ຜົນກະທົບຕໍ່ສາຍນໍ້າປະແທ່ນ ເມືອງຫີນບູນ ຈະໄດ້ຮັບການແກ້ ໄຂຢ່າງຈິງຈັງ

ໃນວັນທີ 01 ສິງຫາ 2024 ຢູ່, ກະຊວງພະລັງງານ ແລະ ບໍ່ແຮ່ ຮ່ວມກັບພາກສ່ວນກ່ຽວຂ້ອງທັງພາກລັດ ແລະ ເອກະຊົນ ຈັດກອງປະຊຸມປຶກສາຫາລື ເພື່ອຊອກຫາວິທີການແກ້ໄຂຜົນກະ ທົບຕໍ່ອ່າງນໍ້າປະແທ່ນ ທີ່ແກຍາວມາຫຼາຍສິບປີ ຈາກການດຳເນີນກິດຈະການກ່ຽວກັບແຮ່ທາດ, ຢູ່ເຂດບໍ່ແໜ່ງ, ເມືອງຫີນບູນ, ແຂວງຄຳມ່ວນ ຢູ່ທີ່ ໂຮງແຮມລາວເທວ, ນະຄອນຫຼວງວຽງຈັນ ໂດຍເປັນປະທານຂອງທ່ານ ບຸນຍົງ ສີດາວົງ ຮັກສາການຫົວໜ້າກົມ ຄຸ້ມຄອງບໍ່ແຮ່, ກະຊວງ ພະລັງານ ແລະ ບໍ່ແຮ່ ມີ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ບຸນຍົງ ສີດາວົງ ໄດ້ກ່າວເປີດກອງປະຊຸມ ພ້ອມທັງສະເໜີສະພາບລວມການຂຸດຄົ້ນ ແລະ ປຸງແຕ່ງເເຮ່ທາດ ຢູ່ເຂດບໍ່ກົ່ວໂພນຕິ້ວ (ຢູ່ອ່າງປະແທ່ນ) ຂອງແຕ່ລະບໍລິສັດ ໃນນີ້, ທ່ານ ຮັກສາການຫົວໜ້າກົມຄຸ້ມຄອງບໍ່ແຮ່ ໄດ້ຍົກໃຫ້ເຫັນສະພາບຕົວຈີງຢູ່ພາກສະໜາມກ່ຽວກັບການກັ່ນກອງ ຫຼຶ ບຳບັດນ້ຳຂອງແຕ່ລະໂຄງການກ່ອນຈະປ່ອຍອອກສູ່ສາຍນໍ້າປະແທ່ນ ເຊິ່ງເປັນແມ່ນ້ຳທຳມະຊາດ ເພື່ອໃຫ້ຜູ້ເຂົ້າຮ່ວມກອງປະຊຸມໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງ ທັງນີ້ກໍ່ເພື່ອຮັບປະກັນເຮັດໃຫ້ການຄົ້ນຄວ້າ, ປຶກສາຫາລື ແລະ ການແລກປ່ຽນບົດຮຽນຮ່ວມກັນຄັ້ງນີ້ ມີເນື້ອໃນທີ່ຄົບຖ້ວນ, ຖືກຕ້ອງ ແລະ ສອດຄ່ອງກັບສະພາບຄວາມເປັນຈິງຂອງແຕ່ລະໂຄງການ ທັງຮັບປະກັນເຮັດໃຫ້ບັນຫາດັ່ງກ່າວ ໄດ້ຮັບການແກ້ໄຂໄດ້ຢ່າງສີ້ນເຊີງ ຕາມນະໂຍບາຍຂອງລັດຖະບານ ໂດຍສະເພາະແມ່ນຍຸດທະສາດການພັດທະນາແຮ່ທາດແຕ່ນີ້ຮອດປີ 2030 ແລະ ການຕົກລົງເຫັນດີຂອງ ສະພາ ແຫ່ງຊາດ ກ່ຽວກັບການແກ້ໄຂບັນຫາຜົນກະທົບທີ່ເກີດຈາກການດຳເນີນກິດຈະການຂຸດຄົ້ນ ແລະ ປຸງແຕງແຮທາດ ຕໍ່ສາຍນໍ້າປະແທ່ນໃຫ້ສຳເລັດພາຍໃນປີ 2025.

ຫຼັງຈາກນັ້ນ, ຜູ້ເຂົ້າຮ່ວມກອງປະຊຸມ ທີ່ມາຈາກບັນດາກະຊວງ, ອົງການລັດຂັ້ນສູນກາງ, ອົງການປົກຄອງທ້ອງຖິ່ນ ແລະ ພາກສ່ວນທີ່ກ່ຽວຂ້ອງ ກໍ່ໄດ້ພ້ອມກັນສຸ່ມຈິດສຸ່ມໃຈ ແລກປ່ຽນຄວາມຄິດເຫັນຢ່າງກົງໄປກົງມາ, ມີລັກສະນະວິທະຍາສາດ ທັງຖອດຖອນບົດຮຽນຂອງປະເທດເພື່ອມິດສາກົນອື່ນໆ ເພື່ອເປັນບ່ອນອີງໃຫ້ ລັດຖະບານ ໂດຍສະເພາະແມ່ນກະຊວງພະລັງງານ ແລະ ບໍ່ແຮ່ ແລະ ກະຊວງຊັບພະຍາກອນທຳມະຊາດ ແລະ ສິ່ງ ແວດລ້ອມ ໄດ້ນຳໄປຄົ້ນຄວ້າ ເພື່ອສ້າງເປັນແຜນ ແລະ ກົນໄກໃນການຈັດຕັ້ງປະຕິບັດແກ້ໄຂບັນຫາດັ່ງກ່າວໃຫ້ສຳເລັດໂດຍໄວ, ຟື້ນຟູສະພາບແວດລ້ອມທີ່ໄດ້ຮັບຜົນກະທົບ ມີສະພາບທີ່ດີຂຶ້ນ ໂດຍສະເພາະແມ່ນສາຍນໍ້າປະແທ່ນໃຫ້ເປັນສາຍນໍ້າທຳມະຊາດ ທີ່ສະອາດ ແລະ ປອດໄພ.

ພາບ: ກົງເມັງ ລີຕົ່ງປາວ