ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ຜົນກອງປະຊຸມໃຫຍ່ ຄັ້ງທີ III ຂອງໜ່ວຍພັກ ກົມອາຊຽນ

ໃນຕອນເຊົ້າວັນທີ 20 ພຶດ​ສະ​ພາ 2020, ກອງ​ປະ​ຊຸມ​ໃຫຍ່ ຄັ້ງ​ທີ III ຂອງໜ່ວຍ​ພັກ​ກົມອາຊຽນ ກະ​ຊວງ​ການ​ຕ່າງ​ປະ​ເທດ ໄດ້ໄຂຂຶ້ນຢ່າງເປັນທາງການ, ໂດຍການໃຫ້ກຽດເຂົ້າຮ່ວມ​​ເປັນປະທານຂອງ ສະຫາຍ ສະເຫຼີມໄຊ ກົມມະສິດ, ກໍາມະການສູນກາງພັກ, ເລ​ຂາຄະນະບໍລິຫານງານພັກ, ລັດຖະມົນຕີກະ​ຊວງ​ການ​ຕ່າງ​ປະ​ເທດ ແລະ ສະຫາຍ ລັດສະໝີ ແກ້ວມະນີ, ເລຂາໜ່ວຍພັກ, ຫົວໜ້າກົມອາຊຽນ. ເຂົ້າຮ່ວມກອງປະຊຸມຄັ້ງນີ້, ຍັງມີບັນດາສະຫາຍເລຂາ, ຮອງເລຂາ ແລະ ຜູ້ຕາງໜ້າໜ່ວຍພັກອ້ອມຂ້າງກະຊວງການຕ່າງປະເທດ, ແລະສະມາຊິກຜູ້ແທນສົມບູນ ແລະສຳຮອງຂອງໜ່ວຍພັກກົມ ເຂົ້າຮ່ວມຢ່າງພ້ອມພຽງ.

ກອງປະຊຸມ ໄດ້ເຫັນດີຮັບຮອງເອົາ ບົດລາຍງານການເມືອງ ຕໍ່ກອງປະຊຸມໃຫຍ່ຄັ້ງທີ III  ຂອງໜ່ວຍພັກກົມອາຊຽນ, ຊຶ່ງປະກອບມີການສະຫລຸບຕີລາຄາຄືນ ດ້ານດີ-ດ້ານອ່ອນ ການຊີ້ນໍາ-ນໍາພາວຽກພັກ, ພະນັກງານ ຕະຫລອດໄລຍະ 5 ປີຜ່ານມາ ແລະ ທິດທາງໃນ 5 ປີຕໍ່ໜ້າ (2021-2025) ເພື່ອເປັນທິດທາງໃຫ້ໜ່ວຍພັກກົມ ສືບຕໍ່ປະຕິບັດໜ້າທີ່ການເມືອງທີ່ຖືກມອບໝາຍ ໃຫ້ໄດ້ຮັບໝາກຜົນສູງ; ພິເສດ, ເພື່ອພ້ອມກັນ ສືບຕໍ່ປ້ອງກັນນາມມະຍົດ ໜ່ວຍພັກແຂງຮູ້ນໍາພາຮອບດ້ານ ແລະດໍາເນີນກໍ່ສ້າງເຮັດໃຫ້ໜ່ວຍພັກກົມອາຊຽນເປັນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ໃນຕໍ່ໜ້າ. ສໍາຄັນ, ກອງປະຊຸມຄັ້ງນີ້ ໄດ້ເຫັນດີເປັນເອກະພາບກັນ ຮັບຮອງເອົາມະຕິກອງປະຊຸມ, ເຊິ່ງເປັນເອກະສານທິດທາງ ພື້ນຖານ ໃຫ້ແກ່ໜ່ວຍພັກ ໃນການຫັນເປັນແຜນງານ/ໂຄງການລະອຽດ ເພື່ອຊີ້ນໍາ-ນໍາພາ ວຽກພັກ ແລະພະນັກງານຕໍ່ໄປ. ໃນນີ້, ກອງປະຊຸມໄດ້ຮັບຮອງເອົາ ຜົນການເລືອກຕັ້ງຄະນະພັກກົມອາຊຽນຊຸດໃໝ່, ຊຶ່ງປະກອບມີ:

  1. ສະ​ຫາຍ ລັດ​ສະ​ໝີ ແກ້ວ​ມະ​ນີ, ເລ​ຂາໜ່ວຍ​ພັກ​;
  2. ສະ​ຫາຍ ນ. ແສງ​ດາ​ວັນ ວົງ​ໄຊ, ​ຮອງ​ເລ​ຂາໜ່ວຍ​ພັກ​;
  3. ​ສະ​ຫາຍ ບໍ​ວອນ​ທັດ ດວງ​ຈັກ, ​ກຳ​ມະ​ການໜ່ວຍ​ພັກ, ປະ​ທານກວດ​ກາ.

ນອກນັ້ນ, ກອງປະຊຸມ ໄດ້ເປັນກຽດຮັບຟັງການໂອ້ລົມ ແລະ ໃຫ້ທິດຊີ້ນໍາຂອງ ສະຫາຍ ສະເຫຼີມໄຊ              ກົມມະສິດ, ກໍາມະການສູນກາງພັກ, ເລ​ຂາຄະນະບໍລິຫານງານພັກ, ລັດຖະມົນຕີກະ​ຊວງ​ການ​ຕ່າງ​ປະ​ເທດ, ເຊິ່ງຄຽງຄູ່ກັບ ​ສະແດງຄວາມຍ້ອງຍໍຊົມເຊີຍ ຕໍ່ຜົນງານຂອງໜ່ວຍພັກກົມອາຊຽນໃນໄລຍະຜ່ານມາ, ສະຫາຍໄດ້ໃຫ້ທິດຊີ້ນໍາຕໍ່ວຽກພັກ-ພະ ນັກງານ, ເພື່ອນໍາໄປຜັນຂະຫຍາຍໃນຕໍ່ໜ້າຄື: ຍົກສູງຄວາມເປັນແບບຢ່າງທີ່ດີແກ່ມະຫາຊົນ; ການກໍ່ສ້າງຂະຫຍາຍສະມາຊິກພັກ ຕ້ອງຖືຄຸນນະພາບເປັນກົກ; ແບບແຜນວິທີເຮັດວຽກ ຕ້ອງຢຶດຖືຫຼັກການ ລວມສູນປະຊາທິປະໄຕ ແລະ ມີຄວາມເປັນເອກະພາບພາຍໃນໜ່ວຍພັກສູງ;  ເພີ່ມທະວີຄວາມສາມັກຄີເປັນປຶກແຜ່ນພາຍໃນພັກ; ສືບຕໍ່ຊີ້ນຳ-ນຳພາຢ່າງໃກ້ຊິດຕໍ່ 3 ອົງການຈັດຕັ້ງມະຫາຊົນ; ເພີ່ມທະວີເອົາໃຈໃສ່ວຽກງານກວດກາໃຫ້ເຂັ້ມແຂງ; ແລະ ຍົກສູງ ປະສິດທິພາບ ປະສິດທິຜົນໃນການປະຕິບັດໜ້າທີ່ດ້ານວິຊາສະເພາະຂອງຕົນໃຫ້ມີຄຸນນະພາບ ແລະ ສາມາດເປັນເສນາທິການ ທີ່ເຂັ້ມແຂງ ຕໍ່ຄະນະພັກ ກໍຄືຄະນະນໍາກະຊວງ ເພື່ອພ້ອມກັນນໍາຜົນປະໂຫຍດອັນສູງສຸດ ມາສູ່ປະເທດຊາດ ແລະ ປະຊາຊົນລາວເຮົາ.

ຂ່າວ: ກົມການຂ່າວ, ກະຊວງການຕ່າງປະເທດ