ວັນທີ່ 14 ມິຖຸນາ 2024 ນີ້ ອົງການກາແດງແຂວງຫຼວງພະບາງ ຮ່ວມກັບ ບັນດານັກທຸລະກິດ ແລະໂຮງໝໍເພື່ອນລາວສຳລັບເດັກ ໄດ້ຈັດຂະບວນການປຸກລະດົມການບໍລິຈາກເລືອດແບບເປີດກວ້າງ ຢູ່ໂຮງແຮມ ອາວານີ ເພື່ອສະເຫຼີມສະຫຼອງ ວັນຜູ້ບໍລິຈາກເລືອດໂລກ ວັນທີ່ 14 ມິຖຸນາ 2024 ຄົບຮອບ 20 ປີ, ມີ ທ່ານ ບຸນເລື່ອມ ຮອງເຈົ້າແຂວງຫຼວງພະບາງ ພ້ອມດ້ວຍອາສາສະໝັກກາແດງ, ຜູ້ສະໝັກໃຈບໍລິຈາກເລືອດ ແລະພະນັກງານແພດເຂົ້າຮ່ວມ.
ທ່ານ ວຽງສະຫວັນ ກະເສີມສຸກ ຫົວໜ້າອົງການກາແດງລາວແຂວງຫຼວງພະບາງ ໄດ້ຜ່ານປະຫວັດຄວາມເປັນມາຂອງວັນຜູ້ບໍລິຈາກເລືອດໂລກ ທັງຍົກໃຫ້ເຫັນຜົນ ສຳເລັດ ຂອງການຈັດຕັ້ງຂະບວນການ ປຸກລະດົມການບໍລິຈາກເລືອດໃນໄລຍະຜ່ານມາ ສະເພາະປີ 2023, ສູນເລືອດ ໄດ້ຮັບບໍລິຈາກເລືອດໄດ້ຫຼາຍກວ່າ 153 ຄັ້ງ ແລະມີຜູ້ເຂົ້າຮ່ວມຂະບວນປຸກລະດົມການບໍລິຈາກເລືອດ 7,858 ເທື່ອຄົນ ແລະໄດ້ຮັບເລືອດຕົວຈິງ 5,491 ຖົງ ລື່ນຄາດໝາຍ ຂອງແຜນການ 200 ກວ່າຖົງ, ສາມາດຕອບສະຫນອງເລືອດ ແລະສ່ວນປະກອບຂອງເລືອດໄດ້ 6,011 ຖົງ, ມີຄົນເຈັບຫລາຍກວ່າ 6,900 ຄົນ ໄດ້ຮັບການໃສ່ເລືອດ ແລະ ຫລາຍຊີວິດໄດ້ຮັບການຊ່ວຍ ເຫລືອ, ມາຮອດປີ 2024 ນີ້, ສະພາປະຊາຊົນແຂວງ ໄດ້ມີມະຕິຕົກລົງຮັບຮອງເອົາແຜນການຄາດຫມາຍສູ້ຊົນ ໃນການປຸກລະດົມຮັບບໍລິຈາກເລືອດໃນທົ່ວປະເທດ ເຊີ່ງຕ້ອງໃຫ້ບັນລຸ 5,300 ຖົງ, ມາຮອດປະຈຸບັນ ສາມາດຂົນຂວາຍການບໍລິຈາກເລືອດແລ້ວ ຈໍານວນ 2,125 ຖົງ ເທົ່າກັບ 40,09% ຂອງແຜນປີ.
ໃນໂອກາດນີ້ ທ່ານ ບຸນເລື່ອມ ມະນີວົງ ໄດ້ມີຄຳເຫັນຮຽກຮ້ອງໃຫ້ທຸກຄົນໃນທົ່ວສັງຄົມ ພ້ອມກັນສະໝັກໃຈເຂົ້າຮ່ວມຂະບວນການບໍລິຈາກເລືອດ ຕາມຄຳຂວັນຂອງວັນຜູ້ບໍລິຈາກເລືອດໂລກປີ 2024 ນີ້ແມ່ນ: “20 ປີແຫ່ງການສະເຫຼີມສະຫຼອງການໃຫ້: ໃຫ້ເລືອດ ໃຫ້ຊີວິດ, ຂອບໃຈຜູ້ບໍລິຈາກເລືອດ ທຸກໆທ່ານ! 14 ມິຖຸນາ 2024” ເພື່ອເຮັດໃຫ້ຄົນເຈັບທີ່ຕ້ອງການຊົມໃຊ້ເລືອດ ໄດ້ຮັບເລືອດເຂົ້າໃນການປີ່ນປົວຮ່າງກາຍໃຫ້ມີຊີວິດຄືກັບຄົນປົກກະຕິໃນສັງຄົມ. ໃນພິທີຄັ້ງນີ້ ຜູ້ເຂົ້າຮ່ວມໄດ້ຮັບຟັງການການປະກອບຄຳເຫັນຈາກ ຜູ້ສະໝັກໃຈບໍລິຈາກເລືອດປົກກະຕິ ແລະຜູ້ຊົມໃຊ້ເລືອດປະຈຳ ພ້ອມທັງຮ່ວມບໍລິຈາກເລືອດຢ່າງເປັນຂະບວນ ເບີກບານມ່ວນຊື່ນ, ໄດ້ຮັບເລືອດທັງໝົດ 290 ຖົງ.
