ຄະນະກໍາມະການສູນກາງພັກກອມມູນິດຈີນ ສະໄໝທີ XX ຈັດກອງປະຊຸມຄັ້ງປະຖົມມະລຶກຂອງຕົນຂຶ້ນໃນຕອນເຊົ້າວັນທີ 23 ຕຸລາ 2022 ທີ່ຫໍປະຊຸມສະພາປະຊາ ຊົນແຫ່ງຊາດຈີນ ຢູ່ນະຄອນຫລວງປັກກິ່ງ ພາຍຫລັງສໍາເລັດກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ ທີ່ຈັດຂຶ້ນລະຫວ່າງວັນທີ 16-22 ຕຸລາ 2022.
ກອງປະຊຸມໄດ້ຕົກລົງເຫັນດີເລືອກເອົາກົມການເມືອງສູນກາງພັກກອມມູນິດຈີນ ຊຸດໃຫມ່ (ສະໄໝທີ XX ) ຈຳນວນ 24 ສະຫາຍ, ເລືອກເອົາຄະນະປະຈຳກົມການເມືອງສູນກາງພັກກອມມູນິດຈີນ ຊຸດໃໝ່ ຈໍານວນ 7 ສະຫາຍ ປະກອບມີ: ສະຫາຍ ສີ ຈິ້ນຜິງ, ສະຫາຍ ຫຼີ ສຽງ, ສະຫາຍ ຈ້າວ ເລີ້ຈີ້, ສະຫາຍ ຫວາງ ຮູ້ໜິງ, ສະຫາຍ ຊ້າຍສີ, ສະຫາຍ ຕິ່ງ ເຊສຽງ ແລະ ສະຫາຍ ຫຼີ ຊີ.
ກອງປະຊຸມໄດ້ເຫັນດີເປັນເອກະສັນເລືອກເອົາ ສະຫາຍ ສີ ຈິ້ນຜິງ ເປັນເລຂາທິການໃຫຍ່ຄະນະກໍາມະການສູນກາງພັກກອມມູນິດຈີນ ຊຸດໃໝ່, ເຊີ່ງເປັນສະໄໝທີ 3 ຕິດຕໍ່ກັນ ແລະ ເລືອກເອົາຄະນະເລຂາທິການຄະນະກໍາມະການສູນ ກາງພັກກອມມູນິດຈີນ ຊຸດໃໝ່ ຈໍານວນ 7 ສະຫາຍ.
ກອງປະຊຸມ ຍັງໄດ້ເລືອກເອົາປະທານ, ຮອງປະທານ ແລະ ຄະນະກໍາມະການການທະຫານສູນກາງຈີນ ຊຸດໃໝ່ ໂດຍເຫັນດີເລືອກເອົາ ສະຫາຍ ສີ ຈິ້ນຜິງ ເປັນປະທານ.
ນອກຈາກນີ້ ຍັງໄດ້ເລືອກເອົາປະທານ, ຮອງປະທານ ແລະ ຄະນະກໍາມະການກວດກາວິໄນສູນກາງພັກກອມມູ ນິດຈີນ ຊຸດໃຫມ່ ໂດຍເຫັນດີເລືອກເອົາ ສະຫາຍ ຫລີ ຊີ ເປັນປະທານ.
ພາຍຫລັງສໍາເລັດກອງປະຊຸມຄັ້ງປະຖົມມະລຶກຂອງຄະ ນະກໍາມະການສູນກາງພັກກອມມູນິດຈີນ ສະໄໝທີ XX, ໃນຕອນທ່ຽງຂອງວັນດຽວກັນນີ້ ຄະນະປະຈຳກົມການເມືອງສູນກາງພັກກອມມູນິດຈີນ ຊຸດໃໝ່ ຈໍານວນ 7 ສະຫາຍ ໄດ້ຖະແຫລງຂ່າວຕໍ່ສື່ມວນຊົນຈີນ ແລະ ສື່ມວນຊົນຕ່າງປະເທດ.
ໃນໂອກາດນີ້, ສະຫາຍ ສີ ຈິ້ນຜິງ, ເລຂາທິການໃຫຍ່ຄະ ນະກໍາມະການສູນກາງພັກກອມມູນິດຈີນ ໄດ້ຢືນຢັນວ່າ: ຈີນ ຈະຍຶດໝັ້ນຊຸກຍູ້ການພັດທະນາທີ່ມີຄຸນນະພາບສູງຢ່າງເດັດດ່ຽວບໍ່ປ່ຽນແປງ, ສ້າງໂອກາດໃຫມ່ໃຫ້ແກ່ໂລກຫຼາຍກວ່າເກົ່າດ້ວຍການພັດທະນາຕົນເອງ ຈາກຄວາມເປັນທັນສະໄໝແບບຈີນ ເຊິ່ງແມ່ນໝາກຜົນທີ່ໄດ້ຮັບຈາກການຄົ້ນຄວ້າ ແລະ ການປະຕິບັດຕົວຈິງມາເປັນໄລຍະຍາວນານພາຍໃຕ້ການນໍາພາຂອງພັກກອມມູນິດຈີນ, ແມ່ນພາ ລະກິດທີ່ຍິ່ງໃຫຍ່ ແລະ ເຕັມໄປດ້ວຍຄວາມຫຍຸ້ງຍາກລຳ ບາກ. ໃນຂະບວນວິວັດແຫ່ງການອອກເດີນທາງຄັ້ງໃໝ່, ພັກກອມມູນິດຈີນຈະສືບຕໍ່ຍຶດໝັ້ນທຸກສິ່ງທຸກຢ່າງແມ່ນມາຈາກປະຊາຊົນ ແລະ ເພື່ອປະຊາຊົນ, ແນໃສ່ເຮັດໃຫ້ປະຊາຊົນຈີນນັບມືິ້ມີຢູ່ມີກິນ ແລະ ມີຊີວິດການເປັນຢູ່ທີ່ດີຂຶ້ນຢ່າງບໍ່ຢຸດຢັ້ງ.
ສະຫາຍ ສີ ຈິ້ນຜິງ ກ່າວເນັ້ນໜັກວ່າ: ພັກກອມມູນິດຈີນຈະສືບຕໍ່ປະຕິຮູບຕົນເອງໃຫ້ດີຂຶ້ນຢ່າງຕໍ່ເນື່ອງ, ຊຸກຍູ້ການກໍ່ສ້າງພັກຢ່າງເຂັ້ມແຂງຮອບດ້ານ ເພື່ອເຮັດໃຫ້ພັກທີ່ມີປະຫວັດສາດມາເປັນເວລາຮ້ອຍປີເຕັມໄປດ້ວຍພະລັງຊີວິດຊີວາໃໝ່ຢ່າງບໍ່ຢຸດຢັ້ງໃນການປະຕິຮູບຕົນເອງ, ພ້ອມທັງກາຍເປັນຫົວໃຈສໍາຄັນທີ່ເຂັ້ມແຂງທີ່ສຸດ ແລະ ໄວ້ໃຈໄດ້ທີ່ສຸດຂອງປະຊາຊົນຈີນຕະຫຼອດໄປ. ເຖິງຢ່າງໃດກໍ ຕາມ ການພັດທະນາຂອງຈີນແມ່ນປາສະຈາກໂລກບໍ່ໄດ້, ຂະນະດຽວກັນການພັດທະນາຂອງໂລກກໍປາສະຈາກຈີນບໍ່ໄດ້ເຊັ່ນດຽວກັນ, ປະເທດຈີນຈະຮ່ວມກັບປະຊາຊົນຂອງບັນດາປະເທດຢູ່ໃນໂລກສົ່ງເສີມຄ່ານິຍົມຮ່ວມຂອງມວນມະນຸດທີ່ມີສັນຕິພາບ, ການພັດທະນາ, ຍຸຕິທຳ, ຄວາມເປັນທຳ, ປະຊາທິປະໄຕ ແລະ ເສລີພາບ, ຮັກສາສັນຕິພາບຂອງໂລກ, ຊຸກຍູ້ການພັດທະນາຂອງໂລກແລະສືບຕໍ່ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດໃຫ້ນັບມື້ດີຂຶ້ນກວ່າເກົ່າ.
