ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜູ້ແທນລາວເຂົ້າຮ່ວມກອງປະຊຸມທາງໄກ ຂອບການຮ່ວມມືຂອງອົງການອຸຍແນສໂກ ຄັ້ງທໍາອິດ

ໃນຕອນແລງວັນທີ 22 ເມສາ 2020, ທ່ານສະຫວັນຄອນ ຣາຊມົນຕຣີ, ຮອງລັດຖະມົນຕີກະຊວງ ຖະແຫລງຂ່າວ, ວັດທະນະທໍາ ແລະທ່ອງທ່ຽວ ໂດຍຕາງໜ້າໃຫ້ລັດຖະບານແຫ່ງ ສປປ ລາວ ໄດ້ເຂົ້າຮ່ວມກອງປະຊຸມທາງໄກ ຄັ້ງທຳອິດ ຂອງລັດຖະມົນຕີ ວັດທະນະທຳ ພາຍໃຕ້ຂອບການຮ່ວມມືຂອງອົງການອຸຍແນສໂກ (First Virtual Meeting of Minister of Culture) ທີ່ນະຄອນຫຼວງວຽງຈັນ, ເພື່ອລາຍງານສະພາບການແຜ່ລະບາດ ແລະ ມາດຕະການການຮັບມືຈາກຜົນສະທ້ອນຂອງພະຍາດໂຄວິດ-19.

ໃນກອງປະຊຸມ ບາງຕອນ ທ່ານສະຫວັນຄອນ ຣາຊມົນຕຣີ ກ່າວວ່າ: ຕາງໜ້າໃຫ້ລັດຖະບານແຫ່ງ ສປປ ລາວ, ຂ້າພະເຈົ້າຂໍສະແດງຄວາມເສຍໃຈ ແລະ ເຫັນອົກເຫັນໃນ ມາຍັງລັດຖະບານ ແລະ ປະຊາຊົນທົ່ວໂລກ ໂດຍສະເພາະ ຄອບຄົວຜູ້ທີ່ໄດ້ຮັບເຄາະຮ້າຍ ແລະ ເສຍຊີວິດຈາກພະຍາດໂຄວິດ-19. ຂ້າພະເຈົ້າເຫັນວ່າ ໂຄວິດ-19 ເປັນໂລກລະບາດຮ້າຍແຮງ ທີ່ພວມສືບຕໍ່ແຜ່ຂະຫຍາຍເປັນວົງກວ້າງໃນທົ່ວໂລກ ແລະ ເຮັດໃຫ້ມີຜູ້ເສຍຊີວິດ ແລະ ຕິດເຊື້ອເປັນຈຳນວນຫຼາຍ ທັງສ້າງຜົນກະທົບອັນໃຫຍ່ຫຼວງ ໃນສະເພາະໜ້າ ແລະ ຍາວນານ ຕໍ່ເສດຖະກິດ-ສັງຄົມ ເວົ້າລວມ, ເວົ້າສະເພາະ ກໍ່ຄື ຂະແໜງການວັດທະນະທຳ ຢູ່ໃນພາກພື້ນ ແລະ ໃນໂລກ ຢ່າງຫຼີກລ້ຽງບໍ່ໄດ້. ສຳລັບ ຢູ່ ສປປ ລາວ ການກວດພົບເຊື້ອມາເຖິງມື້ນີ້ ອາດເຫັນໂຕເລກບໍ່ທັນຫຼາຍ ແຕ່ຄວາມສ່ຽງທີ່ຈະເກີດການລະບາດແບບວົງກວ້າງ ແລະ ຮຸນແຮງຂື້ນແມ່ນມີສູງ; ດັ່ງນັ້ນ ຕໍ່ໜ້າສະພາບການດັ່ງກ່າວ, ລັດຖະບານ ໄດ້ວາງມາດຕະການ ເພື່ອປ້ອງກັນການແຜ່ລະບາດຂອງເຊື້ອພະຍາດ ໂຄວິດ- 19 ຕາມຄຳສັ່ງເລກທີ 06/ນຍ, ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ ແລະ ກຽມຄວາມພ້ອມຮອບດ້ານ ເພື່ອຕ້ານພະຍາດໂຄວິດ-19. ສຳລັບຂະແໜງການ ວັດທະນະທຳ ແລະ ການທ່ອງທ່ຽວ ກໍ່ໄດ້ຮັບຜົນກະທົບຢ່າງໜັກໜ່ວງ ກໍ່ຄື ຕໍ່ບັນດາກິດຈະກຳວັດທະນະທຳ ແລະ ຮີດຄອງປະເພນີລາວ ເປັນຕົ້ນ: ງານສະເຫຼີມສະຫຼອງທົ່ງໄຫຫີນຊຽງຂວາງ ເຂົ້າເປັນມໍລະດົກໂລກ, ບຸນປີໃໝ່ ລາວ ແລະ ບຸນປະເພນີປະຈຳຊາດ ທີ່ສ່ອງແສງເຖິງເອກະລັກຂອງລາວ ແມ່ນຖືກໂຈະທັງໝົດ.

ທ່ານສະຫວັນຄອນ ຣາຊະມົນຕີ ຮອງລັດຖະມົນຕີກະຊວງ ຖວທ ກ່າວຕື່ມວ່າ: ສິ່ງຕ່າງໆເຫຼົ່ານີ້ ເຮັດໃຫ້ ບັນດາຫົວໜ່ວຍທຸລະກິດ ວັດທະນະທຳ , ການທ່ອງທ່ຽວ, ການບໍລິການ, ການຂົນສົ່ງ ແລະ ທຸລະກິດປິ່ນອ້ອມ ຖືກຢຸດສະຫງັກ ແລະ ເຮັດໃຫ້ທຸກການເຄື່ອນໄຫວເຂົ້າມາທ່ອງທ່ຽວລາວ ບໍ່ວ່າຈະມາຈາກປະເທດໃດ ແມ່ນຖືກຈຳກັດໃນລະດັບສູງ ແລະ ຈຳນວນນັກທ່ອງທ່ຽວແມ່ນເກືອບບໍ່ມີ ຊຶ່ງສະພາບການດັ່ງກ່າວຄາດວ່າອາດແກ່ຍາວອີກຕື່ມ. ຕໍ່ສະພາບການດັ່ງກ່າວນີ້, ມັນຍັງໄດ້ສົ່ງຜົນກະທົບທາງລົບ ຕໍ່ການພັດທະນາເສດຖະກິດ ຂອງໂລກ ກໍ່ຄື ຕໍ່ ສປປ ລາວ ໃນລະດັບສູງ. ລັດຖະບານ ສປປ ລາວ ນອກຈາກມີມາດຕະກາດປ້ອງກັນ ຢ່າງເຄັ່ງຄັດແລ້ວ ຍັງໄດ້ກຳນົດນະໂຍບາຍ ກະຕຸ້ນເສດຖະກິດພາຍໃນ ທັງໃນໄລຍະສັ້ນ ແລະ ໄລຍະຍາວ ແນໃສ່ເພື່ອຊ່ວຍເຫຼືອການລົງທຶນທຸລະກິດວັດທະນະທຳ, ທ່ອງທ່ຽວ ແລະ ທຸລະກິດປິ່ນອ້ອມ, ໂດຍສະເພາະ ບັນດາວິສາຫະກິດຂະໜາດນ້ອຍ ແລະ ກາງ ທີ່ໄດ້ຮັບຜົນກະທົບຈາກ ໂລກລະບາດດັ່ງກ່າວ ເພື່ອໃຫ້ສາມາດເຄື່ອນໄຫວ ແລະ ສ້າງພື້ນຖານການຜະລິດພາຍໃນ ເພື່ອຂັບເຄື່ອນເສດຖະກິດໃນຕໍ່ໜ້າ.

ສຳລັບກອງປະຊຸມໃນຄັ້ງນີ້ ແມ່ນມີ 136 ປະເທດເຂົ້າຮ່ວມ ໂດຍມີຈຸດປະສົງເພື່ອປຶກສາຫາລື ແລກປ່ຽນປະສົບການຮ່ວມກັນ ໃນການຮັບມື ແລະ ແກ້ໄຂສະພາບການແຜ່ລະບາດຂອງພະຍາດໂຄວິດ-19 ຂອງແຕ່ລະປະເທດ.