ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜູ້ໂດຍສານຂອງລັດວິສາຫະກິດການບິນລາວ ຫລຸດລົງເຖິງ 50% ຍ້ອນໄດ້ຮັບຜົນກະທົບຈາກພະຍາດ Covid-19

ລັດວິສາຫະກິດການບິນລາວ ຕ້ອງໄດ້ນໍາໃຊ້ມາດຕະການປະຢັດຢ່າງເຂັ້ມງວດທີ່ສຸດ ຍ້ອນໄດ້ຮັບຜົນກະທົບຈາກການລະບາດຂອງພະຍາດອັກເສບປອດຮຸນແຮງທີ່ເກີດຈາກເຊື້ອຈຸລະໂລກສາຍພັນໃໝ່ ຫລື Covid-19 ເຮັດໃຫ້ຜູ້ ໂດຍສານຫລຸດລົງເຖີງ 50 ສ່ວນຮ້ອຍ, ຂະນະທີ່ສາຍການບິນໄປຕ່າງປະເທດຫລາຍເສັ້ນຕ້ອງຢຸດໃຫ້ບໍລິການຊົ່ວຄາວ.
ທ່ານ ບຸນມາ ຈັນທະວົງສາ, ຜູ້ອໍານວຍການໃຫຍ່ລັດວິສາຫະກິດການບິນລາວ ໃຫ້ສໍາພາດວ່າ: ຍ້ອນການລະ ບາດຂອງພະຍາດ Covid-19 ເຮັດເສັ້ນທາງການບິນໄປຕ່າງປະເທດຂອງການບິນລາວຕ້ອງໄດ້ຢຸດໃຫ້ບໍລິການຊົ່ວຄາວເນື່ອງຈາກບໍ່ມີຜູ້ໂດຍສານ, ໃນນີ້ ເສັ້ນທາງການບິນໄປຈີນທີ່ມີ 9 ເສັ້ນ, ປັດຈຸບັນ ຍັງເຫລືອແຕ່ເສັ້ນທາງ ວຽງຈັນ – ເມືອງ ຊາງຊາ ທີ່ຍັງໃຫ້ບໍລິການຢູ່ແຕ່ເປັນການເຊົ່າເໝົາລໍາເພື່ອຂົນອຸປະກອນຊ່ວຍເຫລືອດ້ານການແພດ ແລະ ຜູ້ ໂດຍສານຈໍານວນໜຶ່ງທີ່ຕົກຄ້າງຢູ່ລາວໄປຈີນ, ສ່ວນເສັ້ນທາງການບິນຈາກລາວ ຫາ ສ.ເກົາຫລີ ໄດ້ໃຫ້ບໍລິການເປັນຖ້ຽວບິນສຸດທ້າຍໃນວັນທີ 29 ກຸມພາຜ່ານມານີ້ ຕໍ່ມາໄດ້ຢຸດໃຫ້ບໍລິການຊົ່ວຄາວແລ້ວ. ປັດຈຸບັນ ເສັ້ນທາງການບິນໄປຕ່າງປະເທດທີ່ການບິນລາວຍັງສືບຕໍ່ໃຫ້ບໍລິການຢູ່ ລວມມີ: ວຽງຈັນ-ບາງກອກ, ວຽງຈັນ-ຊຽງໃໝ່, ວຽງຈັນ-ຮ່າໂນ້ຍ, ວຽງຈັນ-ໂຮຈິມິນ ແລະ ວຽງຈັນ-ຊຽບລຽບ ແຕ່ຈຳນວນຜູ້ໂດຍສານມີພຽງ 20-30% ຂອງຈໍານວນຜູ້ໂດຍສານທີ່ເຄີຍມີເທົ່ານັ້ນ ເຮັດໃຫ້ໃນຕໍ່ໜ້າອາດເປັນໄປໄດ້ທີ່ຕ້ອງຫລຸດຖ້ຽວບິນໄປປະເທດໃກ້ຄຽງນີ້ລົງອີກຖ້າຫາກຜູ້ໂດຍສານຍັງສືບຕໍ່ຫລຸດລົງ. ສ່ວນສາຍການບິນພາຍໃນແມ່ນຍັງສືບຕໍ່ໃຫ້ບໍລິການເປັນປົກກະຕິ ແຕ່ຈໍານວນຜູ້ໂດຍສານໃນແຕ່ລະເສັ້ນ ທາງຫລຸດລົງຈໍານວນຫລາຍເມື່ອທຽບໃສ່ເມື່ອກ່ອນ.
ທ່ານ ບຸນມາ ຈັນທະວົງສາ ກ່າວຕື່ມວ່າ: ການລະບາດຂອງພະຍາດ Covid-19 ສົ່ງຜົນກະທົບໂດຍກົງຕໍ່ລັດວິສາຫະກິດການບິນລາວ ຍ້ອນຈໍານວນຜູ້ໂດຍສານໂດຍລວມຫລຸດລົງປະມານ 50% ເຮັດໃຫ້ລັດວິສາຫະກິດການບິນລາວຕ້ອງໄດ້ດໍາເນີນມາດຕະການປະຢັດຢ່າງເຂັ້ມງວດທີ່ສຸດ, ລາຍຈ່າຍໃດທີ່ບໍ່ຈໍາເປັນ ແລະ ຮີບດ່ວນແມ່ນໃຫ້ລື່ນອອກໄປກ່ອນ, ພ້ອມນີ້ ໄດ້ລະດົມໃຫ້ພະນັກງານຈໍານວນໜຶ່ງທີ່ເຫລືອວຽກ ໂດຍສະເພາະພະນັກງານຈຸບິນຂອງສາຍການບິນທີ່ໄດ້ຢຸດໃຫ້ບໍລິການຊົ່ວຄາວສະໝັກໃຈພັກວຽກໄປກ່ອນໂດຍບໍ່ເອົາເງິນເດືອນ ແລະ ໃນຕໍ່ໜ້າຖ້າຫາກພະຍາດ Covid-19 ຍັງສືບຕໍ່ແຜ່ລະບາດເປັນເວລາດົນອາດມີການຕັດເງິນຕັດພະນັກງານສ່ວນໃດສ່ວນໜຶ່ງອີກເພື່ອຫລຸດຜ່ອນລາຍຈ່າຍລົງ. ນອກຈາກນີ້ ລັດວິສາຫະກິດການບິນລາວ ໄດ້ສະເໜີໃຫ້ລັດຖະບານແລ້ວເພື່ອຂໍທິດຊີ້ນໍາ ແລະ ຊ່ວຍແກ້ໄຂບັນຫາທີ່ເກີດຂຶ້ນຕາມຄວາມເໝາະສົມ.
ໂດຍ: ມົດແດງນ້ອຍ, ວສລ