ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສະຫະພັນກິລາບິນລຽດ – ສະນຸກເກີ ແຫ່ງຊາດລາວ ຮ່ວມກັບ ສະໂມສອນ ພີເອັສ ສະນຸກເກີ ເພື່ອພັດທະນາເລືອກເຟັ້ນຫານັກກິລາດາວດວງໃໝ່, ໄດ້ຈັດການແຂ່ງຂັນກິລາ ສະນຸກເກີ ເພື່ອຄັດເລືອກຮຸ່ນ ສືບທອດເປັນທີມຊາດ ໄປແຂ່ງຂັນໃນລະດັບອານຸພາກພື້ນ ແລະ ສາກົນ. ເຊິ່ງການແຂ່ງຂັນໃນຄັ້ງນີ້ມີນັກກິລາເຂົ້າຮ່ວມ 72 ຄົນ ທີ່ມາຈາກສະໂມສອນຕ່າງໆໃນນະຄອນຫລວງວຽງຈັນ, ບັນດາແຂວງພາກກາງ, ພາກໃຕ້ ແລະ ນັກກິລາຮັບເຊີນຈາກປະເທດໄທ ເຊິ່ງແຂ່ງຂັນຈັດຂຶ້ນລະຫວ່າງວັນທີ 1-4 ມີນາ 2024 ແບ່ງອອກເປັນ 7 ຮອບ ທີ່ສະໂມສອນ ພີເອັສ ສະນຸກເກີ ບ້ານວຽງຈະເລີນ ເມືອງໄຊເສດຖາ ນະຄອນຫລວງວຽງຈັນ.
ສໍາລັບ ຄູ່ຊິງຊະນະເລີດໃນການແຂ່ງຂັນຄັ້ງນີ້: ລີ່ ລີເຈັນຊີ້ ຈາກນະຄອນຫລວງວຽງຈັນ ເອົາຊະນະ ສິດທິເດດ ສັກບ່ຽງ ມື 1 ທີມຊາດລາວ 5-4 ເຟຣມ ໄດ້ຂັນແຊ້ມ ພ້ອມເງິນລາງວັນ 10 ລ້ານກີບ, ໜຶ່ງເມືອງລາວ ຮອງແຊ້ມ ໄດ້ຮັບຂັນຮອງຊະນະເລີດ ແລະ ເງິນລາງວັນ 5 ລ້ານກີບ, ອັນດັບ 3 ຮ່ວມ ຟູ່ໂຢ ພີເອັສ ນັກສະນຸກເກີຈາກລາວ ແລະ ຕໍ້າ ຂວາ ຮັນເຕີ ຈາກໄທ ໄດ້ຮັບເງິນລາງວັນຄົນລະ 2 ລ້ານກີບ ແລະ ອັນດັບ 5-8 ຫລື ຕົກຮອບ 8 ຄົນສຸດທ້າຍ ໄດ້ຮັບລາງວັນເງິນສົດຜູ້ລະ 5 ແສນກີບ, ສ່ວນລາງວັນເຂົ້າເບຣກສູງສຸດເປັນຂອງ ຕໍ້າ ຂວາ ຮັນເຕີ ຈາກໄທ ໄດ້ຮັບເງິນລາງວັນ 5 ແສນກີບ.
ທ່ານ ລິຄິດ ອິນທະວົງ ຮອງປະທານ, ເລຂາທິການ ສະຫະພັນບິນລຽດ-ສະນຸກເກີ ໃຫ້ຮູ້ວ່າ: ສະຫະພັນມີແຜນຈັດການແຂ່ງຂັນ, ຄັດເລືອກນັກກິລາທີມຊາດຊຸດໃໝ່ ເພື່ອກຽມເຂົ້າຮ່ວມແຂ່ງຂັນ ອິນດໍຣເກມໃນທ້າຍປີນີ້, ຊີເກມທີ່ປະເທດໄທ ທ້າຍປີໜ້າ ແລະ ຈະສົ່ງໄປແຂ່ງຂັນທີ່ປະເທດຈີນ; ເຊິ່ງກິລາແຫ່ງຊາດໃນປີ 2025 ນີ້ ກິລາສະນຸກເກີໄດ້ຖືກບັນຈຸເຂົ້າກິລາແຫ່ງຊາດວຽງຈັນເກມ ເປັນຄັ້ງທໍາອິດໃນຮອບ 10ປີ.
ສຳລັບການແຂ່ງຂັນສະນຸກເກີໃນຄັ້ງນີ້ຖືວ່າໄດ້ຜົນສໍາເລັດເປັນຢ່າງດີ ໄດ້ເຫັນນັກກິລາມືໃໝ່ ມາປະດັບວົງການ ເຊິ່ງສະຫະພັນບິນລຽດ-ສະນຸກເກີ ຮ່ວມກັບສະໂມສອນ ເອັສພີ ສະນຸກເກີໄດ້ຈັບມືຮ່ວມກັນພັດທະນາວົງການສະນຸກເກີໃຫ້ດີຍິ່ງຂຶ້ນ.
ໂດຍ : ມະນີຈັນ ສີວັນວອນ ແລະ ພອນ ວົງສະຫວັນ