ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດ

Lao National Radio

ຊົມເຊີຍ ວັນສ້າງຕັ້ງພັກປະຊາຊົນປະຕິວັດລາວ
ຄົບຮອບ 65 ປີ ຢ່າງສຸດໃຈ

ຜົນກວດວິເຄາະຫາເຊື້ອພະຍາດໂຄວິດ19 ຄົນເຈັບທີ່ປິ່ນປົວຢູ່ໂຮງໝໍ ຍັງມີຜົນບວກ 2ຄົນ

ທ່ານພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດ ຄວບຄຸມໂຄວິດ19 ຖະແຫລງຕໍ່ສື່ມວນຊົນ ຕອນບ່າຍວັນທີ 21 ພຶດສະພານີ້ເຖິງສະພາບການຄວບຄຸມພະຍາດໂຄວິດ19 ຢູ່ ສປປ ລາວວ່າ:  ວຽກງານຈຸດຜ່ານດ່ານ ມື້ຜ່ານມາມີຜູ້ເດີນທາງເຂົ້າມາລາວທັງໝົດ 2,278 ຄົນ ໃນນັ້ນຈຸດຜ່ານດ່ານລາວ-ໄທ ທັງໝົດ 1,459 ຄົນ, ມີແຮງງານລາວກັບມາຈາກປະເທດໄທທັງໝົດ 79 ຄົນ ເຊິ່ງຜ່ານດ່ານສາກົນຂົວມິດຕະພາບ ແຫ່ງທີ 2 (ສະຫວັນນະເຂດ) ມີ 19 ຄົນ; ຜ່ານດ່ານສາກົນວັງເຕົົ່າ-ຊ່ອງເມັກ, ແຂວງຈໍາປາສັກ ມີ 60 ຄົນ, ເຫຼືອນັ້ນແມ່ນຄົນຂັບລົດສົົ່ງສິນຄ້າ.

ຈຸດຜ່ານດ່ານລາວຈີນ ທັງໝົດ 27 ຄົນ, ທັງໝົດແມ່ນຜູ້ຂັບລົດຂົນສົ່ງສິນຄ້າ. ຈຸດຜ່ານດ່ານລາວຫວຽດ ທັງໝົດ 792 ຄົນ, ໃນນັ້ນມີ ນັກທຸລະກິດຫວຽດ ນາມ 4 ຄົນ ແລະ ຄົນລາວກັບມາຈາກການປີ່ນປົວ 3 ຄົນ, ເຊິງໄດ້ເຂົ້າມາຜ່ານດ່ານນໍໍ້າໂສ້ຍ, ແຂວງຫົວພັນ, ເຫຼືອນັ້ນ ແມ່ນຄົນຂັບລົດສົ່ງສິນຄ້າ.ໃນທຸ ກດ່ານ ແມ່ນໄດ້ກວດວັດອຸນຫະພູມຮ່າງກາຍ ແລະ ບໍ່ມີຄົນເປັນໄຂ້.

ການເຝົ້າລະວັງ ແລະ ວິເຄາະໃນ ວັນທີ 20 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 69 ຄົນ, ໃນນັ້ນ ມີກໍລະນີສົງໄສ 7 ຄົນ, ແຮງງານລາວທີ່ກັບມາແຕ່ໄທ 60 ຄົນ, ຜູ້ຕິດເຊື້ອນອນປິ່ນປົວຢູ່ໂຮງໝໍມິດຕະພາບ 2 ຄົນ.ກໍລະນີສົງໄສ 7 ຄົນ ແມ່ນມາຈາກ ນະຄອນຫຼວງວຽງຈັນ 4 ຄົນ, ແຂວງສະຫວັນນະເຂດ 1 ຄົນ, ແຂວງວຽງຈັນ 1 ຄົນ ແລະ ເຊກອງ 1 ຄົນ. ຜົນກວດກໍລະນີສົງໄສ ແລະ ແຮງງານລາວມື້ວານນີ້ ບໍ່ພົບເຊື້ອ. ໝາຍຄວາມວ່າໃນວັນທີ 20 ພຶດສະພາ 2020 ບໍ່ມີຜູ້ຕິດເຊື້ອໃໝ່.

ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 20 ພຶດສະພາ 2020 ໄດ້ເກັບຕົວຢ່າງມາກວດທັງໝົດ ມີ 4,812 ຕົວຢ່າງ, ກວດພົບເຊື້ອສະສົມ 19 ຄົນ (39 ມື້ແລ້ວທີ່ບໍ່ພົບຜູ້ຕິດເຊື້ອໃໝ່).

ຕິດຕາມປີ່ນປົວຄົນເຈັບຢູ່ໂຮງໝໍ : ປັດຈຸບັນ, ມີຜູ້ນອນຕິດຕາມຢູ່ໂຮງໝໍມິດຕະພາບ 5 ຄົນ ຍີງ 4 ຄົນ ທັງໝົດເຫັນວ່າມີອາການປົກກະຕິ ການກວດວິເຄາະຫາເຊື້ອພະຍາດ ຈຳນວນ 2 ຄົນ, ຍັງເປັນຜົນບວກ ຈະໄດ້ສືບຕໍ່ຕິດຕາມຢູ່ໂຮງໝໍຕໍ່ໄປ.

ທ່ານພູທອນ ເມືອງປາກ ໄດ້ແນະນໍາວ່າ: ບັນດາທ່ານຈະສັງເກດເຫັນວ່າ ດ່ານຊາຍແດນສາກົນກັບປະເທດໃກ້ຄຽງແມ່ນ ໄດ້ເປີດບໍລິການທັງໝົດ ເປັນຕົ້ນວ່າ: ລາວ-ຈີນ, ລາວ-ຫວຽດນາມ, ລາວ-ກຳປູເຈ້ຍ, ລາວ-ໄທ ສະນັ້ນ, ຄົນລາວ ຫຼື ຄົນຕ່າງປະເທດ ມີຈຸດປະສົງຢາກເດີນທາງເຂົ້າ-ອອກ ປະເທດກໍ່ສາມາດດຳເນີນເອກະສານຂໍອະນຸຍາດຕາມຄຳແນະນຳກະຊວງການຕ່າງປະເທດ ແລະ ລະບຽບການຂອງປະເທດທີ່ຈະເດີນທາງໄປ.

ອີກເທື່ອໜຶ່ງ ຂໍຮຽກຮ້ອງໃຫ້ທຸກພາກສ່ວນໃນສັງຄົມ, ຊຸມຊົນ, ຄອບຄົວ ແລະ ສ່ວນບຸກຄົນ ຈົ່ງເອົາໃຈໃສ່ ທຳຄວາມເຂົ້າໃຈ ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ເລກທີ 580/ຫສນຍ ພ້ອມທັງ ຮ່ວມແຮງຮ່ວມໃຈກັນ ສືບຕໍ່ປະຕິບັດ ຈົນກວ່າຈະມີແຈ້ງການປ່ຽນແປງ ຫຼັງວັນທີ 01 ມິຖຸນາ 2020.

ບັນຫາສຳຄັນ ຂໍໃຫ້ບັນດາທ່ານເຂົ້າໃຈວ່າ ການຜ່ອນຜັນມາດຕະການຕ່າງໆ ແມ່ນນະໂຍບາຍຂອງພັກ-ລັດຖະບານທີ່ເປັນຮ່ວງເປັນໄຍຕໍ່ຜົນກະທົບດ້ານຊີວິດການເປັນຢູ່ຂອງພໍ່ແມ່ປະຊາຊົນ ແລະ ດ້ານເສດຖະກິດ-ສັງຄົມ ຊຶ່ງເປັນໂອກາດໃຫ້ພາກທຸລະກິດກໍ່ຄືພໍ່ແມ່ປະຊາຊົນບັນດາເຜົ່າໄດ້ກັບຄືນມາດຳເນີດກິດຈະການ ຫຼື ດຳເນີນຊີວິດເປັນປົກກະຕິເທື່ອລະກ້າວ ແຕ່ພ້ອມດຽວກັນນີ້ກໍ່ເປັນໂອກາດທີ່ຈະມີຄວາມສ່ຽງ ທີ່ຈະເກີດການລະບາດຮອບໃໝ່ ຖ້າຫາກວ່າພວກເຮົາ ບໍ່ປະຕິບັດວິທີການປ້ອງກັນການຕິດເຊື້ອຢ່າງເຂັ້ມງວດ ໂດຍສະເພາະຢູ່ສະຖານທີ່ໃຫ້ບໍລິການ, ພະຫະນະໃຊ້ບໍລິການ, ​ຜູ້ໃຫ້ບໍລິການ ແລະ ຜູ້ມາໃຊ້ບໍລິການ ເປັນຕົ້ນແມ່ນ: ການປະຕິບັດຫຼັກການອະນາໄມ, ການທໍາຄວາມສະອາດຂ້າເຊື້ອພະຍາດຢູ່ສະຖານທີ່ບໍລິການ, ການແທກອຸນຫະພູມຮ່າງກາຍ, ການລ້າງມືດ້ວຍນໍ້າສະອາດໃສ່ສະບູ ຫຼື ໃຊ້ເຈວລ້າງມື, ການປະຕິບັດໄລຍະຫ່າງທາງສັງຄົມ, ບໍ່ໃຫ້ມີການແອອັດ, ການໃສ່ຜ້າປິດປາກ-ດັງ ເວລາອອກຈາກບ້ານ ຫຼື ໄປສະຖານທີ່ ທີ່ມີຄວາມສ່ຽງຕໍ່ການຕິດເຊື້ອ ທັງໝົດນີ້ໃຫ້ກາຍເປັນຄວາມຊິນເຄີຍໃນການດຳລົງຊີວິດປະຈຳວັນ. ພວກເຮົາຈຶ່ງຈະສາມາດສະກັດກັ້ນ ການລະບາດຂອງພະຍາດ COVID-19 ບໍ່ໃຫ້ກັບຄືນມາຮອບໃໝ່.​ໂອກາດທີ່ມີການປ່ຽນແປງຂອງດິນຟ້າອາກາດນີ້ ກະຊວງສາທາລະນະສຸກ ບໍ່ພຽງແຕ່ຄວບຄຸມການລະບາດຂອງພະຍາດ COVID-19 ຍັງໄດ້ເອົາໃຈໃສ່ ປ້ອງກັນ ແລະ ຄວບຄຸມການລະບາດຂອງພະຍາດໄຂ້ຍຸງລາຍ ທັງໄດ້ເປີດຂະບວນການສັກຢາກັນພະຍາດທົ່ວປະເທດ. ສະນັ້ນ ຈຶ່ງຂໍເຊີນຊວນພໍ່ແມ່ປະຊາຊົນບັນດາເຜົ່າ ຈົ່ງໄດ້ເປັນເຈົ້າການໃນການທຳລາຍແຫຼ່ງເພາະພັນຍຸງລາຍ ແລະ ນຳພາລູກຫຼານໄປສັກຢາກັນພະຍາດ ຕາມຕາຕະລາງ.

 ປະຈຸບັນ ທົ່ວໂລກມີຜູ້ຕິດເຊື້ອທັງໝົດ 5.082.661ຄົນ, ເພີ່ມຂຶ້ນ 94.608 ຄົນ, ເສຍຊີວິດ 329.294ຄົນ.

-ປະເທດອາເມລິກາ ຜູ້ຕິດເຊື້ອ 1,591.991 ຄົນ, ເສຍຊີວິດ 94.994 ຄົນ, -ຣັດເຊຍ ຜູ້ຕິດເຊື້ອ 308.705 ຄົນ, ເສຍຊີວິດ 2,972 ຄົນ, ເບຼຊິນ ມີຜູ້ຕິດເຊື້ອ 293.357ຄົນ, ເສຍຊີວິດ 18.894ຄົນ,   -ແອັສປາຍ ຜູ້ຕິດເຊື້ອ 279,254 ຄົນ, ເສຍຊີວິດ 27,888 ຄົນ.

ສ່ວນປະເທດສະມາຊິກອາຊຽນ: ສິງກະໂປ: ຕິດເຊື້ອ 29.364 ຄົນ, ເສຍຊີວິດ 22 ຄົນ, -ອິນໂດເນເຊຍ: ຕິດເຊື້ອ 19.189 ຄົນ, ເສຍຊີວິດ 1.242 ຄົນ, -ຟິລິປິນ: ຕິດເຊື້ອ 13.221 ຄົນ, ເສຍຊີວິດ 842 ຄົນ, – ມາເລເຊຍ: ຕິດເຊື້ອ 7.009 ຄົນ, ເສຍຊີວິດ 114 ຄົນ, -ໄທ: ຕິດເຊື້ອ 3.034 ຄົນ, ເສຍຊີວິດ 56 ຄົນ, -ຫວຽດນາມ: ຕິດເຊື້ອ 324 ຄົນ, ບໍ່ມີຜູ້ເສຍຊີວິດ, -ມຽນມາ: ຕິດເຊື້ອ 199 ຄົນ, ເສຍຊີວິດ 6 ຄົນ, -ບຣູໄນ: ຕິດເຊື້ອ 141 ຄົນ, ເສຍຊີວິດ 1 ຄົນ, -ກຳປູເຈຍ: ຕິດເຊື້ອ 122 ຄົນ, ປົວດີໝົດແລ້ວ, -ຕີມໍເລສເຕ: ຕິດເຊື້ອ 24 ຄົນ,  ປົວດີໝົດແລ້ວ.