ວັນທີ 10 ກຸມພາ ນີ້, ຜູ້ສະໝັກເປັນສະມາຊິກສະພາແຫ່ງຊາດ (ສສຊ) ຊຸດທີ IX ປະຈຳເຂດເລືອກຕັ້ງທີ 16 ແຂວງເຊກອງ ໄດ້ສືບຕໍ່ລົງເຄື່ອນໄຫວໂຄສະນາຫາສຽງ ຢູ່ໜ່ວຍປ່ອນບັດບ້ານຕະນຶງ ເມືອງກະລຶມ ແຂວງເຊກອງ, ຊຶ່ງເປັນຈຸດທີສອງຂອງແຂວງ, ໂດຍການນຳພາຂອງ ພັນເອກ ທອງສີ ກຸນສະນະ ກໍາມະການປະຈໍາພັກແຂວງ, ຫົວໜ້າການທະຫານ ກອງບັນຊາການທະຫານແຂວງ, ມີຄະນະອານຸກໍາມະການເລືອກຕັ້ງຂັ້ນແຂວງ, ຂັ້ນເມືອງ ພ້ອມດ້ວບັນດາທ່ານຜູ້ສະໝັກ ສສຊ ທັງ 9 ທ່ານ, ໂດຍໄດ້ຮັບການຕ້ອນຮັບຈາກອໍານາດການປົກຄອງບ້ານ ແລະປະຊາຊົນຜູ້ມີສິດປ່ອນບັດ 5 ບ້ານເຊັ່ນ: ບ້ານຕະນຶງ, ບ້ານຕະມໍ, ບ້ານວາງ, ບ້ານວັງປະງໍ ແລະບ້ານໂບບິງ ໃຫ້ການຕ້ອນຮັບຢ່າງອົບອຸ່ນ.
ໂອກາດນີ້, ຜູ້ແທນແຕ່ລະທ່ານ ໄດ້ຜັດປ່ຽນກັນພົບປະໂອ້ລົມ ກັບປະຊາຊົນຜູ້ມີສິດປ່ອນບັດເລືອກຕັ້ງ ດ້ວຍບັນຍາກາດຟົດຟື້ນ ເປັນຕົ້ນແມ່ນການສະເໜີຊື່, ປະຫວັດຕົ້ນກຳເນີດ ແລະ ການເຄື່ອນໄຫວຮັບໃຊ້ໜ້າທີ່ການເມືອງ ຂອງພັກ-ລັດ ໃນໄລຍະຜ່ານມາ ຈົນເຖິງປັດຈຸບັນ ທັງນີ້ ກໍເພື່ອເຮັດໃຫ້ຜູ້ມີສິດເລືອກຕັ້ງ ໄດ້ຮັບຮູ້ເຖິງຊື່ສຽງຮຽງນາມ ແລະປະຫວັດຄວາມເປັນມາ ຂອງຕົນ ຢ່າງຈະແຈ້ງ, ພ້ອມທັງຢືນຢັນ ແລະ ໃຫ້ຄຳໝັ້ນສັນຍາ ຢ່າງໜັກແໜ້ນ ຕໍ່ຜູ້ມີສິດເລືອກຕັ້ງວ່າ ຈະທຸ່ມເທເຫື່ອແຮງ ແລະ ສະຕິປັນຍາ ຂອງຕົນ ເຂົ້າໃນການຮັບໃຊ້ປະຊາຊົນ ຢ່າງສຸດຄວາມສາມາດ ເພື່ອຜົນປະໂຫຍດລວມຂອງຊາດ, ຂອງປະຊາຊົນ ເວົ້າລວມ, ເວົ້າສະເພາະ ກໍຄືຮັບໃຊ້ປະຊາຊົນ ຊາວແຂວງເຊກອງ ຢ່າງສຸດອົກສຸດໃຈ ຫາກຜູ້ມີສິດເລືອກຕັ້ງໃຫ້ໂອກາດ, ມີຄວາມໄວ້ວາງໃຈ, ມີຄວາມເຊື່ອໝັ້ນ ແລະ ເລືອກເອົາຕົນ ມາເປັນຜູ້ແທນໃນສະພາ.
ພ້ອມນີ້ ຄະນະຜູ້ສະໝັກເປັນສະມາຊິກ ສສຊ ໃນຄັ້ງນີ້ ໄດ້ມອບເຂົ້າສານໜຽວ ຈໍານວນ 1 ໂຕນ, ຜ້າຫົ່ມ ແລະເສື້ອກັນໜາວ ຈໍານວນໜຶ່ງ ໃຫ້ອໍານາດການປົກຄອງບ້ານ ກໍຄືປະຊາຊົນພາຍໃນບ້ານຕະນຶງ ຕື່ມອີກ.
     
ຂ່າວ-ພາບ: ພຸດທະສອນ
Loading...