ຕອນເຊົ້າວັນທີ 14 ກຸມພາ 2021, ຜູ້ສະໝັກຮັບເລືອກຕັ້ງ ສະມາຊິກສະພາແຫ່ງຊາດ (ສສຊ) ຊຸດທີ IX ເຂດເລືອກຕັ້ງທີ 15 ແຂວງຈໍາປາສັກ (ຄະນະທີ 1 ຈໍານວນ 10 ທ່ານ ) ເຊິ່ງນໍາໂດຍ ທ່ານ ສົມມາດ ພົລເສນາ ກໍາມະການສູນກາງພັກ, ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ຜູ້ສະໝັກ ສສຊ ເບີ 1 ແລະ ທ່ານ ແກ້ວລັດຕະນະ ສີຫາວົງ ຄະນະປະຈໍາພັກແຂວງ, ຫົວໜ້າອົງການໄອຍະການປະຊາຊົນແຂວງຈໍາປາສັກ, ຜູ້ສະໝັກ ສສຊ ເບີ 7, ພ້ອມດ້ວຍຜູ້ສະໝັກຮັບເລືອກຕັ້ງສະມາຊິກສະພາປະຊາຊົນແຂວງ (ສສຂ) ຊຸດທີ II ປະຈໍາເຂດເລືອກຕັ້ງເມືອງຊະນະສົມບູນ ຈໍານວນ 5 ທ່ານ ເຊິ່ງນໍາໂດຍ ທ່ານ ນາງ ພູໄພທອງ ພິມມະວົງສາ ຮອງເລຂາພັກເມືອງ, ປະທານກວດກາພັກ-ລັດເມືອງ,ຜູ້ສະໝັກ ເບີ 1,ໄດ້ເຄື່ອນໄຫວໂຄສະນາຫາສຽງ ແລະ ພົບປະຜູ້ມີສິດປ່ອນບັດເລືອກຕັ້ງ ທີ່ບ້ານງົວແດງເມືອງຊະນະສົມບູນ ແຂວງຈໍາປາສັກ.
ໂດຍການໃຫ້ກຽດເຂົ້າຮ່ວມຕ້ອນຮັບຂອງ ທ່ານ ຂາວພອນ ສີຍາທະຈັນ ຮອງເລຂາພັກເມືອງ,ຮອງປະທານຄະນະກໍາມະການເລືອກຕັ້ງຂັ້ນເມືອງ.ມີປະຄະນະກຸ່ມ, ມີເລຂາພັກບ້ານ, ນາຍບ້ານ, ອໍານາດການປົກຄອງພາຍໃນບ້ານ ພ້ອມດ້ວຍປະຊາຊົນຜູ້ມີສິດປ່ອນບັດເລືອກຕັ້ງໃຫ້ການຕ້ອນຮັບດ້ວຍຄວາມອົບອຸ່ນ.
ການເຄື່ອນໄຫວພົບປະຜູ້ມີສິດປ່ອນບັດເລືອກຕັ້ງ ຂອງຜູ້ສະໝັກຮັບເລືອກຕັ້ງ ສສຊ ແລະ ສສຂ ຄັ້ງນີ້ ກໍເພື່ອເຮັດໃຫ້ຜູ້ມີສິດເລືອກຕັ້ງໄດ້ຮູ້, ໄດ້ເຫັນຜູ້ສະໝັກຮັບເລືອກຕັ້ງ ແລະ ກໍາໄດ້ຊີວະປະຫວັດການເຄື່ອນໄຫວວຽກງານຂອງຜູ້ສະໝັກຮັບເລືອກຕັ້ງ ເພື່ອເປັນບ່ອນອີງໃນການເລືອກຕັ້ງເອົາຜູ້ສະໝັກຮັບເລືອກຕັ້ງເປັນ ສສຊ ຊຸດທີ IX ແລະ ສສຂ ຊຸດທີ II.
ໂອກາດພົບປະ ຜູ້ມີສິດປ່ອນບັດໃນຄັ້ງນີ້ ຍັງໄດ້ຮັບຟັງການລາຍງານສະພາບຈຸດພິເສດ,ທີ່ຕັ້ງ ແລະສະພາບການພັດທະນາເສດຖະກິດ-ສັງຄົມຢູ່ບ້ານໃຫຍ່ ພັດທະນາງົວແດງໃນໄລຍະທີ່ຜ່ານມາ ແລະການກະກຽມໃຫ້ແກ່ການເລືອກຕັ້ງພາຍໃນບ້ານ ເຊິ່ງເຫັນວ່າບ້ານງົວແດງມີລະບົບການຈັດຕັ້ງທີ່ແໜ້ນໜາເປັນລະບົບຄົບຊຸດ,ປະຊາຊົນມີມູນເຊື້ອຄວາມສາມັກຄີປອງດອງ ຊ່ວຍເຫຼືອ ຮັກແພງເຊິ່ງກັນແລະກັນ ຕະຫຼອດມາ ເຮັດໃຫ້ບ້ານມີຄວາມສະຫງົບໂດຍພື້ນຖານ ແລະກະກຽມໃຫ່ແກ່ການເລືອກຕັ້ງຢ່າງຮອບດ້ານ.
ໃນພິທີໄດ້ຜ່ານຊີວະປະຫວັດຫຍໍ້ຂອງ ຜູ້ສະໝັກຮັບເລືອກຕັ້ງແຕ່ລະທ່ານ,ຟັງຄໍາສະເໜີຕົວ ແລະທັກາຍປະຊາຊົນ ພ້ອມຄໍາປະຕິຍານວ່າ:ຖ້າຕົນເອງໄດ້ຮັບຄວາມໄວ້ວາງໃຈໄດ້ຮັບການເລືອກຕັ້ງເປັນ ສສຊ ແລະ ສສຂ ແລ້ວ ກໍຈະສືບຕໍ່ຕັ້ງໜ້າເຮັດໜ້າທີ່ເປັນຕົວແທນແຫ່ງສິດຜົນປະໂຫຍດຂອງປະຊາຊົນ ແລະ ປະເທດຊາດຢ່າງແທ້ຈິງ.
ພາຍຫຼັງໄດ້ມການພົບປະປະຊາຊົນຜູ້ມີສິດປ່ອນບັດເລືອກຕັ້ງຢູ່ບ້ານງົວແດງແລ້ວ ໃນຕອນບ່າຍຜູ້ສະໝັກ ສສຊ ເຂດເລືອກຕັ້ງທີ 15 ຍັງໄດ້ສົມທົບກັບຜູ້ສະໝັກ ສສຂ ເມືອງຊະນະສົມບູນ ໄດ້ພົບປະ ແລະໂຄສະນາຫາສຽງຢູ່ບ້ານໃຫຍ່ພັດທະນາຫ້ວຍຍາງອີກດ້ວຍ.
ຂ່າວ,ພາບ. ເກດສະໜາ ແກ້ວສຸວັນນະແສງ
Loading...