ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜົນກວດວິເຄາະຫາເຊື້ຶອຄົນເຈັບກໍລະນີທີ 20 ທັງ 3ຄັ້ງຜ່ານມາຍັງພົບເຊື້ອເປັນບວກ

ດຣ. ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ. ຖະແຫລງໃນຕອນເຊົ້າວັນທີ 6 ສິງຫາ 2020 ເຖິງສະພາບການຄວບຄຸມ ພະຍາດໂຄວິດ19ວ່າ:, ມື້ຜ່ານມາ ຈຸດຜ່ານແດນຕ່າງໆທົ່ວປະເທດມີຜູ້ເດີນທາງເຂົ້າມາ ມີທັງໝົດ 2,275 ຄົນ: ໃນນັ້ນຈຸດຜ່ານດ່ານລາວ-ໄທ 1,392 ຄົນ ມີແຮງງານລາວກັບມາແຕ່ໄທ 207 ຄົນ; ຈຸດຜ່ານດ່ານລາວ – ຈີນ 17 ຄົນ, ທັງໝົດ ແມ່ນຄົນຂັບລົດສົ່ງສິນຄ້າ; ຈຸດຜ່ານດ່ານລາວ – ຫວຽດນາມ 708 ຄົນ, ທັງໝົດ ແມ່ນຄົນຂັບລົດສົ່ງສິນຄ້າ, ເດີນທາງຜ່ານສະໜາມບິນສາກົນວັດໄຕ 158 ຄົນ, ທັງໝົດແມ່ນຄົນຈີນ; ທຸກຄົນໄດ້ແທກອຸນຫະພູມຮ່າງກາຍ, ແລະເກັບຕົວຢ່າງມາກວດ ແລ້ວນຳສົ່ງໄປຫາສະຖານທີ່ ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.
ດຣ. ລັດສະໝີ ວົງຄຳຊາວ ໃຫ້ຮູ້ເຖິງວຽກງານວິເຄາະ ແລະ ຄົ້ນຫາຜູ້ຕິດເຊື້ອພະຍາດວ່າ: ວັນທີ 5 ສິງຫາ 2020, ໄດ້ເກັບຕົວຢ່າງມາກວດວິເຄາະທັງໝົດ 380 ຄົນ, ໃນນັ້ນ ແຮງງານລາວມາແຕ່ໄທ 83 ຕົວຢ່າງ, ແຮງງານລາວມາແຕ່ ມາເລເຊຍ 22 ຕົວຢ່າງ, ແຮງງານລາວມາແຕ່ຫວຽດນາມ 9 ຕົວຢ່າງ, ແຮງງານຈີນ 255 ຕົວຢ່າງ, ແຮງງານຫວຽດນາມ 3 ຕົວຢ່າງ, ບຸກຄົນທົ່ວໄປທີ່ບໍ່ມີອາການ 7 ຕົວຢ່າງ ແລະ ຜູ້ຕິດເຊື້ອກໍລະນີ ທີ 20 ມາກວດຄືນ ເປັນຄັ້ງທີ 3; ຜົນກວດວິເຄາະທັງໝົດແມ່ນ ບໍ່ພົບເຊື້ອ ໝາຍຄວາມວ່າໃນວັນທີ 5 ສິງຫາ 2020 ບໍ່ມີຜູ້ຕິດເຊື້ອໃໝ່, ແຕ່ສຳລັບຜູ້ຕິດເຊື້ອກໍລະນີ ທີ 20 ທີ່ກວດຊອກຫາເຊື້ອຄືນຄັ້ງທີ 3 ຜົນກວດແມ່ນຍັງພົບເຊື້ອຢູ່.
ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 05 ສິງຫາ 2020 ໄດ້ເກັບຕົວຢ່າງມາກວດທັງໝົດ 29,374 ຕົວຢ່າງ, ກວດພົບເຊື້ອສະສົມ 20 ຄົນ.
ນອກຈາກເຝົ້າລະວັງ ແລະຄວບຄຸມໂຄວິດ19ແລ້ວ ກະຊວງສາທາລະນະສຸກຍັງໄດ້ເອົາໃຈໃສ່ ສະພາບການລະບາດຂອງພະຍາດໄຂ້ຍຸງລາຍ ສະເພາະວັນທີ 5 ສິງຫາ 2020 ລາວ ເຮົາ ມີຜູ້ຕິດເຊື້ອໄຂ້ຍຸງລາຍທັງໝົດ 49 ກໍລະນີ, ນັບແຕ່ວັນທີ 01/01/2020-05/08/2020 ມີຜູ້ຕິດເຊື້ອກໍລະນີສະສົມທັງໝົດ 4,455 ຄົນ, ມີລາຍງານຫຼາຍກວ່າໝູ່ແມ່ນ ນະຄອນຫຼວງວຽງຈັນ ມີເຖິງ 1,017 ຄົນ, ຖັດລົງມາແມ່ນແຂວງ ວຽງຈັນ 457 ກໍລະນີ, ບໍລິຄຳໄຊ 523 ກໍລະນີ ແລະ ແຂວງອັດຕະປື 373 ກໍລະນີ). ຈຳນວນຜູ້ເສຍຊີວິດຍ້ອນພະຍາດໄຂ້ຍຸງລາຍມີ ທັງໝົດ 9 ຄົນ, ໃນນັ້ນນະຄອນຫຼວງ 4 ຄົນ, ບໍລິຄຳໄຊ 2 ຄົນ, ຄຳມ່ວນ 1 ຄົນ, ໄຊຍະບູລີ 1 ຄົນ ແລະ ຊຽງຂວາງ 1 ຄົນ;
ດັ່ງນັ້ນ, ກະຊວງສາທາລະນະສຸກຈຶ່ງຮຽກຮ້ອງໃຫ້ປະຊາຊົນ, ຊຸມຊົນ ແລະ ອຳນາດການປົກຄອງ ຮ່ວມແຮງຮ່ວມໃຈກັນ ໃນການປ້ອງກັນບໍ່ໃຫ້ຍຸງກັດ ແລະ ທຳລາຍແຫຼ່ງເພາະພັນຂອງຍຸງເປັນປະຈຳທຸກໆອາທິດ ໃຫ້ຖືວ່າ ແມ່ນໜ້າທີ່ຮັບຜິດຊອບຂອງໝົດທຸກຄົນ; ຖ້າຫາກທ່ານເປັນໄຂ້ ໃຫ້ຮີບຮ້ອນໄປພົບແພດໝໍດ່ວນ ເພື່ອຮັບການປິ່ນປົວແຕ່ຫົວທີ ໃຫ້ທ່ວງທັນກັບເວລາ, ບໍ່ໃຫ້ຊື້ຢາມາກິນເອງ. ພ້ອມດຽວກັນນັ້ນ ກໍຮຽກຮ້ອງໃຫ້ບັນດາທ່ານປະຕິບັດຕາມ 5 ປ ຢ່າງຖືກຕ້ອງ ແລະ ເຂັ້ມງວດ ກໍ່ຈະສາມາດຫຼຸດຜ່ອນ, ປ້ອງກັນການເຈັບເປັນ ແລະ ສະກັດກັ້ນການແຜ່ລະບາດຂອງເຊື້ອພະຍາດໄຂ້ຍຸງລາຍ ໃຫ້ຫຼຸດລົງເທື່ອລະກ້າວ.