ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜົນກວດວິເຄາະທັງໝົດ 83 ຄົນ, ບໍ່ມີຄົນຕິດເຊື້ອໂຄວິດ19 ເພີ່ມ

ໂອກາດຖະແຫລງຂ່າວຮ່ວມຕໍ່ສື່ມວນຊົນ ຕອນບ່າຍວັນທີ 27 ພຶດສະພານີ້ ທີ່ຫ້ອງປະຕິບັດງານຄະນະສະເພາະກິດ ກະຊວງສາທາລະນະສຸກ, ທ່ານພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດ ຄວບຄຸມໂຄວິດ19 ໃຫ້ຮູ້ເຖິງວຽກງານເຝົ້າລະວັງ ແລະຈໍານວນຜູ້ເດີນທາງເຂົ້າມາ ລາວມີທັງໝົດ 1,878 ຄົນ, ໃນນັ້ນຈຸດຜ່ານດ່ານລາວ-ໄທ 1,222 ຄົນ, ມີແຮງງານລາວກັບມາຈາກປະເທດໄທ ທັງໝົດ 11 ຄົນ, ເຫຼືອນັ້ນແມ່ນຄົນຂັບລົດຂົນສົົ່ງສິນຄ້າ.

ຈຸດຜ່ານດ່ານລາວ-ຈີນ ທັງໝົດ 4 ຄົນ, ມີແຮງງານຄົນລາວກັບມາຈາກປະເທດຈີນ 1 ຄົນ, ເຫຼືອນັ້ນ ແມ່ນຜູ້ຂັບລົດຂົນສົ່ງສິນຄ້າ.

ຈຸດຜ່ານດ່ານລາວ-ຫວຽດ ທັງໝົດ 652 ຄົນ ທັງໝົດແມ່ນຄົນຂັບລົດຂົນສົ່ງສິນຄ້າ. ໃນທຸກດ່ານ ແມ່ນໄດ້ກວດແທກອຸນຫະພູມຮ່າງກາຍ ແລະ ບໍ່ມີຄົນເປັນໄຂ້.

ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ: ໃນວັນທີ 26 ພຶດສະພາ 2020, ໄດ້ເກັບຕົວຢ່າງມາກວດວິເຄາະທັງໝົດ 83 ຄົນ, ໃນນັ້ນມີແຮງງານລາວທີ່ກັບມາແຕ່ໄທ 72 ຄົນ, ແຮງງານຫວຽດນາມ 6 ຄົນ, , ກໍລະນີສົງໃສ 1 ຄົນ ແລະ ຄົນເຈັບຕິດເຊື້ອນອນປີ່ນປົວຢູ່ໂຮງໝໍມິດຕະພາບທີ່ເກັບຕົວຢ່າງມາກວດຄືນ 4 ຄົນ.  ທັງໝົດທີ່ກວດມື້ວານນີ້ ບໍ່ພົບເຊື້ອ. ສຳລັບຜົນກວດຄົນເຈັບຕິດເຊື້ອ 4 ຄົນ ໃຫ້ຜົນລົບ 2 ຄົນ ເປັນຈໍານວນ 2 ຄັ້ງ ຄືກໍລະນີທີ16 ແລະ18 ໂດຍຈະໃຫ້ພວກກ່ຽວອອກໂຮງໝໍໄປຈຳກັດບໍລິເວນຢູ່ເຮືອນໃຫ້ຄົບ 14 ວັນ.

ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 26 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 5,938 ຕົວຢ່າງ, ກວດພົບເຊື້ອສະສົມ 19 ຄົນ (45 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).

ການຕິດຕາມສະພາບການລະບາດຂອງປະເທດໃກ້ຄຽງ ແລະ ການລະບາດຢູ່ໃນໂລກ ເຫັນວ່າ: ມາຮອດເວລາ 6:00 ໂມງ ວັນທີ 27 ພຶດສະພາ 2020, ທົ່ວໂລກມີການລາຍງານການລະບາດ ທັງໝົດ 213 (ປະເທດ/ເຂດ). ມີການຢັ້ງຢືນ ຜູ້ຕິດເຊື້ອພະຍາດ COVID-19 ຈໍານວນ 5,659,878 ຄົນ ເພີ່ມຂຶ້ນ 75,831 ຄົນ ,ເສຍຊິວິດ 350,596 ຄົນ (2,983 ໃໝ່)  ປີ່ນປົວດີ 2,420,024ຄົນ (59,094 ໃໝ່) ປະເດັນສຳຄັນ ແມ່ນຍັງມີການລະບາດເປັນວົງກ້ວາງຢູ່ ທະວີບອາເມລິກາ ແລະ ທະວີບຍູຣົບ, ມີບາງປະເທດ ຈໍານວນຜູ້ຕິດເຊື້ອມື້ດຽວ ມີເຖິງ 17,742 ຄົນ ແລະ ເສຍຊີວິດ 692 ຄົນຕໍ່ມື້.