ກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ IX ວັນທີ 10 ພະຈິກ 2023 ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ຜູ້ແທນກອງປະຊຸມໄດ້ຮັບຟັງ ແລະປະກອບຄໍາເຫັນເຂົ້າໃສ່ການຈັດຕັ້ງປະຕິບັດແຜນການເຄື່ອນໄຫວວຽກງານ ກາງສະໄໝ 5 ປີ (2021-2025)ແລະ ທິດທາງແຜນການທ້າຍສະໄໝ ຮອດປີ 2025, ການຈັດຕັ້ງປະຕິບັດແຜນການ ປະຈໍາປີ 2023 ແລະ ແຜນການປະຈໍາປີ 2024 ຂອງສະພາແຫ່ງຊາດ ຊຸດທີ IX ສະເໜີໂດຍ ທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໂດຍທ່ານໄດ້ຍົກໃຫ້ເຫັນຫລາຍຜົນງານອັນພົ້ນເດັ່ນ ທີ່ສະພາແຫ່ງຊາດສາມາດຈັດຕັ້ງປະຕິບັດໄດ້ ໃນນີ້ ການປະຕິບັດພາລະບົດບາດດ້ານນິຕິບັນຍັດ ປະຕິບັດແຜນການສ້າງແລະປັບປຸງກົດໝາຍຂອງສະພາແຫ່ງຊາດຊຸດທີIX ໄດ້ທັງໝົດ52 ສະບັບເທົ່າກັບ54,16% ຂອງແຜນການ 5 ປີ ແລະຄົ້ນຄວ້າປັບປຸງແຜນການສ້າງ ແລະປັບປຸງກົດໝາຍແຕ່ປີ 2023-2025 ມີຈໍານວນ 40ສະບັບ, ດໍາເນີນກອງປະຊຸມສໍາມະນາວິທະຍາສາດແນວຄວາມຄິດໄກສອນພົມວິຫານ ກ່ຽວກັບການສ້າງ, ປະຕິບັດລັດຖະທຳມະນູນແຫ່ງ ສປປ ລາວ ແລະກອງປະຊຸມສໍາມະນາວິທະຍາສາດຄົ້ນຄວ້າການຍົກເວັ້ນບາງມາດຕາຂອງກົດໝາຍ; ຈັດຕັ້ງກອງປະຊຸມປະເມີນການປະຕິບັດກົດໝາຍຂົງເຂດເສດຖະກິດ-ການເງິນ, ກົດໝາຍຂົງເຂດຍຸຕິທໍາ ແລະຂົງເຂດປ້ອງກັນຊາດ-ປ້ອງກັນຄວາມສະຫງົບ ແລະກົດໝາຍຂົງເຂດສະພາແຫ່ງຊາດຈໍານວນ 15ສະບັບ.
ນອກນັ້ນຍັງໄດ້ເອົາໃຈໃສ່ການໂຄສະນາເຜີຍແຜ່ກົດໝາຍທີ່ຕິດພັນກັບບັນຫາເຄັ່ງຮ້ອນຂອງສັງຄົມແລະ ການເຄື່ອນໄຫວຂອງສະມາຊິກສະພາແຫ່ງຊາດເພື່ອເຮັດໃຫ້ສັງຄົມຮັບຮູ້, ເຂົ້າໃຈຢ່າງເລິກເຊິ່ງ; ເອົາໃຈໃສ່ຊຸກຍູ້ພາກສ່ວນກ່ຽວຂ້ອງໂຄສະນາເຜີຍແຜ່ກົດໝາຍ, ນິຕິກໍາໃຕ້ກົດໝາຍ; ຄົ້ນຄວ້າຕີຄວາມໝາຍ ແລະອະທິບາຍກົດໝາຍ;ໃຫ້ສັດຕະຍາບັນແກ່ສົນທິສັນຍາ-ສັນຍາສາກົນ, ອະນຸສັນຍາຕ່າງໆ ໄດ້ມີການຈັດຕັ້ງການສະເຫຼີມສະຫຼອງວັນລັດຖະທໍາມະນູນແຫ່ງຊາດຄົບຮອບ 30 ປີຢ່າງເປັນຂະບວນຟົດຟື້ນ.
ດ້ານການປະຕິບັດພາລະບົດບາດດ້ານການຕົກລົງບັນຫາສໍາຄັນພື້ນຖານຂອງປະເທດຊາດ ໄດ້ກະກຽມແລະດໍາເນີນກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີIXເພື່ອພິຈາລະນາຮັບຮອງເອົາບັນຫາສໍາຄັນພື້ນຖານຂອງປະເທດຊາດ; ດໍາເນີນກອງປະຊຸມສະໄໝສາມັນຂອງສະພາແຫ່ງຊາດ 6ຄັ້ງ, ສະມາຊິກສະພາແຫ່ງຊາດໄດ້ຄົ້ນຄວ້າປະກອບຄໍາເຫັນຕໍ່ເນື້ອໃນຕ່າງໆມີທັງໝົດ160ເນື້ອໃນ, ຊຶ່ງໄດ້ຮັບຮອງເປັນມະຕິຈໍານວນ 122ສະບັບ. ນອກນັ້ນ, ຍັງໄດ້ດໍາເນີນກອງປະຊຸມສະໄໝວິສາມັນເທື່ອທີ 1 ເພື່ອພິຈາລະນາຮັບຮອງເອົາວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ແລະ ບັນດາກົດໝາຍທີ່ກ່ຽວຂ້ອງຊຶ່ງໄດ້ຮັບຮອງເປັນມະຕິຈໍານວນ 4 ສະບັບ, ດໍາເນີນກອງປະຊຸມຄະນະປະຈໍາສະພາແຫ່ງຊາດຈໍານວນ 33ຄັ້ງ ເພື່ອພິຈາລະນາຕົກລົງບັນດາເນື້ອໃນຕ່າງໆຈໍານວນ 513 ເນື້ອໃນ ແລະອອກມະຕິຂອງຄະນະປະຈໍາສະພາແຫ່ງຊາດຈໍານວນ 223ສະບັບ.
ທ່ານນາງສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ ຍົກໃຫ້ເຫັນ ຜົນງານອັນພົ້ນເດັ່ນໃນການປະຕິບັດແຜນການປີ 2023 ໃນນີ້ດ້ານການຕິດຕາມກວດກາ ໄດ້ປະເມີນຜົນການຈັດຕັ້ງປະຕິບັດກົດໝາຍ; ສ້າງແລະຈັດພິມປຶ້ມຄູ່ມືການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍ; ປຶ້ມປະມວນເອກກະສານຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍ 4 ສະບັບ ທີ່ຕິດພັນກັບວາລະແຫ່ງຊາດ; ເອົາໃຈໃສ່ຊີ້ນໍາການຄົ້ນຄວ້າ, ກໍານົດຫົວຂໍ້ ເຂົ້າໃນແຜນການຕິດຕາມກວດກາຂອງສະພາແຫ່ງຊາດ ແລະບັນດາກົງຈັກຂອງສະພາແຫ່ງຊາດຈໍານວນ 70 ຄັ້ງ, ດໍາເນີນກອງປະຊຸມຮ່ວມລະຫວ່າງຄະນະປະຈໍາສະພາແຫ່ງຊາດກັບລັດຖະບານຈຳນວນ 5ຄັ້ງຊຶ່ງໄດ້ພິຈາລະນາເນື້ອໃນ ຈໍານວນ 39ຫົວຂໍ້ ແລະ ໄດ້ເຊັນຂໍ້ຕົກລົງຮ່ວມໃນການປະສານງານເຊິ່ງກັນ ແລະ ກັນ, ແຕ່ງຕັ້ງຜູ້ປະສານງານ ເພື່ອຍົກສູງປະສິດທິພາບໃນການເຄື່ອນໄຫວວຽກງານຂອງຕົນໃຫ້ນັບມື້ດີຂຶ້ນ.
ໄດ້ຈັດກອງປະຊຸມສໍາມະນາວິທະຍາສາດ ກ່ຽວກັບການເພີ່ມທະວີການຄຸ້ມຄອງ ແລະຫລັກການການລົງທຶນຂອງລັດ ໃນເວລາດໍາເນີນກອງປະຊຸມ ສພຊ ແຕ່ລະຄັ້ງ, ບັນດາສະມາຊິກສະພາແຫ່ງຊາດ ໄດ້ເປັນເຈົ້າການຄົ້ນຄວ້າ, ປະກອບຄໍາເຫັນ ຕໍ່ບົດລາຍງານຂອງພາກສ່ວນຕ່າງໆ; ສົ່ງຄໍາຊັກຖາມໃຫ້ພາກສ່ວນກ່ຽວຂ້ອງຈໍານວນ 22ພາກສ່ວນກວມເອົາ 183 ຄໍາຖາມ , ເອົາໃຈໃສ່ຊີ້ນໍາການຄົ້ນຄ້ວາ, ພິຈາລະນາຄໍາຮ້ອງຂໍຄວາມເປັນທໍາຂອງພົນລະເມືອງທີ່ສົ່ງມາຫາສະພາແຫ່ງຊາດມີທັງໝົດ 1.429ເລື່ອງ,ສາມາດພິຈາລະນາ ແລະສົ່ງໃຫ້ພາກສ່ວນກ່ຽວຂ້ອງໄດ້ຈໍານວນ 919ເລື່ອງຖ້າທຽບໃສ່ຄໍາຮ້ອງເຂົ້າມາຊຸດທີ IXກວມເອົາ64,31%, ປັດຈຸບັນຄໍາຮ້ອງຍັງຄ້າງ 510 ເລື່ອງ; ຮັບຕ້ອນແລະໃຫ້ຄໍາປຶກສາແກ່ປະຊາຊົນຈຳນວນ 834ຄັ້ງ; ເກັບກໍາສັງລວມຄໍາສະເໜີຂອງປະຊາຊົນຜ່ານໂທລະສັບສາຍດ່ວນຈໍານວນ 2.841ສາຍ, ມີຈໍານວນ 1.628ເນື້ອໃນ, ສົ່ງໃຫ້49ພາກສ່ວນເພື່ອຄົ້ນຄວ້າພິຈາລະນາແກ້ໄຂ.
ພາຍຫລັງທ່ານນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ລາຍງານການຈັດຕັ້ງປະຕິບັດແຜນການເຄື່ອນໄຫວວຽກງານ ກາງສະໄໝ5 ປີ (2021-2025)ແລະ ທິດທາງແຜນການທ້າຍສະໄໝ ຮອດປີ 2025, ການຈັດຕັ້ງປະຕິບັດແຜນການ ປະຈໍາປີ 2023 ແລະ ແຜນການປະຈໍາປີ 2024 ຂອງສະພາແຫ່ງຊາດ ຊຸດທີ IX ແລ້ວ ທ່ານຄໍາໄຫລ ສີປະເສີດ ຮອງປະທານສູນກາງແນວລາວສ້າງຊາດ ໄດ້ປະກອບຄໍາເຫັນໃສ່ ການເຄື່ອນໄຫວວຽກງານ ຂອງສະພາແຫ່ງຊາດ ໂດຍທ່ານໄດ້ນໍາເອົາການສ່ອງແສງຄໍາຄິດ ຄໍາເຫັນ ຄໍາສະເໜີຂອງປະຊາຊົນທ້ອງຖິ່ນຕ່າງໆ ຕໍ່ສະພາແຫ່ງຊາດ ເຊິ່ງມີຫລາຍບັນຫາ ຕິດພັນກັບການດໍາລົງຊີວິດຂອງປະຊາຊົນບັນດາເຜົ່າ ເຮັດແນວໃດເພື່ອພ້ອມກັນຊຸກຍູ້ພາກສ່ວນກ່ຽວຂ້ອງ ຕິດຕາມ ແກ້ໄຂຢ່າງຮີບດ່ວນ, ທ່ານໄດ້ຍົກໃຫ້ເຫັນການສ້າງ ແລະປັບປຸງກົດໝາຍຂອງບາງຂົງເຂດ ຜ່ານມາຍັງມີລັກສະນະຟ້າວຝັ່ງ ແລ່ນນໍາປະລິມານ ການປະຕິບັດຂັ້ນຕອນການສ້າງ ແລະປັງປຸງກົດໝາຍບາງດ້ານ ຍັງບໍ່ທັນສອດຄ່ອງ ຕາມກົດໝາຍວ່າດ້ວຍການສ້າງນິຕິກໍາ ແລະອື່ນໆ.
ຈາກນັ້ນ ສະມາຊິກສະພາແຫ່ງຊາດ ໄດ້ປະກອບຄໍາຄິດຄໍາເຫັນເຂົ້າໃສ່ການເຄື່ອນໄຫວວຽກງານຂອງສະພາແຫ່ງຊາດຊຸດທີ 9 ຕາມການເຈາະຈີ້ມຂອງຂອງປະທານກອງປະຊຸມ ເພື່ອເຮັດໃຫ້ການເຄື່ອນໄຫວວຽກງານຂອງສະພາແຫ່ງຊາດ ແຕ່ນີ້ຫາປີ 2025 ມີປະສິດທິຜົນດີຂຶ້ນກວ່າເກົ່າ .
