ຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ 9 ປະຈຳເຂດເລືອກຕັ້ງທີ 1 ນະຄອນ ຫລວງວຽງຈັນ ຈຳນວນ 5 ທ່ານ ນໍາໂດຍ ທ່ານ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດສືບຕໍ່ເຄື່ອນໄຫວໂຄສະນາ ແລະພົບປະຜູ້ບັນດາອົງການປົກຄອງບ້ານ ແລະມີສິດເລືອກຕັ້ງອ້ອມຂ້າງເມືອງຈັນທະບູລີ ໃນຕອນເຊົ້າມື້ນີ້, ທີ່ຫ້ອງວ່າການເມືອງ ໂດຍໄດ້ຮັບການຕ້ອນຮັບຂອງທ່ານ ເພັດສະໄໝ ນັດຜາສຸກ, ຮັກສາການເຈົ້າເມືອງໆຈັນທະບູລີ.
ໃນໂອກາດນີ້ ທ່ານ ເພັດສະໄໝ ນັດຜາສຸກ ໃຫ້ຮູ້ວ່າ: ການເຄື່ອນໄຫວໂຄສະນາ ແລະພົບປະຂອງຜູ້ສະໝັກເປັນສະມາຊິກສະພາແຫ່ງຊາດຊຸດທີ 9 ຄັ້ງນີ້ ເພື່ອເຮັດໃຫ້ຜູ້ມີສິດເລືອກຕັ້ງຮັັບຮູ້ເຂົ້າໃຈກ່ຽວກັບຄວາມໝາຍສຳຄັນຂອງການເລືອກຕັ້ງ, ໂຄງປະກອບການຈັດຕັ້ງບຸກຄະລາກອນຂອງສະພາແຫ່ງຊາດ ແລະໃຫ້ຜູ້ມີສິດເລືອກຕັ້ງເຫັນໄດ້ສິດ, ໜ້າທີ່ ແລະພັນທະຂອງພົນລະເມືອງລາວ ພ້ອມກັນໄປໃຊ້ສິດປະຊາທິປະໄຕຂອງຕົນ ໃນວັນອາທິດທີ 21 ກຸມພານີ້ ຢ່າງເຕັມສ່ວນ ເລືອກເອົາຜູ້ແທນຂອງຕົນເຂົ້າໃນສະພາ ເປັນຕົວແທນແຫ່ງສິດແລະຜົນປະໂຫຍດອັນຊອບທຳຂອງປະຊາຊົນລາວບັນດາເຜົ່າ. ເມືອງຈັນທະບູລີປະກອບມີ 30 ບ້ານ, 57 ໜ່ວຍປ່ອນບັດ, ພົນລະເມືອງທັງໝົດ 64.000 ກວ່າຄົນ ຍິງ 33.000 ກວ່າຄົນ ໃນນີ້ຜູ້ມີສິດເລືອກຕັ້ງ 46.169 ຄົນ ຍິງ 24.700 ກວ່າຄົນ.
ທ່ານ ສົມໃຈ ອຸ່ນສະວົງ ນາຍບ້ານໆດົງປ່າແຫລບ ໃຫ້ສຳພາດວ່າ: ຮູ້ສຶກດີໃຈທີ່ໄດ້ມີໂອກາດພົບປະກັບບັນດາຜູ້ສະໝັກຮັບເລືອກຕັ້ງໃນຄັ້ງນີ້ ເພື່ອເປັນຂໍ້ມູນນໍາໄປເຜີຍແຜ່ໃຫ້ປະຊາຊົນພາຍໃນບ້ານໄດ້ຮັບຮູ້ ແລະເລືອກໄດ້ຜູ້ແທນທີ່ມີຄວາມຮູ້ຄວາມສາມາດທີ່ສຸດ ຊື່ງມາຮອດປະຈຸບັນບ້ານດົງປ່າແຫລບເປັນ 1 ໃນຈຳນວນ 30 ບ້ານຂອງເມືອງຈັນທະບູລີມີຄວາມພ້ອມແລ້ວສຳລັບການເລືອກຕັ້ງໃນຄັ້ງນີ້.
ເຂດເລືອກຕັ້ງທີ່ 1 ນະຄອນຫລວງວຽງຈັນມີຜູ້ສະໝັກຮັບເລືອກຕັ້ງເປັນສະມາຊິກສະພາແຫ່ງຊາດຊຸດທີ 9 ຈຳນວນ 23 ທ່ານ ຍິງ 6 ທ່ານ ເລືອກເອົາ 18 ທ່ານ, ສ່ວນຜູ້ສະໝັກເປັນສະມາຊິກສະພາປະຊາຊົນນະຄອນຫລວງວຽງຈັນມີ 49 ທ່ານ ຍິງ 12 ທ່ານ ເລືອກເອົາ 31 ທ່ານ, ສະເພາະເມືອງຈັນ ທະບູລີມີຜູ້ສະໝັກ 6 ທ່ານ ຍິງ 1 ທ່ານ ເລືອກເອົາ 4 ທ່ານ.
 
Cr: ຈັນທະສອນ ສີຫານາດ
Loading...