ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຜູ້ແທນກອງປະຊຸມຂົນສົ່ງແບບຍືນຍົງ ແລະ ເປັນມິດຕໍ່ສິ່ງແວດລ້ອມ ຄັ້ງທີ 10 ຮັບຮອງເອົາຫລາຍບັນຫາສຳຄັນ ເພື່ອພັດທະນາການຂົນສົ່ງແບບຍືນຍົງ

ກອງປະຊຸມຂົນສົ່ງແບບຍືນຍົງ ແລະ ເປັນມິດຕໍ່ສິ່ງແວດລ້ອມ ຄັ້ງທີ 10 ໄດ້ອັດລົງດ້ວຍຜົນສຳ ເລັດໃນ ( 16.3.17) ທີ່ໂຮງແຮມດອນຈັນພາເລັດ, ນະຄອນຫລວງວຽງຈັນ ພາຍຫລັງດຳເນີນມາເປັນເວລາ 3 ວັນ ພາຍໃຕ້ການເປັນປະທານຂອງ ທ່ານ ບຸນຈັນ ສິນທະວົງ, ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ໂດຍມີຜູ້ແທນຈາກ 38 ປະເທດ, ພ້ອມດ້ວຍຕາງໜ້າຈາກບັນດາອົງການຈັດຕັ້ງສາກົນ, ພາກທຸລະກິດ, ຊ່ຽວຊານທັງພາຍໃນ ແລະ ຕ່າງປະເທດເຂົ້າຮ່ວມ 300 ກ່ວາທ່ານ.

ກອງປະຊຸມຄັ້ງນີ້ ພາຍໃຕ້ຄຳຂັວນ: “ແຜນງານດ້ານການຂົນສົ່ງແບບຍືນຍົງ ຮອດປີ 2030 ເພື່ອບັນລຸເປົ້າໝາຍການພັດທະນາແບບຍືນຍົງ ຮອດປີ 2030”. ຕະຫລອດໄລຍະເວລາ 3 ວັນ ຜູ້ແທນກອງປະຊຸມໄດ້ສຸມໃສ່ປຶກສາຫາລືຫລາຍບັນຫາສຳຄັນ ຄື: ປຶກສາຫາລືກ່ຽວກັບວິທີການມີສ່ວນຮ່ວມຂອງບັນດາປະເທດສະມາຊິກອາຊຽນທີ່ເປັນສະມາຊິກກອງປະຊຸມຂົນສົ່ງແບບຍືນຍົງ ແລະ ເປັນມິດຕໍ່ສິ່ງແວດລ້ອມໃນການບັນລຸຄາດໝາຍປີ 2030 ຂອງການພັດທະນາແບບຍືນຍົງ ໂດຍການຈັດຕັ້ງປະຕິບັດການຂົນສົ່ງແບບຍືນຍົງ, ບັນຫາຕ່າງຯ ທາງດ້ານນະໂຍບາຍ, ມາດຕະການ, ກົນໄກທາງດ້ານເຕັກໂນໂລຊີ ແລະ ການເງິນ, ລວມເຖີງຄູ່ຮ່ວມມືດ້ານວຽກງານຂົນສົ່ງເພື່ອບັນລຸເປົ້າໝາຍການພັດທະນາແບບຍືນຍົງ, ນະໂຍບາຍກ່ຽວກັບການເຂົ້າເຖີງຊົນນະບົດ ແລະ ການເຊື່ອມຈອດກັບຊົນນະບົດໃນດ້ານຄວາມປອດໄພຂອງອາຫານ, ລຶບລ້າງຄວາມອຶດຫີວ, ການຮ່ວມມືຂອງພາກພື້ນ ແລະ ການພັດທະນາພາກພື້ນແບບຍືນຍົງ, ສະເໜີກ່ຽວກັບພາລະບົດບາດຂອງການທາງລົດໄຟໃນການບັນລຸຄາດໝາຍປີ 2030 ຂອງການພັດທະນາແບບຍືນຍົງ ແລະ ເປົ້າໝາຍການພັດທະນາແບບຍືນຍົງ, ວິທີເຮັດໃຫ້ການຂົນສົ່ງແບບຍືນຍົງສາມາດປະກອບສ່ວນເຂົ້າໃນການສົ່ງເສີມຄວາມເທົ່າທຽມຂອງຍິງ-ຊາຍ ແລະ ວຽກຍົກສູງບົດບາດຂອງເພດຍິງ ແລະ ເດັກນ້ອຍ. ທົບທວນຄຶນ ແລະ ຕີລາຄາປະເມີນຄວາມຄືບໜ້າ ແລະ ບົດຮຽນອັນດີເລີດຂອງການຈັດຕັ້ງປະຕິບັດຖະແຫລງການບາງກອກ 2020, ລວມເຖີງຖອດຖອນບົດຮຽນອັນຈຳເປັນທີ່ໄດ້ຮັບເພື່ອເປັນທິດທາງໃຫ້ບັນດາປະເທດສະມາຊິກກອງປະຊຸມຂົນສົ່ງແບບຍືນຍົງ ແລະ ເປັນມິດຕໍ່ສິ່ງແວດລ້ອມເພື່ອກ້າວສູ່ເປົ້າໝາຍການພັດທະນາແບບຍືນຍົງ ໂດຍການຈັດຕັ້ງປະຕິບັດການຂົນສົ່ງແບບຍືນຍົງຂອງປະເທດຕົນເອງ. ນອກຈາກນີ້ ກອງປະຊຸມຍັງໄດ້ຮັບຮອງເອົາຮ່າງຖະແຫລງການວຽງຈັນກ່ຽວກັບການຂົນສົ່ງຊົນນະບົດແບບຍືນຍົງ ເພື່ອບັນລຸຄາດໝາຍປີ 2030 ຂອງການພັດທະນາແບບຍືນຍົງ ເພື່ອພ້ອມກັນນຳໄປຈັດຕັ້ງປະຕິບັດໃຫ້ໄດ້ຮັບຜົນສຳເລັດໃນຕໍ່ໜ້າ.

ໃນໂອກາດມີຄຳເຫັນກ່າວອັດກອງປະຊຸມຄັ້ງນີ້ ທ່ານ ບຸນຈັນ ສິນທະວົງ, ລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ມີຄຳເຫັນບາງຕອນສຳຄັນ ວ່າ: ການຮັບຮອງເອົາຖະແຫລງການວຽງຈັນກ່ຽວກັບການຂົນສົ່ງຊົນນະບົດແບບຍືນຍົງ ເພື່ອບັນລຸຄາດໝາຍປີ 2030 ຂອງການພັດທະນາແບບຍືນຍົງ ເປັນສິ່ງສຳຄັນເພາະຖືວ່າຜູ້ແທນກອງປະຊຸມໄດ້ສ້າງປະຫວັດສາດທີ່ສຳຄັນສຳລັບກອງປະຊຸມຂົນສົ່ງແບບຍືນຍົງ ແລະ ເປັນມິດຕໍ່ສິ່ງແວດລ້ອມໃນອາຊີ ເພາະການເຂົ້າເຖີງ ແລະ ການເຊື່ອມຕໍ່ເປັນບັນຫາໃຫຍ່ໃນອາຊີ. ຂ້າພະເຈົ້າຫວັງວ່າຖະແຫລງການວຽງຈັນໃນຄັ້ງນີ້ ຈະເປັນກອບສຳຄັນສຳລັບຫລາຍປະເທດເພື່ອພັດທະນາຄວາມຕ້ອງການດ້ານນະໂຍບາຍ, ແຜນການ, ລວມເຖີງດ້ານການເງິນ, ເຕັກນິກ ເພື່ອສະຫນັບສະຫນູນການຂົນສົ່ງໃນຊົນນະ ບົດ. ຖະແຫລງ ການວຽງຈັນູັ້ງນີ້ຍັງມີຄວາມສຳຄັນສຳລັບປະເທດສະມາຊິກອາຊຽນໃນການບັນລຸໄດ້ເປົ້າຫມາຍການພັດທະນາແບບຍຶນຍົງໃນປີ 2030. ທ່ານ ບຸນຈັນ ສິນທະວົງ ຍັງໄດ້ສະແດງຄວາມຂອບໃຈຢ່າງຈິງໃຈ ແລະ ສະແດງຄວາມຮູ້ບຸນຄຸນຕໍ່ອົງການຈັດຕັ້ງສາກົນ ແລະ ຄູ່ຮ່ວມມືທີ່ຮ່ວມກັນເປັນເຈົ້າພາບຈັດກອງປະຊຸມຄັ້ງນີ້ໄດ້ຮັບຜົນສຳເລັດເປັນຢ່າງດີ.

ສຳລັບກອງປະຊຸມຂົນສົ່ງແບບຍືນຍົງ ແລະ ເປັນມິດຕໍ່ສິ່ງແວດລ້ອມຄັ້ງຕໍ່ໄປ ຄື ຄັ້ງທີ 11 ຈະຈັດຂຶ້ນຢູ່ປະເທດມົງໂກລີໃນປີຫນ້າ.