ໃນວັນທີ 5 ກັນຍາ ນີ້ ທີ່ ອົງການກວດສອບແຫ່ງລັດ, ສະຫາຍ ວຽງທະວີສອນ ເທບພະຈັນ ກຳມະການສໍາຮອງສູນກາງພັກ ປະທານອົງການກວດສອບແຫ່ງລັດ ສປປ ລາວ ໄດ້ໃຫ້ກຽດຕອນຮັບການເຂົ້າຢ້ຽມຂ່ຳນັບ ຂອງ ສະຫາຍ ມ່າ ເຫວີນຮຸຍ ຮອງປະທານສຳນັກງານກວດສອບແຫ່ງຊາດ ສປ ຈີນ ພ້ອມດ້ວຍຄະນະ ໃນໂອກາດເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃນລະຫວ່າງ ວັນທີ 5-8 ກັນຍາ 2024 ນີ້.
ໃນໂອກາດດັ່ງກ່າວ, ສະຫາຍ ວຽງທະວີສອນ ເທບພະຈັນ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ຕໍ່ສະຫາຍ ມ່າ ເຫວີນຮຸ່ຍ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ຊຶ່ງເປັນການປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ສອງປະເທດ ກໍຄືສອງອົງການກວດສອບແຫ່ງລັດ, ເວົ້າສະເພາະການພົວພັນຮ່ວມມືດ້ານວຽກງານກວດສອບແຫ່ງລັດໃຫ້ນັບມື້ແໜ້ນແຟ້ນຍິ່ງໆຂຶ້ນ ພ້ອມດຽວກັນນັ້ນ, ສະຫາຍ ວຽງທະວີສອນ ເທບພະຈັນ ໄດ້ຍ້ອງຍໍຊົມເຊີຍ ແລະ ຕີລາຄາສູງ ຕໍ່ໝາກຜົນຂອງການຮ່ວມມືລະຫວ່າງສອງອົງການກວດສອບແຫ່ງລັດ ໃນໄລຍະປີຜ່ານມາ ເປັນຕົ້ນ: 1. ໄດ້ມີການແລກປ່ຽນພົບປະຢ້ຽມຢາມການນໍາຂັ້ນສູງ ລະຫວ່າງ ສອງອົງການກວດສອບແຫ່ງລັດ ຢ່າງເປັນປົກກະຕິ, 2. ການສ້າງຄວາມເຂັ້ມແຂງໃຫ້ແກ່ພະນັກງານອົງການກວດສອບແຫ່ງລັດ ສປປ ລາວ ດ້ວຍຫຼາຍຮູບວິທີຄື: ການຝຶກອົບຮົມ, ການສໍາມະນາ, ການໄປທັດສະນະສຶກສາ ທັງຢູ່ ສຳນັກງານກວດສອບແຫ່ງຊາດ ສປ ຈີນ ແລະ ຢູ່ບັນດາສໍານັກງານກວດສອບປະຈຳພາກ, 3. ໄດ້ໃຫ້ທຶນຍົກລະດັບການສຶກສາລະດັບປະລິນຍາໂທ ແກ່ພະນັກງານອົງການກວດສອບແຫ່ງລັດຢ່າງເປັນປົກກະຕິ ແລະ 4. ໄດ້ໃຫ້ການສະໜັບສະໜູນຊຶ່ງກັນ ແລະ ກັນ ໃນເວທີພາກພື້ນ, ແລະ ສາກົນ, ໝາກຜົນທີ່ເກີດຂຶ້ນໄດ້ ກໍຍ້ອນການຮ່ວມມືທີ່ດີ ການສະໜັບສະໜູນ ແລະ ການຊ່ວຍເຫຼືອ ຂອງສຳນັກງານກວດສອບແຫ່ງຊາດ ສປ ຈີນ ຊຶ່ງໄດ້ປະກອບສ່ວນອັນສໍາຄັນ ໃຫ້ແກ່ການພັດທະນາ ແລະ ສ້າງຄວາມເຂັ້ມແຂງໃຫ້ແກ່ວຽກງານກວດສອບແຫ່ງລັດ ຂອງ ສປປ ລາວ ຕາມແນວທາງການເປັນ ຄູ່ຮ່ວມຊາຕາກຳລາວ-ຈີນ.
ພາຍຫຼັງສຳເລັດການຢ້ຽມຂໍ່ານັບແລ້ວ, ກໍໄດ້ມີກອງປະຊຸມພົບປະສອງຝ່າຍ ລະຫວາງ ສອງອົງການກວດສອບແຫ່ງລັດ ຝ່າຍລາວນໍາໂດຍ ສະຫາຍ ຕ້ອຍ ພົນທີ່ລາດ ຮອງປະທານອົງການກວດສອບແຫ່ງລັດ ພ້ອມດ້ວຍຄະນະ ແລະ ຝ່າຍ ສປ ຈີນ ນໍາໂດຍ ສະຫາຍ ມ່າ ເຫວີນຮຸຍ ຮອງປະທານສຳນັກງານກວດສອບແຫ່ງຊາດ ສປ ຈີນ ພ້ອມດ້ວຍຄະນະ. ໃນການພົບປະໃນຄັ້ງ ນີ້ທັງສອງຝ່າຍໄດ້ແຈ້ງກ່ຽວກັບສະພາບການເຄື່ອນໄຫວທີ່ພົ້ນເດັ່ນຂອງວຽກງານການກວດສອບ ພ້ອມທັງທົບທວນຜົນສຳເລັດ ແລະ ທິດທາງການຮ່ວມມືໃນຕໍ່ໜ້າ. ພ້ອມນັ້ນ, ໄດ້ປຶກສາຫາລືບັນຫາຕ່າງໆເປັນຕົ້ນ: 1. ການເພີ່ມທະວີການພົວພັນຮ່ວມມືໃນວຽກງານກວດສອບແຫ່ງລັດ, 2. ການແລກປຽນຂໍ້ມູນຂ່າວສານທາງດ້ານວຽການກວດສອບ, 3. ການສ້າງຄວາມເຂັ້ມແຂງວຽກງານສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສວບ ແລະ 4. ການສ້າງຄວາມເຂັ້ມແຂງໃຫ້ແກ່ພະນັກງານອົງການກວດສອບປະຈຳພາກ ໂດຍສະເພາະການຮ່ວມມືລະຫວາງອົງການກວດສອບປະຈຳພາກເໜືອ ກັບ ສຳນັກງານກວດສອບປະຈຳ ແຂວງຢຸນນານ.
ໃນວັນທີ 6 ກັນຍາ ນີ້, ສະຫາຍ ມ່າ ເຫວີນຮຸຍ ພ້ອມດ້ວຍຄະນະຜູ້ແທນຈະສືບຕໍ່ໄປເຄື່ອນໄຫວຢ້ຽມຢາມສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ພ້ອມນັ້ນ ໄດ້ຈັດກອງປະຊຸມແລກປ່ຽນບົດຮຽນດ້ານວິຊາການ ລະຫວ່າງ ສອງອົງການກວດສອບແຫ່ງລັດໃນ 2 ຫົວຂໍ້ຄື: 1. ການກວດສອບການຄຸ້ມຄອງ ຄັງເງິນແຫ່ງຊາດ ແລະ 2. ການກວດສອບນະໂຍບາຍທາງດ້ານການເງິນ. ໃນໂອກາດການມາເຄື່ອນໄຫວດັ່ງກ່າວ ໃນວັນທີ 7 ກັນຍາ 2024 ສະຫາຍ ມ່າ ເຫວີນຮຸຍ ພ້ອມດ້ວຍຄະນະຈະສືບຕໍ່ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ອົງການກວດສອບແຫ່ງລັດ ປະຈຳພາກເໜືອ 1 ທີ່ ແຂວງຫຼວງພະບາງ ເພື່ອພົບປະ ແລະ ແລກປ່ຽນບົດຮຽນທາງດ້ານວິຊາການກວດສອບ ແລະ ປຶກສາຫາລືທິດທາງແຜນການຮ່ວມມືໃນຕໍ່ໜ້າ.
ຂ່າວ: ອົງການກວດສອບ, ພາບ: ພູວຽງຄຳ
