສະພາປະຊາຊົນແຂວງ,ເບີ 2 ທ່ານ ນາງ ບົວພອນ ແກ້ວມະນີ ຮອງເລຂາພັກເມືອງ, ປະທານກວດກາ ພັກ – ລັດ ເມືອງນາຫມໍ້, ເບີ 3 ທ່ານ ຈັນທະບູລີ ວັນທາລັກ ຮອງຫົວຫນ້າພະແນກ ແຜນການ ແລະ ການລົງທຶນ ແຂວງ, ເບີ 4 ທ່ານ ນາງ ແສງອາລຸນ ປັນຍາລໍ ເລຂາຄະນະບໍລິຫານງານຊາວຫນຸ່ມເມືອງນາຫມໍ້, ເບີ 5 ທ່ານ ບຸນເພັງ ຟາເຈັງລໍເບຼຍຈື ຮອງຫົວຫນ້າຫ້ອງການສາທາລະນະສຸກເມືອງນາຫມໍ້ ແລະ ເບີ 6 ທ່ານ ພັຕ ເພັດສະຫມອນ ໄຊອຸ່ນຄຳ ຮອງຫົວຫນ້າກອງບັນຊາການ ປ້ອງກັນຄວາມສະຫງົບເມືອງນາຫມໍ້.

ໂອກາດດັ່ງກ່າວ ຜູ້ລົງຮັບສະຫມັກເລືອກຕັ້ງ ໄດ້ຜັດປ່ຽນກັນຂຶ້ນສະເຫນີຕົວລາຍງານປະຫວັດຫຍໍ້,ການເຄື່ອນໄຫວຂອງຕົນເອງ ໃຫ້ປະຊາຊົນ ຮັບຮູ້, ເຂົ້າໃຈ ຢ່າງທົ່ວເຖິງ ກ່ຽວກັບ ຂໍ້ມູນຂອງຜູ້ສະຫມັກຮັບເລືອກຕັ້ງ ແຕ່ລະທ່ານ ຕື່ມອີກ. ຜູ້ທີ່ລົງຮັບສະຫມັກເລືອກຕັ້ງເປັນ ສສຊ ຊຸດທີ 9 ປະຈໍາເຂດເລືອກຕັ້ງທີ 4 ແຂວງອຸດົມໄຊ ມີຈຳນວນ 10 ທ່ານ ຈະເລືອກເອົາ 7 ທ່ານ ແລະ ຜູ້ລົງຮັບສະຫມັກເລືອກຕັ້ງ ເປັນ ສສຂ ຊຸດທີ2 ມີຈຳນວນ 39 ທ່ານ ເລືອກເອົາ 25 ທ່ານ ມາເປັນຕົວແທນຂອງຕົນເອງເຂົ້ານັ່ງໃນສະພາ.

  

ຂ່າວ: ຄານມະນີ ຮຽນດໍຈັນ

Loading...