ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ຜູ້ແທນພັກກອມມູນິດຊາວກອມມູນິດຣັດເຊຍ ຢ້ຽມຢາມແຂວງວຽງຈັນ
ຄະນະຜູ້ແທນພັກກອມມູນິດຊາວກອມມູນິດຣັດເຊຍ ນຳໂດຍ ທ່ານ ມາລິນໂກວິດເຊີເກ ອາເລັກແຊນໂດຣວິດ (Malinkovich sergey Aleksandrovich) ປະທານພັກກອມມູນິດ ຊາວກອມມູນິດຣັດເຊຍ ພ້ອມຄະນະ ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງວຽງຈັນ ໃນວັນທີ 27 ເມສາ 2024 ໂດຍມີ ທ່ານ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ ແລະ ພາກສ່ວນກ່ຽວຂ້ອງໃຫ້ການຕ້ອນຮັບ, ຢູ່ທີ່ໂຮງແຮມ ເອັສວັງວຽງບູຕິກ ເມືອງວັງວຽງ.
ທ່ານ ຄຳພັນ ສິດທິດຳພາ ໄດ້ສະແດງຄວາມຕ້ອນຮັບຢ່າງອົບອຸ່ນມາຍັງຄະນະຜູ້ແທນພັກກອມມູນິດ ຊາວກອມມູນິດຣັດເຊຍ ໂດຍໄດ້ຍົກໃຫ້ເຫັນເຖິງ ຄວາມສະໜິດແໜ້ນຂອງສາຍພົວພັນກັນ ລະຫວ່າງ ສອງພັກ, ສອງລັດ ລາວ-ຣັດເຊຍ ຣັດ ເຊຍ-ລາວ ທີ່ມີມາເປັນເວລາດົນນານແລ້ວ ແລະ ຄັ້ງນີ້ກໍເປັນໂອ ກາດດີທີ່ໄດ້ຕ້ອນຮັບ ຄະນະຜູ້ແທນພັກກອມມູນິດຊາວກອມ ມູນິດຣັດເຊຍ ທີ່ມາຢ້ຽມຢາມແຂວງວຽງຈັນ ແລະ ຣັດເຊຍ ກໍເປັນປະເທດຫນຶ່ງທີ່ໃຫ້ການຊ່ວຍເຫລືອ ສປປ ລາວໃນຫຼາຍດ້ານ, ເວົ້າລວມ ເວົ້າສະເພາະກໍຄືແຂວງວຽງຈັນ.
ພິເສດ ຣັດເຊຍ ໄດ້ສົ່ງຜູ້ຊຽ່ວຊານດ້ານເກັບກູ້ລະເບີດຈຳນວນ 22 ທ່ານ ມາຊ່ວຍເກັບກູ້ລະເບີດບໍ່ທັນແຕກທີ່ເປັນສິ່ງເສດເຫຼືອຈາກສົງຄາມໃນເມື່ອກ່ອນ ຢູ່ເມືອງກາສີແຂວງວຽງຈັນ, ສາມາດເກັບກູ້ລະເບີດແລ້ວ 1.000 ກວ່າລູກ ໃນເນື້ອທີ່ 23 ເຮັດຕາ, ຜົນງານດັ່ງກ່າວນັ້ນ ປະຊາຊົນຊາວເມືອງກາສີ ມີຄວາມດີໃຈ ເປັນຢ່າງຍິ່ງທີ່ໄດ້ຮັບການຊ່ວຍເຫລືອຂອງຣັດເຊຍໃນຄັ້ງນີ້.
ທ່ານ ເຈົ້າແຂວງໆວຽງຈັນ ຍັງໄດ້ລາຍງານສະພາບລວມຂອງແຂວງວຽງຈັນໂດຍຫຍໍ້.
ທ່ານ ມາລິນໂກວິດເຊີເກ ອາເລັກແຊນໂດຣ ໄດ້ສະແດງຄວາມຂອບໃຈມາຍັງ ເຈົ້າແຂວງວຽງຈັນ ພ້ອມຄະນະ ທີ່ໃຫ້ການຕ້ອນຮັບຢ່າງອົບອຸ່ນ ພ້ອມທັງ ແຈ້ງຈຸດປະສົງຂອງການເຄື່ອນ ໄຫວຢ້ຽມຢາມ ສປປ ລາວ ກໍຄືແຂວງວຽງຈັນໃນຄັ້ງນີ້ ໃຫ້ທ່ານເຈົ້າແຂວງໄດ້ຮັບຊາບ.