ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ໄດ້ດຳເນີນມາເປັນເວລາສອງວັນເຕັມ ອັດລົງດ້ວຍຜົນສຳເລັດ ໃນຕອນບ່າຍວັນທີ່ 26 ກໍລະກົດ 2024 ນີ້ ທີ່ສະໂມສອນໃຫຍ່ຂອງຫ້ອງວ່າການແຂວງ ພາຍຫລັງດໍາເນີນມາ ເປັນເວລາສອງວັນ.
ກອງປະຊຸມໄດ້ດ້ສຸມໃສ່ຄົ້ນຄວ້າ, ພິຈາລະນາ ແລະ ຮັບຮອງ ເອົາບັນດາວຽກງານສຳຄັນພື້ນຖານຂອງແຂວງ ເຊັ່ນ: ໄດ້ຮັບຟັງບົດລາຍງານໂດຍຫຍໍ້ ກ່ຽວກັບການຈັດຕັ້ງປະຕິບັດວຽກງານຂອງແຂວງ, ການຈັດຕັ້ງປະຕິບັດແຜນພັດທະນາເສດຖະກິດ- ສັງຄົມ, ແຜນງົບປະມານຂອງແຂວງ ປະຈຳ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2024, ຮັບຮອງເອົາ ບົດລາຍງານ ການຈັດຕັ້ງປະຕິບັດວຽກງານ ການຄຸ້ມຄອງການຂຸດ ຄົ້ນແຮ່ທາດ ຢູ່ແຂວງຫຼວງພະບາງ, ບົດລາຍງານ ການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກ ຍາກ ຂອງແຂວງ ປະຈໍາ 06 ເດືອນຕົ້ນປີ ແລະ ວາງທິດທາງແຜນການ ປະຈຳ 06 ເດືອນ ທ້າຍປີ 2024, ຮັບຮອງເອົາ ບົດລາຍງານ ການຕິດຕາມກວດກາກົດໝາຍໃນຂົງເຂດ ການດໍາເນີນຄະດີ ຂອງເຈົ້າໜ້າທີ່ສືບສວນ-ສອບສວນ, ສານປະຊາຊົນ, ອົງ ການໄອຍະການປະຊາຊົນ ແລະອົງການຈັດຕັ້ງປະຕິບັດຄໍາຕັດສິນຂອງສານ, ລວມທັງການຈັດຕັ້ງປະຕິບັດວຽກງານ ຂອງສະພາປະຊາຊົນແຂວງ ປະຈຳ 6 ເດືອນຕົ້ນປີ ແລະທິດທາງແຜນການ ປະຈຳ 6 ເດືອນທ້າຍປີ 2024.
ກອງປະຊຸມ, ໄດ້ຮັບຟັງການຊີ້ແຈງບັນຫາຕ່າງໆ ທີ່ກໍາລັງເປັນບັນຫາຢູ່ໃນສັງຄົມ, ກໍຄືບັນຫາທີ່ປະຊາຊົນໃຫ້ຄວາມສົນໃຈ ໂດຍໄດ້ຮັບການຊີ້ແຈງຈາກທ່ານຫົວໜ້າພະແນກແຜນການ ແລະການລົງທຶນແຂວງ, ຫົວໜ້າ ພະແນກການເງິນແຂວງ, ຫົວໜ້າພະແນກພະລັງງານ ແລະ ບໍ່ແຮ່ແຂວງ, ຫົວໜ້າ ພະແນກກະສິກຳ ແລະ ປ່າໄມ້ແຂວງ ແລະ ຫົວໜ້າ ອົງການໄອຍະການປະຊາຊົນແຂວງ ເຫັນວ່າຫຼາຍໆບັນຫາທີ່ຖືກຊັກຖາມ ລ້ວນແລ້ວແຕ່ໄດ້ຮັບຄໍາຊີ້ແຈງຈາກພາກສ່ວນທີ່ກ່ຽວຂ້ອງເປັນຢ່າງດີ.
ນອກຈາກນີ້, ກອງປະຊຸມ, ຄະນະຮັບຜິດຊອບ ໄດ້ຮັບໂທລະ ສັບສາຍດ່ວນ ຈໍານວນ 07 ສາຍ, 10 ຄໍາສະເໜີ. ໃນນັ້ນ ແມ່ນກ່ຽວຂ້ອງກັບບັນຫາການຂົນສົ່ງໂດຍສານສາທາລະນະ ທີ່ຍັງບໍ່ ທັນເປັນລະບົບ, ບັນຫາການສໍາປະທານທີ່ດິນຂອງລັດແລ້ວບໍ່ດໍາເນີນກິດຈະການ, ບັນຫາຖະໜົນຫົນທາງທີ່ເປ່ເພ ເຮັດໃຫ້ມີຄວາມຫຍຸ້ງຍາກໃນການສັນຈອນໄປ-ມາ, ບັນຫາຂໍ້ຂັດແຍ່ງກ່ຽວ ກັບທີ່ດິນ, ບັນຫາການໃຊ້ຈ່າຍເງິນຕາຕ່າງປະເທດຢ່າງຊະຊາຍ, ບັນຫາອັດຕາເງິນເຟີ້ ແລະ ອື່ນໆ
