ໃນຕອນບ່າຍວັນທີ 9 ກຸມພາ 2021 ນີ້,ຜູ້ສະໝັກ ສະມາຊິກສະພາແຫ່ງຊາດ (ສສຊ )ເຂດເລືອກຕັ້ງທີ 15 ແຂວງຈໍາປາສັກ, ຈໍານວນ 20 ທ່ານ ຊຶ່ງນໍາໂດຍ ທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຜູ້ສະໝັກ ສສຊ ນໍ້າເບີ 1 ຫົວໜ້າຄະນະ ແລະ ທ່ານ ສາຍທອງ ໄຊຍະວົງ ຮອງເລຂາພັກແຂວງ,ຜູ້ສະໝັກ ສສຊ ນໍ້າເບີ 2 ຮອງຫົວໜ້າຄະນະ ແລະ ຜູ້ສະໝັກຮັບເລືອກຕັ້ງສະມາຊິກສະພາປະຊາຊົນແຂວງ(ສສຂ) ຊຸດທີ 2 ປະຈໍາເຂດເລືອກຕັ້ງນະຄອນປາກເຊ ຈໍານວນ 6 ທ່ານ , ນໍາໂດຍທ່ານ ຄໍາມ່ວນ ພິລາພອນເດດ ກໍາມະການພັກແຂວງ ຜູ້ສະໝັກຮັບເລືອກຕັ້ງນໍ້າເບີ 1 ຫົວໜ້າຄະນະ ໄດ້ເຄື່ອນໄຫວພົບປະຜູ້ມີສິດປ່ອນບັດເລືອກຕັ້ງທີ່ກອງບັນຊາການ ປກສ ແຂວງຈໍາປາສັກ ໂດຍໃຫ້ກຽດຕ້ອນຮັບຂອງທ່ານ ພັນເອກ ຖາວອນ ບຸນກອງພິມ ຄະນະປະຈໍາພັກແຂວງ ຫົວໜ້າກອງບັນຊາການ ປກສ ແຂວງ ພ້ອມດ້ວຍຄະນະພັກ-ຄະນະບັນຊາ,ນາຍ ແລະ ພົນຕໍາຫຼວດກໍໃຫ້ການຕ້ອນຮັບຢ່າງຫຼວງຫຼາຍ.
ການເຄື່ອນໄຫວພົບປະຜູ້ມີສິດປ່ອນບັດເລືອກຕັ້ງຂອງຜູ້ສະໝັກຮັບເລືອກຕັ້ງ ສສຊ ແລະ ສສຂ ໃນຄັ້ງນີ້,ໄດ້ເປີດໂອກາດໃຫ້ຜູ້ມີສິດປ່ອນບັດຮັບຮູ້ໂສມໜ້າ,ທ່າທາງ ,ບຸກຄະລິກກະພາບ ຂອງແຕ່ລະທ່ານທີ່ຜ່ານຈາກການສະເໜີຕົວ ແລະນໍາສະເໜີ ຜົນງານການເຄື່ອນໄຫວໂດຍຫຍໍ້ຂອງຕົນໃຫ້ຜູ້ມີສິດປ່ອນບັດເລືອກຕັ້ງໄດ້ຮັບຊາບ.ຮັບຮູ້ ແລະ ເຂົ້າໃຈຕໍ່ພາລະບົດບາດ,ໜ້າທີ່ ແລະຄວາມສໍາຄັນຂອງສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ,ຈາກຮັບຮູ້ເຂົ້າໃຈແລ້ວກໍຕ້ອງປະກອບສ່ວນເປັນເຈົ້າການໃນການໄປໃຊ້ສິດເລືອກຕັ້ງເອົາຜູ້ແທນປະຊາຊົນທີ່ຕົນເອງມັກ ໃຫ້ຖືກຕ້ອງ ແນໃສ່ໃຫ້ການປ່ອນບັດເລືອກຕັ້ງຄັ້ງນີ້ມີຜົນສໍາເລັດຕາມລະດັບຄາດໝາຍ 300% ຄື: ຮັກສາໄດ້ຄວາມສະຫງົບໃນບັ້ນເລືອກຕັ້ງໃຫ້ໄດ້ 100%,ຜູ້ມີສິດປ່ອນບັດໄປປ່ອນບັດ 100% ແລະຮັບປະກັນຄວາມຖືກຕ້ອງໃນການປ່ອນບັດ(ບໍ່ໃຫ້ມີບັດຕາຍ)100%
ໂອກາດພົບປະ ຜູ້ສະໝັກຮັບເລືອກຕັ້ງແຕ່ລະທ່ານຍັງໄດ້ໂຄສະນາຫາສຽງ,ທໍາຄວາມຮູຈັກຮັກແພງກັບຜູ້ມີສິດປ່ອນບັດ ພ້ອມທັງປະຕິຍານວ່າ:ຖ້າຕົນເອງໄດ້ຮັບຄວາມໄວ້ວາງໃຈໄດ້ຮັບການເລືອກຕັ້ງເປັນ ສສຊ ແລະ ສສຂ ແລ້ວ ກໍຈະສືບຕໍ່ຕັ້ງໜ້າເຮັດໜ້າເປັນຕົວແທນແຫ່ງສິດຜົນປະໂຫຍດຂອງປະຊາຊົນຢ່າງສຸດຄວາມສາມາດ ເພື່ອພັດທະນາປະເທດຊາດ ກໍຄືຊີວິດການເປັນຢູ່ຂອງປະຊາຊົນໃຫ້ນັບມື້ດີຂື້ນເລື້ອຍໆ.
   
ເກດສະໜາ ແກ້ວສຸວັນນະແສງ
Loading...