ໃນຕອນບ່າຍຂອງວັນທີ 8 ມັງກອນ 2021 ທ່ານ ຈະເລີນ ເຢຍປາວເຮີ ໂຄສົກລັດຖະບານ ໄດ້ ຖະແຫຼງຜົນຂອງກອງປະຊຸມລັດຖະບານ ຊຸດທີ VIII ເປີດກວ້າງທ້າຍສະໄໝ. ກອງປະຊຸມຄັ້ງນີ້ ໄດ້ໄຂຂຶ້ນໃນວັນທີ 7 ແລະ ປິດລົງໃນວັນທີ 8 ມັງກອນ 2021 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ; ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ, ນາຍົກລັດຖະມົນຕີ; ໂດຍມີບັນດາທ່ານຮອງນາຍົກລັດຖະມົນຕີ, ສະມາຊິກລັດຖະບານ, ເຈົ້າຄອງນະຄອນຫຼວງວຽງຈັນ, ເຈົ້າແຂວງທົ່ວປະເທດ, ຜູ້ຕາງໜ້າອົງການຈັດຕັ້ງພັກ, ສະພາແຫ່ງຊາດ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດ, ອົງການຈັດຕັ້ງມະຫາຊົນຂັ້ນສູນກາງ ພ້ອມດ້ວຍແຂກຖືກເຊີນ ເຂົ້າຮ່ວມ.
ກອງປະຊຸມລັດຖະບານເປີດກວ້າງ ຄັ້ງນີ້ ໄດ້ພ້ອມກັນ ຄົ້ນຄວ້າ, ປຶກສາຫາລື ແລະ ພິຈາລະນາ 10 ເອກະສານສໍາຄັນ ຄື:
1. ກອງປະຊຸມໄດ້ຮັບຟັງການລາຍງານ ກ່ຽວກັບການລາຍງານການຈັດຕັ້ງປະຕິ ບັດວຽກງານຂອງລັດຖະບານ ຊຸດທີ VIII (2016-2020) ໂດຍ,ໄດ້ພາກັນທົບທວນການຈັດຕັ້ງປະຕິບັດໜ້າທີ່ວຽກງານ ແລະ ພາລະກິດຂອງລັດຖະບານ ທີ່ຖືກມອບ ໝາຍຕາມລັດຖະທໍາມະນູນ ແລະ ກົດ ໝາຍ. ຜ່ານການສະຫຼຸບຕີລາຄາຈາກກອງປະຊຸມ ກໍ່ເຫັນໄດ້ຜົນງານ, ຜົນສໍາເລັດຫຼາຍຢ່າງ ທີ່ເປັນຮູບປະທໍາ, ເຖິງວ່າໄດ້ມີອຸປະສັກ, ສິ່ງກີດຂວາງ ແລະ ມີຫຼາຍເຫດ ການເກີດຂຶ້ນ ທີ່ບໍ່ຄາດຄະເນໄວ້ກ່ອນໄດ້ ໃນໄລຍະແຫ່ງການປະຕິບັດໜ້າທີ່ຂອງລັດຖະບານພວກເຮົາ. ຜົນສໍາເລັດທີ່ພວກເຮົາຍາດມາໄດ້ນັ້ນ ນອກຈາກຄວາມອົດ ທົນພະຍາຍາມເຮັດວຽກງານດ້ວຍຄວາມທຸ້ມເທ, ເສຍສະຫຼະຂອງສະມາຊິກລັດ ຖະບານ ຢ່າງເປັນປຶກແຜ່ນແໜ້ນໜາແລ້ວ, ພວກເຮົາຍັງໄດ້ຮັບການຊີ້ນໍາຢ່າງໃກ້ຊິດຈາກກົມການເມືອງ, ຄະນະເລຂາທິການສູນກາງພັກ, ໄດ້ຮັບການສະໜັບສະໜູນຊ່ວຍເຫຼືອຮ່ວມມືຈາກສະພາແຫ່ງຊາດ ບັນດາອົງການຈັດຕັ້ງຂອງພັກ, ຂອງລັດ, ອົງການ ຈັດຕັ້ງມະຫາຊົນ ແລະ ປະຊາຊົນ ໃນທົ່ວປະເທດມາເປັນຢ່າງດີຕະຫຼອດເກືອບ 5 ປີ ຜ່ານມາ.
ແຕ່ເຖິງຢ່າງໃດກໍ່ຕາມ ຜ່ານການປະຕິບັດໜ້າທີ່ ແລະ ບໍລິຫານປະເທດເກືອບ 5 ປີ ຜ່ານມານັ້ນ ພວກເຮົາກໍ່ຍັງຊອກເຫັນບັນດາຈຸດອ່ອນ, ຂໍ້ຄົງຄ້າງ ທີ່ສໍາຄັນຈໍານວນບໍ່ໜ້ອຍ ຊຶ່ງລັດຖະບານຊຸດນີ້ ຈະພະຍາຍາມແກ້ໄຂໃນເວລາ 3 ເດືອນຕໍ່ໜ້າ ທີ່ລັດຖະບານຍັງມີໜ້າທີ່ບໍລິຫານປະເທດ ຕາມກົດໝາຍຢູ່ນັ້ນ ເພື່ອສ້າງພື້ນຖານໃຫ້ແກ່ລັດຖະບານ ຊຸດທີ IX ສືບຕໍ່ດໍາເນີນການຕໍ່ໄປ ເພື່ອພາລະກິດອັນໃຫຍ່ຫຼວງຂອງຊາດ, ນໍາພາປະເທດຊາດກ້າວໄປຢ່າງບໍ່ຢຸດຢັ້ງ.
ກອງປະຊຸມ ໄດ້ຊີ້ນໍາ ໃຫ້ພາກສ່ວນທີ່ກ່ຽວຂ້ອງໃຫ້ຕີລາຄາ ແລະ ຂຽນໃຫ້ຈະແຈ້ງຕື່ມ ກ່ຽວກັບດ້ານດີ-ຂໍ້ຄົງຄ້າງໃນການປະຕິບັດລະບອບແບບແຜນ, ກົນໄກການປະສານງານລະຫວ່າງລັດຖະບານ ກັບ ອົງການປົກຄອງທ້ອງຖິ່ນ, ການປະ ສານງານລະຫວ່າງສຳນັກງານນາຍົກລັດ ຖະມົນຕີ ກັບ ບັນດາກະຊວງ, ອົງການທຽບເທົ່າ, ນະຄອນຫຼວງວຽງຈັນ ແລະ ອົງການປົກຄອງທ້ອງຖິ່ນ ເພື່ອເປັນພື້ນ ຖານໃຫ້ຄະນະລັດຖະບານຊຸດຕໍ່ໄປ ຖອດຖອນບົດຮຽນ ແລະ ສືບຕໍ່ປັບປຸງ, ນອກນັ້ນໃຫ້ກຳນົດກົນໄກການຈັດຕັ້ງປະ ຕິບັດມະຕິ, ຄຳສັ່ງ ແລະ ທິດຊີ້ນໍາຂອງລັດຖະບານ ໃຫ້ແຂງແຮງກວ່າເກົ່າ, ພ້ອມກັນນັ້ນ ກໍໃຫ້ສຸມໃສ່ການຫັນການບໍລິຫານລັດ ເປັນທັນສະໄໝ ໃຫ້ເປັນຮູບປະທຳ.
2. ກອງປະຊຸມ ໄດ້ຮັບຟັງການລາຍງານ ກ່ຽວກັບການສະຫຼຸບການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ ແຫ່ງຊາດ 5 ປີ ຄັ້ງທີ VIII (2016-2020) ແລະ ຮ່າງແຜນພັດທະນາເສດຖະ ກິດ- ສັງຄົມແຫ່ງຊາດ 5 ປີ ຄັ້ງທີ IX (2021- 2025) ຊຶ່ງ. ກອງປະຊຸມ ໄດ້ສັງເກດຕີລາຄາວ່າ ກ່ຽວກັບການສະຫຼຸບການຈັດຕັ້ງປະຕິບັດແຜນພັດທະນາເສດ ຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII (2016-2020) ແລະ ຮ່າງແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025), ໃນໄລຍະຜ່ານມາໄດ້ມີການຈັດສຳມະນາ ແລະ ທາບທາມຄຳຄິດເຫັນແບບເປີດກວ້າງ, ຜ່ານກອງປະ ຊຸມລັດຖະບານ, ກອງປະຊຸມກົມການເມືອງສູນກາງພັກ, ກອງປະຊຸມສະພາແຫ່ງຊາດ ແລະ ກອງປະຊຸມສູນກາງຫຼາຍຄັ້ງແລ້ວ, ເທື່ອນີ້ມາຜ່ານລັດຖະບານຕື່ມເປັນເທື່ອສຸດທ້າຍ ເພາະມີການປັບປຸງຕື່ມບາງຈຸດ. ສະນັ້ນ, ກອງະຊຸມ ຈຶ່ງສະເໜີໃຫ້ກະຊວງແຜນການ ແລະ ການລົງທຶນ ສືບຕໍ່ຮຽບຮຽງ ແລະ ປັບປຸງຮ່າງແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX (2021-2025) ຕາມການປະກອບຄໍາເຫັນຂອງກອງປະຊຸມລັດຖະບານເປີດກວ້າງເທື່ອນີ້ຕື່ມ ເພື່ອກະກຽມນໍາເອົາຮ່າງແຜນດັ່ງກ່າວ ເຂົ້າພິຈາລະນາຂໍທິດຊີ້ນຳຈາກໃນກອງປະຊຸມໃຫ່ຍຜູ້ແທນທົ່ວປະເທດ ຄັ້ງທີ XI ຂອງພັກ ແລະ ນຳສະເໜີຜ່ານກອງປະຊຸມຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ IX ຮັບຮອງຢ່າງເປັນທາງການ ໃນຂັ້ນຕໍ່ໄປ.
3. ກອງປະຊຸມ ໄດ້ຮັບຟັງການລາຍງານ ກ່ຽວກັບການຈັດຕັ້ງປະຕິບັດຄໍາສັ່ງເລກ ທີ 02/ນຍ, ລົງວັນທີ 1 ກຸມພາ 2018 ແລະ ຄໍາສັ່ງ ເລກທີ 03/ນຍ, ລົງວັນທີ 21 ມັງກອນ 2020. ຜ່ານການປະກອບຄຳເຫັນ, ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງນໍາໄປປັບປຸງຕາມການປະກອບຄໍາເຫັນຂອງສະມາຊິກລັດຖະບານ ເປັນຕົ້ນ:
– 1) ບັນດາຕົວຊີ້ວັດທີ່ໄດ້ກຳນົດໃນຄຳສັ່ງແລ້ວ, ແຕ່ຂະແໜງການກ່ຽວຂ້ອງ ຍັງບໍ່ທັນປັບປຸງສຳເລັດ ແມ່ນໃຫ້ຮີບຮ້ອນປັບ ປຸງ ແລະ ແກ້ໄຂໃຫ້ສຳເລັດໃນທ້າຍກ່ອນເດືອນ ມີນາ 2021.
– 2) ບັນຫາໃດທີ່ຂະແໜງການກ່ຽວຂ້ອງ ທີ່ໄດ້ປັບປຸງແກ້ໄຂທາງດ້ານນິຕິກຳ ແລະ ລະບຽບການແລ້ວ ແຕ່ການຈັດຕັ້ງປະຕິ ບັດຕົວຈິງ ຍັງບໍ່ໄປບໍ່ມາ ຫຼື ຍັງບໍ່ທັນເປັນເອກະພາບ ແມ່ນໃຫ້ກະຊວງແຜນການ ແລະ ການລົງທຶນ ຮີບຮ້ອນຊຸກຍູ້ພາກ ສ່ວນກ່ຽວຂ້ອງປະຕິບັດໂດຍໄວ.
3) ກ່ຽວກັບການສະເໜີແຕ່ງຕັ້ງຄະນະຈາກຫ້ອງວ່າການສຳນັກງານນາຍົກລັດຖະມົນຕີ ເພື່ອຊ່ວຍຕິດຕາມການຈັດຕັ້ງປະຕິບັດຄຳສັ່ງ 02/ນຍ ນັ້ນ, ມອບ ໃຫ້ຫ້ອງວ່າການສຳນັກງານນາຍົກລັດຖະ ມົນຕີ ປຶກສາຫາກັບກະຊວງແຜນການ ແລະ ການລົງທຶນ ແລະ ພາກສ່ວນກ່ຽວ ຂ້ອງ ໃຫ້ເປັນເອກະພາບກັນຕື່ມ, ຖ້າແຕ່ງ ຕັ້ງອີກ ຈະມີກົນໄກການແບ່ງຄວາມຮັບຜິດ ຊອບກັບຄະນະທີ່ໄດ້ແຕ່ງຕັ້ງແລ້ວນັ້ນແນວໃດ ຈະບໍ່ເປັນການຊໍ້າຊ້ອນບໍ ?, ຖ້າປຶກສາຫາລືກັນແລ້ວ ເຫັນວ່າມີຄວາມຈຳເປັນ ແລະ ບໍ່ເປັນການເຮັດວຽກຊໍ້າຊ້ອນກັນ ກໍເຫັນດີໃຫ້ແຕ່ງຕັ້ງ.
4- ) ໃຫ້ກະຊວງແຜນການ ແລະ ການລົງທຶນ ສົມທົບກັບພາກສ່ວນກ່ຽວຂ້ອງ ສືບຕໍ່ປັບປຸງກົນໄກການປະສານງານໃນການອຳນວຍຄວາມສະດວກ ແລະ ການປັບປຸງສະພາບແວດລ້ອມໃນການລົງທຶນ ລະຫວ່າງຂະແໜງການກ່ຽວ ຂ້ອງໃຫ້ວ່ອງໄວຂຶ້ນກວ່າເກົ່າ. ພ້ອມກັນນັ້ນ ກໍ່ໃຫ້ສົມທົບກັບຂະແໜງການກ່ຽວຂ້ອງ, ສະພາການຄ້າ ແລະ ອຸດສາຫະ ກຳແຫ່ງ ຊາດ ເພື່ອຄົ້ນຄວ້າ ແລະ ປັບປຸງຄຳສັ່ງ 02/ນຍ ເພື່ອໃຫ້ທັນກັບສະພາບການ.
5- ) ໃຫ້ກະຊວງແຜນການ ແລະ ການລົງທຶນ, ກະຊວງອຸດສາຫະກຳ ແລະ ການຄ້າ, ກະຊວງການເງິນ ແລະພາກສ່ວນທີ່ກ່ຽວຂ້ອງ ສືບຕໍ່ຄົ້ນຄວ້າການເຊື່ອມໂຍງລະບົບຂໍ້ມູນຜ່ານລະບົບເອີເລັກໂຕຣນິກ ເຂົ້າໃນການຄົ້ນຄວ້າ ເຂົ້າໃນການອອກອະນຸຍາດລົງທຶນ, ການຂຶ້ນທະບຽນວິສາຫະກິດ ແລະ ທະບຽນອາກອນ;.
6- ) ໃຫ້ກະຊວງແຜນການ ແລະ ການລົງທຶນ ສົມທົບກັບພາກສ່ວນທີ່ກ່ຽວຂ້ອງ ສືບຕໍ່ຕິດຕາມ ແລະ ຊຸກຍູ້ ບັນດາຂະ ແໜງ ການ ໃຫ້ຮີບຮ້ອນໃນການປັບປຸງບັນຊີກິດຈະການຄວບຄຸມ, ການສ້າງບັນຊີຮຽກການລົງທຶນ (CallingList) ແລະ ການສ້າງລາຍການເອກະສານ ທີ່ຕ້ອງໄດ້ປະກອບຕາມແບບຟອມຄໍາຮ້ອງສຳລັບຂໍອະນຸມັດການລົງທຶນ (Checklist) ໃຫ້ສຳເລັດ.
– ໃຫ້ກະຊວງແຜນການ ແລະ ການລົງທຶນ ສົມທົບກັບຂະແໜງການ ກ່ຽວຂ້ອງ ແລະ ທ້ອງຖິ່ນ ຊຸກຍູ້ ຕິດຕາມ ແລະ ກວດກາການຈັດຕັ້ງປະຕິບັດໂຄງການຕ່າງໆ ທີ່ໄດ້ຮັບອະນຸມັດໄປແລ້ວ ໃຫ້ສອດຄ່ອງຕາມສັນຍາສຳປະທານ ແລະ ຕາມກົດໝາຍ, ລະບຽບການກ່ຽວຂ້ອງ ຂອງ ສປປ ລາວ.
4. ກອງປະຊຸມ ໄດ້ຮັບຟັງການລາຍງານກ່ຽວກັບຮ່າງແຜນຍຸດທະສາດການສົ່ງເສີມຜະລິດສິນຄ້າ ຕິດພັນກັບກົນໄກການເຂົ້າເຖິງຕະຫຼາດຈຳໜ່າຍສິນຄ້າ ແລະ ການຄ້າຊາຍແດນ. ຕໍ່ກັບຮ່າງຍຸດທະສາດດັ່ງກ່າວ ກອງປະຊຸມ ໄດ້ຊີ້ ນໍາໃຫ້ພາກສ່ວນທີ່ກ່ຽວຂ້ອງນໍາໄປປັບປຸງຕາມການປະກອບຄໍາເຫັນຂອງກອງປະຊຸມ ແລະສະມາຊິກລັດຖະບານ ເປັນຕົ້ນ ມອບໃຫ້ຄະນະຮັບຜິດຊອບ ທີ່ໄດ້ຮັບການແຕ່ງຕັ້ງ ຕາມຂໍ້ຕົກລົງ 99/ນຍ ສືບຕໍ່ສົມທົບກັບບັນດາຂະແໜງການທີ່ກ່ຽວຂ້ອງ ແລະ ທ້ອງຖິ່ນ ແກ້ໄຂ 8 ຂໍ້ຄົງຄ້າງໃນການສົ່ງເສີມການຜະລິດສິນຄ້າໃນໄລຍະຜ່ານມາໃຫ້ເປັນຮູບປະທໍາ. ພ້ອມກັນນັ້ນ ກໍໃຫ້ກໍານົດກົນໄກການປະ ສານງານ ແລະ ແບ່ງຄວາມຮັບຜິດຊອບລະຫວ່າງຂະແໜງການກ່ຽວຂ້ອງຂັ້ນສູນ ກາງ, ການປະສານງານລະຫວ່າງສູນກາງ ແລະ ທ້ອງຖິ່ນ ໃຫ້ລະອຽດ ແລະ ຈະແຈ້ງ; ໃຫ້ແຕ່ລະທ້ອງຖິ່ນ ກຳນົດສິນຄ້າທີ່ເປັນທ່າແຮງຂອງທ້ອງຖິ່ນຕົນ ເພື່ອຊຸກຍູ້ສົ່ງເສີມໃຫ້ຖືກກັບເປົ້າໝາຍ ແລະ ທ່າແຮງ ທີ່ທ້ອງຖິ່ນຕົນມີ. ພ້ອມດຽວກັນນີ້, ເຫັນດີໃຫ້ຄະນະສະເພາະກິດດັ່ງກ່າວ ຄົ້ນຄວ້າ ແລະ ເຮັດເປັນຍຸດທະສາດ ຕາມໂຄງຮ່າງເບື້ອງຕົ້ນທີ່ກະຊວງແຜນການ ແລະ ການລົງທຶນ ໄດ້ສະເໜີແລ້ວນັ້ນໃຫ້ສຳເລັດໂດຍໄວ ເພື່ອກຳນົດທິດທາງແຜນວຽກ ແລະ ແບ່ງຄວາມຮັບຜິດຊອບລະອຽດ.
5. ກອງປະຊຸມ ໄດ້ຮັບຟັງການລາຍງານ ກ່ຽວກັບ ການຄົ້ນຄ້ວາການຫັນຊັບສິນຂອງລັດເປັນທຶນ, ກອງປະຊຸມ ໄດ້ຕີລາຄາວ່າ: ວຽກງານການຫັນຊັບສິນເປັນທຶນ ເປັນວຽກໃໝ່ທີ່ພວກເຮົາຍັງບໍ່ທັນມີບົດຮຽນ, ເຖິງວ່າຕົວຈິງຜ່ານມາໄດ້ມີການຫັນຊັບສິນ ເປັນທຶນ ແຕ່ເຫັນວ່າການປະຕິບັດຍັງບໍ່ທັນເປັນເອກະພາບກັນ ເຮັດໃຫ້ລັດເສຍຜົນປະໂຫຍດຈຳນວນບໍ່ໜ້ອຍ, ສະນັ້ນ ກອງປະຊູມ ຈຶ່ງສະເໜີມອບໃຫ້ຄະນະຮັບຜິດຊອບຊີ້ນຳການຫັນຊັບສິນຂອງລັດເປັນທຶນ ຕາມຂໍ້ຕົກ ລົງ ສະບັບເລກທີ 98/ນຍ ສືບຕໍ່ຄົ້ນຄວ້າໃຫ້ລະອຽດຮູບແບບການຫັນຊັບສິນເປັນທຶນ, ບັນດາຫົວໜ່ວຍວິສາຫະກິດຂອງລັດ ທີ່ຈະຫັນເປັນທຶນ ຫຼື ຫັນເປັນຮຸ້ນສ່ວນ, ວິທີການຫັນເປັນທຶນ ແລະ ກົນໄກໃນການຈັດຕັ້ງປະຕິບັດຕົວຈິງໃຫ້ລະ ອຽດ ໂດຍສ້າງເປັນນິຕິກຳ. ສໍາລັບໃນສະເພາະໜ້າ, ເຫັນດີໃຫ້ຄະນະຮັບຜິດຊອບ ຈັດຕັ້ງປະຕິບັດຕາມທິດທາງທີ່ຄະນະໄດ້ສະເໜີມານັ້ນ, ໃນນັ້ນ ເຫັນດີໃຫ້ມີການຄົ້ນຄວ້າ ແລະ ພິຈາລະນາການຫັນເປັນທຶນ ຫຼື ຫັນເປັນຮຸ້ນສ່ວນ ບັນດາລັດວິສາຫະກິດຈຳນວນໜຶ່ງ ທີ່ເຄື່ອນໄຫວບໍ່ມີປະສິດທິຜົນ ໂດຍພິຈາລະນາເປັນແຕ່ລະກໍລະນີ ຢ່າງຮັດກຸມ ເພື່ອແນໃສ່ແກ້ໄຂບັນຫາໜີ້ສິນຂອງບັນດາລັດວິສາຫະກິດດັ່ງກ່າວ ໃຫ້ຫຼຸດລົງເທື່ອລະກ້າວ.
6. ກອງປະຊຸມ ໄດ້ຮັບຟັງການລາຍງານກ່ຽວກັບບຜົນການຕິດຕາມ ແລະ ຊຸກຍູ້ການຈັດຕັ້ງປະຕິບັດຄໍາສັ່ງ 15/ນຍ, ຜ່ານການຮັບຟັງການລາຍງານ ແລະ ປະກອບຄຳເຫັນ ກອງປະຊຸມ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງ ເອົາໃຈໃສ່ ເປັນຕົ້ນ ໃຫ້ ໃຫ້ບັນ ດາກະຊວງ, ອົງການທຽບເທົ່າ, ນະຄອນຫຼວງວຽງຈັນ ແລະ ບັນດາແຂວງ ສືບຕໍ່ຈັດຕັ້ງປະຕິບັດທິດທາງໃນຕໍ່ໜ້າ ຕາມ 10 ຂໍ້ທີ່ຄະນະສະເພາະກິດໄດ້ສະເໜີ ໃຫ້ເປັນຮູບປະທໍາ; ໃຫ້ພາກສ່ວນກ່ຽວຂ້ອງ ເພີ່ມທະວີຄວາມເຂັ້ມງວດ ໃນການຄຸ້ມຄອງ, ກວດກາການຂຸດຄົ້ນ ໄມ້, ການເຄື່ອນຍ້າຍໄມ້ ແລະ ທຸລະກິດໄມ້ໃຫ້ມີປະສິດທິຜົນກວ່າເກົ່າ ແລະ ພ້ອມດຽວກັນ ກໍມອບໃຫ້ກະຊວງອຸດສາຫະກຳ ແລະ ການຄ້າ ເປັນໃຈກາງສົມທົບກັບຂະແໜງການກ່ຽວຂ້ອງ ແລະ ທ້ອງຖິ່ນ ສືບຕໍ່ດັດສົມໂຮງງານປຸງແຕ່ງໄມ້ ໃຫ້ຂາດຕົວ ແລະ ເປັນຮູບປະທຳ ໂດຍໄວ; ມອບໃຫ້ກະຊວງການເງິນ ເປັນໃຈກາງສົມທົບກັບພາກ ສ່ວນກ່ຽວຂ້ອງ ເລັ່ງທວງເອົາໜີ້ພັນທະໄມ້ທີ່ຍັງຄ້າງ ເຂົ້າງົບປະມານໃຫ້ຄົບຖ້ວນ ແລະ ສຳເລັດໄວ; ມອບໃຫ້ອົງການກວດກາລັດຖະບານ ຊຸກຍູ້ ແລະ ຕິດຕາມກວດກາຄວາມຄືບ ໜ້າໃນການຈັດຕັ້ງປະຕິບັດ ແລ້ວລາຍງານລັດຖະບານຊາບເປັນປົກກະຕິ.ໃຫ້ປຶກສາຫາລື ປັບປຸງກົນໄກການເຮັດວຽກ, ແບ່ງວຽກ, ແບ່ງຄວາມຮັບຜິດຊອບກັນ ລະອຽດ.
7. ກອງປະຊຸມ ໄດ້ຮັບຟັງການລາຍງານກ່ຽວກັບການກະກຽມໃຫ້ແກ່ການຫຼຸດພົ້ນອອກຈາກສະຖານະພາບປະເທດດ້ອຍພັດທະນາ (LDCs). ກອງປະຊຸມ ໄດ້ຊີ້ນໍາໃຫ້ກະຊວງການຕ່າງປະເທດ ນໍາເອົາການປະກອບຄໍາຄິດເຫັນຂອງບັນດາສະມາຊິກລັດຖະບານ ແລະ ບັນດາເຈົ້າແຂວງ ນໍາໄປສຶກສາຄົ້ນຄວ້າລະອຽດ ແລະ ປຶກສາຫາລື ນໍາອົງການທີ່ກ່ຽວຂ້ອງເຖິງຄວາມເປັນໄປໄດ້ ສປປ ລາວ ຈະອອກຈາກສະຖານະປະເທດດ້ອຍພັດທະນາ ຕາມການປະເມີນຂອງອົງການ ສປຊ ໃນປີ 2021 ແລ້ວກ້າວເຂົ້າສູ່ໄລຍະຂ້າມຜ່ານ 3 ປີ ໄປຈົນເຖິງປີ 2024, ພ້ອມທັງ ຄົ້ນຄວ້າແຜນໃນການຮັບມືກັບສິ່ງທ້າທາຍທີ່ຈະປະເຊີນໃນອະນາຄົດ ພາຍຫຼັງທີ່ໄດ້ຖືກປະກາດອອກຈາກສະຖານະປະເທດດ້ອຍພັດທະ ນາແລ້ວ ເພື່ອຮັບປະກັນທາງດ້ານສະຖຽນລະພາບທາງດ້ານເສດຖະກິດ-ສັງຄົມຂອງ ສປປ ລາວ.
8. ກອງປະຊຸມໄດ້ຮັບຟັງການລາຍງານກ່ຽວກັບ ຜົນການຈັດຈັດຕັ້ງປະຕິບັດແຜນການແກ້ໄຂບັນຫາຄົນຕ່າງປະເທດ ທີ່ເຄື່ອນໄຫວບໍ່ຖືກຕ້ອງຢູ່ ສປປ ລາວ. ຕໍ່ບັນຫາດັ່ງກ່າວ, ກອງປະຊຸມໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງສືບຕໍ່ເອົາໃຈໃສ່ຕື່ມ ເປັນຕົ້ນຕ້ອງຫັນວຽກງານນີ້ ໃຫ້ໄປຕາມກົດໝາຍ, ລະບຽບການ ຢ່າງເຂັ້ມງວດ ກວ່າເກົ່າ. ແຕ່ຕ້ອງຮັບປະກັນຄວາມເປັນທຳ, ຜົນປະໂຫຍດອັນຊອບທຳຂອງຝ່າຍກ່ຽວຂ້ອງ.
9. ກອງປະຊຸມ ໄດ້ຮັບຟັງການລາຍງານ ກ່ຽວກັບການຈັດຕັ້ງປະຕິບັດການແກ້ໄຂຜົນກະທົບ ແລະ ຜັນຂະ ຫຍາຍນະ ໂຍບາຍ, ມາດຕະການ ເພື່ອຫຼຸດຜ່ອນຜົນກະທົບຈາກການລະບາດຂອງພະຍາດ ໂຄວິດ 19 ຕໍ່ເສດຖະກິດ-ສັງຄົມຂອງລາວ. ກອງປະຊຸມ ໄດ້ຕີລາຄາວ່າ: ສໍາລັບການແຜ່ລະບາດຂອງພະຍາດໂຄວິດ 19 ໄດ້ເລີ່ມຕົ້ນແຜ່ຂະຫຍາຍນັບແຕ່ທ້າຍປີ 2019 ແລະ ເພີ່ມທະວີຄວາມຮຸນແຮງຂຶ້ນໃສຫຼາຍປະເທດໃນໂລກ. ມາຮອດປະຈຸ ບັນ, ສະພາບການລະບາດດັ່ງກ່າວຍັງສືບຕໍ່ສ້າງຄວາມກັງວົນ ແລະ ສົ່ງຜົນກະທົບຕໍ່ສະພາບເສດຖະກິດ-ສັງຄົມໃນທົ່ວໂລກ. ສໍາລັບ ສປປ ລາວ ໄດ້ພົບກໍລະນີຜູ້ທໍາອິດຕິດເຊື້ອໃນທ້າຍເດືອນມີນາ 2020 ເຊິ່ງລັດຖະບານໄດ້ມີຄວາມເອົາໃຈໃສ່ເປັນຢ່າງສູງ ເພື່ອປ້ອງກັນ ແລະ ສະກັດກັ້ນການແຜ່ລະບາດ ໂດຍການກຳນົດມາດຕະການຕ່ງໆ ຢ່າງທັນການປິດປະເທດ ໃນເດືອນເມສາ 2020 ແລະ ມີມາດຕະການຜ່ອນຜັນເປັນແຕ່ລະໄລຍະເປັນຕົ້ນມາ. ຈາກສະພາບການດັ່ງກ່າວ ໄດ້ສົ່ງຜົນກະທົບຕໍ່ສະພາບເສດຖະກິດ-ສັງຄົມ ຂອງປະເທດເຮົາ ເປັນຕົ້ນ ການຜະລິດເພື່ອສົ່ງອອກ, ການບໍລິການການທ່ອງ ທ່ຽວ ແລະ ການບໍລິການປິ່ນອ້ອມ ໄດ້ເຮັດໃຫ້ລາຍຮັບພາກທຸລະກິດ ແລະ ຄົວເຮືອນຫຼຸດລົງ. ສະນັ້ນ, ລັດຖະບານ ຈຶ່ງໄດ້ກໍານົດ 10 ນະໂຍບາຍ ແລະ 9 ມາດຕະການ ເພື່ອແກ້ໄຂສະພາບຄວາມຫຍຸ້ງຍາກດ້ານເສດຖະກິດ ທີ່ຖືກຜົນກະທົບຈາກການແຜ່ລະບາດຂອງເຊື້ອພະຍາດດັ່ງກ່າວ ຕາມຂໍ້ຕົກລົງເລກທີ 31/ນຍ, ຜ່ານການຈັດຕັ້ງປະຕິບັດມາ ຮອດປະຈຸບັນ ເຫັນວ່າບັນດານະໂຍບາຍ ແລະ ມາດຕະການດັ່ງກ່າວ ສາມາດແກ້ໄຂຂໍ້ຫຍຸ້ງຍາກ ໂດຍສະເພາະ ດ້ານຕົ້ນທຶນຕ່າງຂອງພາກທຸລະກິດ ແລະ ຄົວເຮືອນໄດ້ລະດັບໜຶ່ງ ພ້ອມນັ້ນ ຍັງຊ່ວຍຊຸກຍູ້ ແລະ ອໍານວຍຄວາມສະດວກການຜະລິດພາຍໃນ ໃຫ້ຄ່ອຍກັບຄືນມາສູ່ສະພາບປົກກະຕິ. ແຕ່ເຖິງຢ່າງ ໃດກໍ່ຕາມ ກອງປະຊຸມຄັ້ງນີ້ ໄດ້ຊີ້ນໍາໃຫ້ພາກສ່ວນທີ່ກ່ຽວຂ້ອງສືບຕໍ່ເພີ່ມທະວີເອົາໃຈໃສ່ ສືບຕໍ່ປະຕິບັດບັນດາມາດຕະການສະກັດກັ້ນ, ຕ້ານການແຜ່ລະບາດຂອງພະຍາດດັ່ງກ່າວ ໃນຕໍ່ໄປ.
10. ກອງປະຊຸມ ໄດ້ຮັບຟັງການລາຍງານການຜັນຂະຫຍາຍຜົນກອງປະຊຸມຄະນະກໍາມະການຮ່ວມມືທະວີພາຄີ ລະຫວ່າງ ລັດຖະບານແຫ່ງ ສປປ ລາວ ແລະ ລັດຖະບານແຫ່ງ ສສ ຫວຽດນາມ ຄັ້ງທີ 43 ປະຈໍາປີ 2020. ກອງປະຊຸມໄດ້ຊີນໍາໃຫ້ກະຊວງການຕ່າງປະເທດ ແລະ ພາກສ່ວນທີ່ກ່ຽວຂ້ອງນໍາເອົາເນື້ອໃນ ແລະ ຜົນຂອງການຮ່ວມມືລະຫວ່າງ ສອງຄະນະກຳມະການໄປຕັດຕັ້ງຜັນຂະຫຍາຍເຂົ້າໃນການວຽກງານຂອງຕົນ ໃຫ້ໄດ້ຮັບຜົນດີ.
ເພື່ອຈັດຕັ້ງປະຕິບັດທິດຊີ້ນຳ ຂອງກອງປະຊຸມລັດຖະບານ ຊຸດທີ VIII ເປີດກວ້າງທ້າຍສະໄໝ ໃຫ້ມີປະສິດທິຜົນ, ກອງປະຊຸມ ມອບໃຫ້ຫ້ອງວ່າການສໍານັກງານນາຍົກລັດຖະມົນຕີ ຮຽບຮຽງເປັນມະຕິຂອງກອງປະຊຸມ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດ. ຖ້າເຫັນວ່າບັນຫາໃດ ມີຄວາມຈໍາເປັນຕ້ອງອອກເປັນຄໍາສັ່ງ, ຂໍ້ຕົກລົງ ຫຼື ແຈ້ງການຕື່ມອີກ ກໍ່ໃຫ້ຮ່າງເປັນນິຕິກໍາລະອຽດ ເພື່ອໃຫ້ລັດຖະບານພິຈາລະນາຕົກລົງ. ພ້ອມກັນນີ້, ກໍ່ໄດ້ມອບໃຫ້ສະມາຊິກລັດຖະບານ, ເຈົ້າຄອງນະຄອນຫຼວງວຽງຈັນ ແລະ ບັນດາທ່ານເຈົ້າແຂວງ ຈົ່ງນໍາເອົາເນື້ອໃນຈິດໃຈທີ່ໄດ້ຕົກລົງເປັນເອກະພາບ ໃນກອງປະຊຸມຄັ້ງນີ້ ລວມທັງ ວຽກງານຈຸດສຸມ ທີ່ໄດ້ກໍານົດໄວ້ໃນດໍາລັດວ່າດ້ວຍ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ສໍາລັບປີ 2021 ໄປຈັດຕັ້ງປະຕິບັດ ໃຫ້ມີປະສິດທິຜົນ, ພ້ອມທັງ ສະຫຼຸບລາຍງານຜົນການຈັດຕັ້ງປະຕິບັດ ໃຫ້ຫ້ອງວ່າການສຳນັກງານນາຍົກລັດຖະມົນຕີ.
ໃນໂອກາດນີ້ ກອງປະຊຸມ ໄດ້ສະແດງຄວາມຮູ້ບຸນຄຸນ ແລະ ຂອບອົກຂອບໃຈທີ່ກົມການເມືອງ ແລະ ຄະນະເລຂາທິການສູນກາງພັກ, ສະພາແຫ່ງຊາດ, ບັນດາອົງການຈັດຕັ້ງພັກ, ລັດ, ແນວລາວສ້າງຊາດ, ສະຫະພັນນັກຮົບເກົ່າ, ບັນດາອົງການຈັດຕັ້ງມະຫາຊົນ ທີ່ໄດ້ໃຫ້ການຊີ້ນຳ, ສະໜັບສະໜູນຊ່ວຍເຫຼືອລັດຖະບານ ຊຸດທີ VIII ເຮັດລ້ອນໜ້າທີ່ຂອງຕົນ; ຊົມເຊີຍພະນັກງານ, ລັດຖະກອນ, ນັກຮຽນນັກສຶກສາ, ຜູ້ປະກອບການ, ປະຊາຊົນບັນດາເຜົ່າ, ຊັ້ນຄົນ ແລະ ພີ່ນ້ອງເຊື້ອຊາດລາວຢູ່ຕ່າງປະເທດ ທີ່ເວລາໃດ ກໍ່ໄດ້ສະໜັບສະໜູນ ເປັນກຳລັງແຮງ ໃຫ້ລັດຖະບານ ໃນການປະຕິບັດໜ້າທີ່ວຽກງານບໍລິຫານປະເທດຊາດຂອງຕົນ. ຂອບອົກຂອບໃຈ ຕໍ່ປະເທດເພື່ອນມິດ, ປະເທດອາຊຽນ ແລະ ປະຊາຊົນໃນໂລກ, ອົງການຈັດຕັ້ງສາກົນ ທີ່ໄດ້ສະໜັບສະໜູນ ຊ່ວຍເຫຼືອລັດຖະບານ ສປປ ລາວ ຕະຫຼອດໄລຍະ 5 ປີ ທີ່ຜ່ານມາ.
Loading...