ທ່ານ ວົງສະກຸນ ຍິ່ງຍົງ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 17 ພຶດສະພາ 2024 ວ່າ: ໃນໄລຍະຜ່ານມາລັດວິສາຫະກິດໄຟຟ້າລາວ ໄດ້ລົງທຶນຢ່າງມະຫາສານໃສ່ວຽກງານການກໍ່ສ້າງລະບົບສາຍສົ່ງ-ສະຖານີໄຟຟ້າແຮງສູງ ແລະແຫຼ່ງຜະລິດໄຟຟ້າຈໍານວນໜຶ່ງ ເພື່ອຮັບໃຊ້ການສະ ໜອງໄຟຟ້າພາຍໃນໃຫ້ພຽງພໍ ຕາມແນວມາງນະໂຍບາຍຂອງລັດຖະບານວາງອອກແຕ່ລະໄລຍະ. ສ່ວນວ່າລະ ບົບຈໍາໜ່າຍໄຟຟ້າທົ່ວປະເທດ ແມ່ນຍັງບໍ່ທັນມີການສຸມໃສ່ການລົງທຶນພັດທະນາເປັນໂຄງການພໍປານໃດ ມີແຕ່ນໍາໃຊ້ງົບປະມານບໍລິຫານປະຈໍາປີຂອງໄຟຟ້າລາວ ເຂົ້າໃນການບຳລຸງຮັກສາ ແລະ ສ້ອມແປງ, ປ່ຽນຖ່າຍບາງອຸປະກອນຈໍານວນໜຶ່ງເທົ່ານັ້ນ; ນອກນັ້ນສະພາບລະບົບຕາຂ່າຍໄຟຟ້າໃນຂອບເຂດທົ່ວປະເທດ ມີຄວາມຍາວໄກ (ເກີນມາດຕະຖານກຳນົດ) ລະບົບເກົ່າແກ່ ເຊື່ອມໂຊມ, ເປ່ເພຕາມອາຍຸການໃຊ້ງານ. ຖ້າອີງໃສ່ມາດຕະ ຖານສາກົນກຳນົດລວງຍາວຕາຂ່າຍ 22 ກວ ທີ່ເຊື່ອມຕໍ່ອອກຈາກສະຖານີແຕ່ລະຈຸດ ແມ່ນບໍ່ເກີນ 22 ກິໂລ ແມັດ ແຕ່ກົງກັນຂ້າມລະບົບຕາຂ່າຍຂອງ ຟຟລ ໃນຂອບເຂດທົ່ວປະເທດຫຼາຍຈຸດມີລວງຍາວສະເລ່ຍຫຼາຍກວ່າ 100 ກິໂລແມັດ ຈຶ່ງເຮັດໃຫ້ບໍ່ມີຄວາມສະຖຽນລະພາບ ແລະ ເວລາເກີດເຫດການໄຟຕົກ-ໄຟມອດ ແມ່ນໃຊ້ເວ ລາດົນໃນການແກ້ໄຂສ້ອມແປງ.
ມາຮອດປັດຈຸບັນອີງໃສ່ສະພາບການຂະຫຍາຍຕົວເສດຖະກິດ-ສັງຄົມແມ່ນມີການພັດທະນາຢ່າງກ້າວກະ ໂດດເຊິ່ງສະແດງອອກສະຖິຕິການຊົມໃຊ້ໄຟຟ້າເພີ່ມຂຶ້ນໃນແຕ່ລະປີ ໂດຍສະເພາະປີນີ້ເພີ້ມຂຶ້ນແບບກ້າວກະໂດດທົ່ວປະເທດ (ສະເພາະນະຄອນຫຼວງວຽງຈັນເພີ້ມຂຶ້ນປະມານ 28%), ເນື່ອງຈາກສະພາບການຂອງໂລກຮ້ອນຜິດປົກກະຕິ, ບວກກັບສະພາບການລາຄານໍ້າມັນເຊື້ອໄຟມີການເໜັງຕີງບໍ່ປົກກະຕິ (ລາຄາສູງ) ເຮັດໃຫ້ປະຊາຊົນຫັນມາຊົມໃຊ້ລົດໄຟຟ້າປ່ຽນແທນລົດທີ່ນໍາໃຊ້ນໍ້າມັນຕາມແນວທາງຂອງລັດຖະບານວາງອອກມີທ່າອ່ຽງເພີ່ມຂຶ້ນໃນແຕ່ລະປີຈາກສະຖິຕິການນໍາເຂົ້າລົດໄຟຟ້າແຕ່ປີ 2019- 2023 ມີທັງໝົດ 3.220 ຄັນແລະຄາດຄະເນຈະເພີ່ມຂຶ້ນເປັນ500.000 ກວ່າຄັນໃນປີ2030 (ຕາມຂໍ້ມູນຈາກກົມສົ່ງເສີມແລະປະຢັດພະລັງ ງານ).
ໃນຊ່ວງມີການຊົມໃຊ້ໄຟຟ້າຫຼາຍຈະເຮັດໃຫ້ລະບົບຈຳໜ່າຍຈຸດບໍລິເວນນັ້ນ ແລະ ເຂດໃກ້ຄຽງ ເກີດມີບັນ ຫາແຮງດັນຕົກ ຫຼື ໄຟຟ້າບໍ່ພໍໃຊ້ ເຊິ່ງເປັນສິ່ງທ້າທາຍໜຶ່ງຕໍ່ກັບລະບົບຈຳໜ່າຍໄຟຟ້າຂອງໄຟຟ້າລາວ ກໍລະນີການເພີ່ມຂຶ້ນຂອງ ເຄື່ອງປັບອາກາດ ແລະ ການນໍາໃຊ້ເຄື່ອງສາກໃນເວລາດຽວກັນ ຈະສົ່ງຜົນກະທົບຕໍ່ລະບົບຈຳໜ່າຍພາກທີ່ຢູ່ອາໄສ ຖ້າຫາກການສາກລົດໄຟຟ້າ EV ຈໍານວນຫຼາຍ ຈະເຮັດໃຫ້ການຊົມໃຊ້ກຳລັງໝໍ້ແປງເຕັມ ຫຼື ເກີນກຳລັງທີ່ຈະຈ່າຍໄຟໃຫ້ໄດ້ ເຮັດໃຫ້ເກີດມີກະແສໄຟຟ້າລັດວົງຈອນ (Over Load), ຄຽງຄູ່ກັນນັ້ນ ບັນຫາການຕິດຕັ້ງສາຍເກາະຫ້ອຍໂທລະຄົມ ແລະ ບັນດາອຸປະກອນສື່ສານຕ່າງໆ ທີ່ເກາະຫ້ອຍໃສ່ເສົາຕາຂ່າຍໄຟຟ້າເປັນຈໍານວນຫຼາຍ, ບໍ່ເປັນໄປຕາມມາດຕະຖານ. (ມີສາຍເກາະຫ້ອຍຈໍານວນຫຼາຍທີ່ບໍ່ໄດ້ນໍາໃຊ້ ແຕ່ບໍ່ໄດ້ຮັບການຮື້ຖອນ) ສ່ຽງຕໍ່ເສົາຫັກ-ເສົາລົ້ມ ມີຄວາມສ່ຽງຕໍ່ເຫດອັກຄີໄພຕ່າງໆເກີດຂື້ນ ດັ່ງທີ່ພົບເຫັນໃນໄລຍະຜ່ານມາ. ນອກຈາກນີ້, ເກີດຈາກປັດໄຈພາຍນອກ ໂດຍສະເພາະ ບັນຫາໄພທຳມະຊາດ, ພາຍຸລົມແຮງ ທີ່ກະ ທົບພັດເອົາວັດຖຸ ແລະ ສິ່ງປຸກສ້າງຕ່າງໆ ໄປພາດສາຍໃສ່ໄຟຫຼາຍຈຸດ ກໍ່ເປັນເຫດເຮັດໃຫ້ລະບົບໄຟຟ້າໄດ້ຮັບຄວາມເສຍຫາຍ ເປ່ເພ. ນອກຈາກນັ້ນ ອຸປະຕິເຫດທີ່ເກີດຈາກລົດຕຳເສົາໄຟ ຕົ້ນໄມ້ລົ້ມຫັກທັບສາຍໄຟ, ເສົາໄຟລົ້ມ, ສາຍໄຟຂາດ, ໝໍ້ແປງໄຟຟ້າລະເບີດ ເຊິ່ງສະຖິຕິໄຟດັບ-ໄຟມອດພາກລະບົບຈໍາໜ່າຍ, ສະເພາະໃນນະ ຄອນຫຼວງວຽງຈັນ ເດືອນ 1-4/2024 ປະມານ 373 ຄັ້ງ ເຫັນວ່າຫຼາຍພໍສົມຄວນ ແລະ ເປັນສະຖິຕິໃໝ່ທີ່ເກີດຂຶ້ນ ເຊິ່ງລະບົບໄຟຟ້າຂອງພວກເຮົາບໍ່ເຄີຍມີມາກ່ອນ.
– ຕໍ່ກັບບັນຫາເວລາເກີດມີໄຟຕົກ-ໄຟມອດການແກ້ໄຂບັນຫາຈຶ່ງໃຊ້ເວລາດົນ ຜູ້ອໍານວຍການໃຫ່ຍລັດວິສາຫະກິດໄຟຟ້າລາວຊີ້ແຈງວ່າ:
ເຫດການໄຟຕົກ-ໄຟມອດ ແມ່ນມີຫຼາຍສາເຫດ ທັງໃນໂຕ ແລະນອກໂຕ. ຖ້າເຫດການໄຟຕົກ-ໄຟມອດເກີດຈາກລະບົບພາຍໃນຂອງໄຟຟ້າລາວ ບໍ່ວ່າຈະເປັນການມອດໄຟສຸກເສີນ, ບຳລຸງຮັກສາ, ສ້ອມແປງ, ປ່ຽນຖ່າຍອຸປະກອນ, ມອດໄຟໃຫ້ບັນດາບໍລິສັດ ຜູ້ ປະກອບການກໍ່ສ້າງ ແລະ ຕິດຕັ້ງໄຟຟ້າ ເພື່ອຂະຫຍາຍການຊົມໃຊ້ໄຟຟ້າໃຫ້ກັບລູກຄ້າ ໃນກໍລະນີນີ້ ຟຟລ ຈະມີແຈ້ງການເປັນທາງການ ໂດຍຜ່ານສື່ອອນລາຍ ຫຼື ສ່ອງທາງແອັບ ພິເຄຊັນ, Facebook Page EDL LAO ຂອງ ຟຟລ ເພື່ອໃຫ້ລູກຄ້າໄດ້ຮັບຊາບຢ່າງທົ່ວເຖິງ ແລະ ແຜນ ການມອດໄຟຈະມີກຳນົດເວລາຢ່າງຊັດເຈນ ໃນການມອດໄຟແຕ່ລະຄັ້ງ.
ໃນກໍລະນີເກີດຈາກ ປັດໃຈພາຍນອກກະທົບໃສ່ລະບົບຂອງໄຟຟ້າລາວ ໂດຍສະເພາະເຫດການໄພພິບັດ ທາງ ທຳມະຊາດ ເຊັ່ນ: ພາຍຸ, ລົມແຮງ, ຝົນຕົກ, ຟ້າຜ່າ, ນໍ້າຖ້ວມ, ຕົ້ນໄມ້ຫັກລົ້ມທັບສາຍໄຟ, ສາຍໄຟຂາດ ຕໍ່ກັບບັນຫາເຫຼົ່າ ນີ້ ໄຟຟ້າລາວບໍ່ສາມາດຫຼີກລ່ຽງໄດ້ ທຸກບັນຫາທີ່ເກີດຂື້ນ ແມ່ນສ້າງຄວາມເສຍຫາຍ, ຜົນກະທົບຕໍ່ກັບໄຟຟ້າລາວ ແລະ ຜູ້ຊົມໃຊ້ໄຟຟ້າ. ການແກ້ໄຂບັນຫາດັ່ງກ່າວ ໃນໄລຍະຜ່ານມາ ໄຟຟ້າລາວໄດ້ສຸມໃສ່ທຸກເຫື່ອແຮງ ໃນການລະດົມ ພະນັກງງານພາຍໃນສາຂາ ຫຼື ສູນບໍລິການທີ່ໃກ້ຄຽງ ເພື່ອມາຊ່ວຍແກ້ໄຂເລັ່ງສ້ອມ ແປງລະບົບໄຟຟ້າໃຫ້ສາມາດກັບມາສະໜອງໄຟໃຫ້ກັບສັງຄົມໄດ້ເປັນປົກກະຕິໂດຍໄວ.
ຕໍ່ກັບກັບສະພາບການດັ່ງກ່າວໃນໄລຍະຜ່ານມາ ຟຟລ ໄດ້ມີການຄົ້ນຄວ້າຫຼາກຫຼາຍແນວທາງແກ້ໄຂລວມທັງໄດ້ມີການແລກປ່ຽນບົດຮຽນກັບປະເທດເພື່ອນບ້ານ ທີ່ມີປະສົບການ ແລະ ມີຜົນສໍາເລັດ ໃນການບໍລິຫານຈັດການລະບົບຈຳໜ່າຍ ຢ່າງມີປະສິດທິຜົນ ເພື່ອຍົກສູງຂີດຄວາມສາມາດໃນການດໍາເນີນວຽກງານຄຸ້ມຄອງລະບົບຈຳໜ່າຍ ຂອງໄຟຟ້າລາວ ໃຫ້ມີຄວາມຮັບປະກັນໃນການສະໜອງໄຟໃຫ້ກັບສັງຄົມ. ປັດຈຸບັນ ຟຟລ ໄດ້ສຸມໃສ່ວຽງານການບຳລຸງຮັກສາ, ປ່ຽນຖ່າຍອຸປະກອນເກົ່າແກ່, ເສີມກຳລັງໝໍ້ແປງ, ປ່ຽນສາຍຂະໜາດນ້ອຍເປັນສາຍຂະໜາດໃຫຍ່ ເພື່ອຍົກສູງການບໍລິການສະໜອງໄຟໃຫ້ກັບສັງຄົມ ທີ່ມີຄຸນນະພາບ ແລະ ພຽງພໍ ໃນແຕ່ລະໄລຍະເຊັ່ນ :
1) ສຸມໃສ່ວຽກງານການປັບປຸງລະບົບຈຳໜ່າຍໃນຂອບເຂດທົ່ວປະເທດໂດຍສະເພາະນະຄອນຫຼວງວຽງຈັນໃຫ້ມີຄວາມຮັບປະກັນສູງຂຶ້ນ ເພື່ອຫຼຸດຜ່ອນບັນຫາແຮງດັນຕົກ (ໄຟບໍ່ພໍ) ໂດຍແນໃສ່ການປັບປຸງປ່ຽນສາຍຈາກສາຍຂະໜາດນ້ອຍ ເປັນ ສາຍຂະໜາດໃຫຍ່, ເສີມໝໍ້ແປງໄຟຟ້າ ເພື່ອໃຫ້ແທດເໝາະກັບສະພາບຂອງການຊົມໃຊ້ໄຟຟ້າຕົວຈິງ ໃນແຕ່ລະເຂດ ເຊິ່ງໃນປີ 2023 ຜ່ານມາໄດ້ສໍາເລັດການເສີມໝໍ້ແປງໄຟຟ້າ ລວມຈຳນວນທັງໝົດ 993 ໜ່ວຍ,ລວມກຳລັງຕິດຕັ້ງໝໍ້ແປງໄຟຟ້າ ເພີ່ມຂຶ້ນທັງໝົດ 43.359 kVA ເພີ່ມຂຶ້ນຫຼາຍກວ່າ 50% ເມື່ອທຽບໃສ່ການຈັດຕັ້ງປະຕິບັດ ໃນປີ 2022 (ຈໍານວນ 440 ໜ່ວຍ, ເປັນກຳລັງຕິດຕັ້ງ 27.565 kVA) ເຮັດໃຫ້ການສະໜອງໄຟມີຄວາມສະຖຽນລະພາບຂຶ້ນ ແລະ ຫຼຸດຜ່ອນບັນຫາແຮງດັນຕົກໄດ້ຫຼາຍໃນຂອບເຂດຕົວເມືອງ.
2) ສໍາເລັດການຄົ້ນຄວ້າຮ່ວມກັບພາກສ່ວນກ່ຽວຂ້ອງຂອງລັດແລະບັນດາບໍລິສັດໂທລະຄົມຕ່າງໆໃນການອອກລະບຽບການເກາະຫ້ອຍສາຍໂທລະຄົມແລະອຸປະກອນສື່ສານໃສ່ລະບົບຕາຂ່າຍໄຟຟ້າໃຫ້ເປັນໄປຕາມມາດຕະຖານເພື່ອຮັບປະກັນຄວາມປອດໄພແລະຫຼີກລ່ຽງບັນຫາການເກີດອັກຄີໄພຄືໃນໄລຍະຜ່ານມາ.
3) ເລັ່ງຄົ້ນຄວ້າອອກລະບຽບການໃນການກຳນົດມາດຕະຖານການຕິດຕັ້ງສະຖານີສາກລົດໄຟຟ້າ (EV) ສໍາລັບທີ່ຢູ່ອາໄສ, ອາຄານທີ່ພັກແລະສຳນັກງານອົງການຕ່າງໆເພື່ອກຳນົດເປັນຫຼັກການໃນການຈັດຕັ້ງປະຕິບັດໃຫ້ມີຄວາມສະດວກໃນການໃຊ້ງານເປັນໄປຕາມມາດຕະຖານກຳນົດແລະສືບຕໍ່ຄົ້ນຄວ້າຂໍ້ກຳນົດເງື່ອນໄຂການເຊື່ອມຕໍ່ສະຖານີສາກແລະເຄື່ອງສາກລົດໄຟຟ້າເຂົ້າກັບຕາຂ່າຍໄຟຟ້າຂອງຟຟລລວມທັງການກຳນົດກົນໄກດ້ານລາຄາແບບ (Time of Use) TOU ໂດຍການກຳນົດລາຄາຖືກໃນຊ່ວງເວລາທີ່ມີການຊົມໃຊ້ໄຟຟ້າບໍ່ສູງOff-Peak ເພື່ອເປັນການສົ່ງເສີມການຊົມໃຊ້ພະລັງງານໄຟຟ້າສໍາລັບການສາກລົດEV ສໍາລັບທີ່ຢູ່ອາໄສສາມາດມີທາງເລືອກໃນການສາກຊ່ວງOff-Peak ໄດ້.
4) ປັດຈຸບັນນີ້ ຟຟລ ແມ່ນໄດ້ນໍາສະເໜີລັດຖະບານເລັ່ງດ່ວນເພື່ອຂໍອະນຸມັດນໍາໃຊ້ເງິນກູ້ຢືມຈຳນວນໜື່ງເພື່ອມາເລັ່ງປັບປຸງລະບົບຈຳໜ່າຍໄຟຟ້າໃນຂອບເຂດທົ່ວປະເທດໂດຍສະເພາະນະຄອນຫຼວງວຽງຈັນໃຫ້ມີຄວາມຮັບປະກັນຫຼຸດຜ່ອນບັນຫາໄຟຕົກ-ໄຟມອດໃຫ້ຫຼຸດໜ້ອຍຖອຍລົງ.
ໃນນາມຄະນະພັກ, ຄະນະນໍາຜູ້ບໍລິຫານລັດວິສາຫະກິດໄຟຟ້າລາວຂໍຮຽກຮ້ອງມາຍັງສັງຄົມຖ້າພົບເຫັນເຫດການໄຟຕົກ-ໄຟມອດ, ເຫດການໄຟຟ້າຂັດຂ້ອງຕ່າງໆຫຼືປະກົດການຄົນລັກໄຟທ່ານສາມາດແຈ້ງສູນບໍລິການໃກ້ບ້ານທ່ານຫຼືຜ່ານສາຍດ່ວນ 1199, EDL APP, Facebook Page EDL LAO, ເພື່ອເຮັດໃຫ້ໄຟຟ້າລາວສາມາດແກ້ໄຂບັນຫາໄດ້ຢ່າງທັນການ.