ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ຜົນສຳເລັດກອງປະຊຸມໃຫຍ່ຄັ້ງທີ IV ຂອງຜູ້ແທນ ແມ່ຍິງ ເມືອງທົ່ງມີໄຊແຂວງໄຊຍະບູລີ

ກອງປະຊຸມດັ່ງກ່າວນີ້ໄດ້ໄຂຂຶ້ນຢ່າງເປັນທາງການໃນວັນທີ 14-15 ພຶດສະພາ 2019 ຢູ່ທີ່ສະໂມ ສອນຂອງເມືອງ ໂດຍການການເປັນປະທານ ຂອງ ສະຫາຍ ນາງ ບຸນລຽນ ລັດຖະຫວັນ ວ່າການປະທານສະຫະພັນແມ່ຍິງເມືອງທົ່ງມີໄຊ, ເປັນກຽດເຂົ້າຮ່ວມຂອງ ສະຫາຍ ສົມພອນ ໄຊດວງຕາ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆທົ່ງມີໄຊ, ສະຫາຍ ນາງ ຄຳຜິວ ພັນທະວົງ ວ່າການປະທານສະຫັນພັນແມ່ຍິງແຂວງໄຊຍະບູລີ, ມີບັນດາຄະນະປະຈໍາພັກເມືອງ ກຳມະການພັກເມືອງ, ຫົວໜ້າຫ້ອງການ, ປະທານສະຫະພັນແມ່ຍິງເມືອງອອ້ມຂ້າງ, ຄະນະບໍ ລິຫານງານສະຫະພັນແມ່ຍິງເມືອງ , ຄະນະໜ່ວຍແມ່ຍິງຢູ່ພາຍໃນເມືອງຕາງໜ້າໃຫ້ສະມາຊິກແມ່ຍິງໃນທົ່ວເມືອງເຂົ້າຮ່ວມຢ່າງພ້ອມພຽງ.ກອງປະຊຸມໃຫຍ່ໄດ້ພ້ອມກັນຄົ້ນຄວ້າ ປະກອບຄຳຄິດຄຳເຫັນໃສ່ຮ່າງລາຍງານການເມືອງ ແລະ ບົດສຳລວດການນຳພາລວມຂອງຄະນະບໍລິຫານງານສະຫະ ພັນແມ່ຍິງ ຊຸດທີ III ໄດ້ເປັນເອກະພາບກັນຕີລາຄາດ້ານດີ, ດ້ານອອ່ນ, ຂໍ້ຄົງຄ້າງ, ສາເຫດ ແລະ ບົດຮຽນໃນການຊີ້ນຳ-ນຳພາຈັດຕັັ້ງປະຕິບັດມະຕິກອງປະຊຸມໃຫຍ່ 5ປີ ຜ່ານມາແຕ່ປີ 2014-2019 ແລະ ກໍານົດທິດທາງການພັດທະນາແມ່ຍິງ ແຕ່ປີ 2019-2023 ເຊິ່ງຄະນະບໍລິຫານງານສະຫະພັນແມ່ຍິງເມືອງທົ່ງມີໄຊເປັນອົງການຈັດຕັ້ງມະຫາຊົນໜຶ່ງ ໃນລະບົບການເມືອງ ຂອງລະບອບປະຊາ ທິປະໄຕປະຊາຊົນ ຢູ່ຂັ້ນທ້ອງຖິ່ນພາຍໃຕ້ການຊີ້ນຳ-ນຳພາຂອງອົງຄະນະພັກເມືອງ.

ເຊິ່ງໃນໄລຍະຜ່ານມາ ຄະນະນຳແມ່ຍິງແຕ່ລະຂັ້ນພ້ອມດ້ວຍສະມາຊິກແມ່ຍິງບັນດາເຜົ່າໃນທົ່ວເມືອງ ແມ່ນໄດ້ຍຶດໝັ້ນທັດສະນະຂອງພັກ, ຂອງແມ່ຍິງລາວ, ເຊີດຊູຈິດໃຈເພິ່ງຕົນເອງ, ກຸ້ມຕົນເອງ, ເປັນເຈົ້າຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ, ຖືເອົາການເຊື່ອມຊືມແນວທາງນະໂຍບາຍຂອງພັກ ມະຕິ, ຄຳສັ່ງຂອງຂັ້ນເທິງໄປຈັດຕັ້ງເຜີຍແຜ່ໃຫ້ພະນັກງານ, ສະມາຊິກແມ່ຍິງ ແລະ ແມ່ຍິງບັນດາ ເຜົ່າໃນທົ່ວເມືອງໄດ້ຮັບຮູ້ ແລະ ເຂົ້າໃຈຢ່າງທົ່ວເຖິງ. ເຊິ່ງສະແດງອອກໄດ້ນຳພາກອງປະຊຸມໃຫຍ່ຂັ້ນບ້ານໄດ້ 13ບ້ານ ແລະ 31 ໜ່ວຍອອ້ມຂ້າງສຳເລັດ, ທົ່ວເມືອງມີຄະນະບໍລິຫານງານສະຫະພັນແມ່ຍິງຈຳນວນ 13ສະຫາຍ, ມີສະມາຊິກສະຫະພັນແມ່ຍິງທັງໝົດ 1.330ສະຫາຍ, ຂະຫຍາຍສະມາຊິກແມ່ຍິງໃໝ່ໄດ້ 110ສະຫາຍ, ຂະຫຍາຍໜ່ວຍສະຫະພັນແມ່ຍິງໄດ້ 1ໜ່ວຍ, ພ້ອມນີ້ກໍ່ຍັງໄດ້ຮັບການຍ້ອງຍໍສັນລະເສີນຈາກຄະນະພັກ, ອົງການປົກຄອງຂັ້ນຕ່າງໆມີຄື: ໄດ້ຮັບນາມມະຍົດ 253ສະຫາຍ, ມີ 42ໜ່ວຍ, 2ກົມກອງ. ພ້ອມນີ້ກໍ່ຍັງໄດ້ປະເມີນຄອບຄົວ, ບ້ານພັດທະນາ ຕິດພັນກັບການປະຕິບັດສິດສະເໝີພາບ ລະຫວ່າງຍິງຊາຍ ປາສະຈາກການໃຊ້ຄວາມຮຸນແຮງໃນຄອບຄົວ ໂດຍສະເພາະຕໍ່ແມ່ຍິງ ແລະ ເດັກນ້ອຍ ໄດ້ 13ບ້ານ, ປະຕິບັດໄດ້ 1.991ຄອບຄົວ, ພ້ອມທັງມອບໃບຢັ້ງຢືນຄອບຄົວປະຕິບັດສິດສະເໝີພາບຍິງ-ຊາຍໄດ້ 6ບ້ານ ມີຈຳນວນ 1.036ຄອບຄົວ, ໄດ້ເປັນເຈົ້າການນຳພາເປີດຂະບວນການຈັດຕັ້ງແຂ່ງຂັນ 3ດີ ເປັນແຕ່ລະໄລຍະພ້ອມທັງກວດກາປະເມີນຜົນ ສາມາດສະຫຼຸບໄດ້ດັ່ງນີ້: ພົນລະເມືອງດີມີ 1.272 ສະຫາຍ, ພັດທະນາດີ 1.249 ສະຫາຍ, ສ້າງຄອບຄົວດີ 1.173 ສະຫາຍ, ບຸກຄົນ 3ດີປະເພດ1 ຈໍານວນ 1.173 ສະຫາຍ, ປະເພດ2 99ສະຫາຍ, ບໍ່ໄດ້ແບ່ງຈຳນວນ 51 ສະຫາຍ, ກົມກອງ 3 ດີ ມີ 2 ກົມກອງ, ໜ່ວຍສະຫະພັນແມ່ຍິງ 3 ດີ ມີ 23 ໜ່ວຍ, 4ຈຸ, 15 ຮາກຖານ ແລະ ບ້ານ 3 ດີ  13 ບ້ານ ໄດ້ຮັບຮອງ ແລະ ປະກາດເປັນເມືອງ 3 ດີ ໃນປີ 2012 ຢ່າງເປັນທາງການ. ນອກຈາກນີ້ຜູ້ແທນກອງປະຊຸມໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະບໍລິຫານງານ ສະຫະພັນແມ່ຍິງ ຊຸດໃໝ່, ບົນພື້ນຖານຄວາມຖືກຕ້ອງ, ສອດຄ່ອງກັບມາດຖານເງື່ອນໄຂທີ່ກຳນົດໄວ້, ເຊິ່ງມີຜູ້ອອກຮັບສະໝັກເລືອກຕັ້ງທັງໝົດ 17 ສະຫາຍ ເລືອກຕັ້ງເອົາ 15 ສະຫາຍ.  ກອງປະຊຸມຄັ້ງປະຖົມມະລຶກໄດ້ເປັນເອກະພາບກັນຢ່າງສູງເລືອກຕັ້ງເອົາ ສະຫາຍ ນາງ ບຸນລຽນ ລັດຖະຫວັນ ເປັນປະທານສະຫະພັນແມ່ຍິງເມືອງ, ສະຫາຍ ນາງ ສືບຮັກແກ້ວ ແລະ ສະຫາຍ ນາງ ບຸນສ້າງ ຂຸນນາມມະວົງ ເປັນຮອງປະທານ.ກອງປະຊຸມຍັງໄດ້ເປັນເອກະພາບກັນເລືອກຕັ້ງເອົາສະຫາຍ ນາງ ສືບ ຮັກແກ້ວ ເປັນປະທານກວດກາສະຫະພັນແມ່ຍິງເມືອງ, ສະຫາຍ ນາງ ທອງມາລີ ອິນປັນຍາ ແລະ ສະຫາຍ ນາງ ໂປລີ ບຸນຈະເລີນ ເປັນຜູ້ຊ່ວຍວຽກປະທານກວດກາ. ພ້ອມດຽວກັນນີ້ຜູ້ແທນກອງປະຊຸມຍັງໄດ້ປ່ອນບັດຄັດເລືອກເອົາຜູ້ແທນສົມບູນຈຳນວນ 6ສະຫາຍ ແລະ ຜູ້ແທນສໍາຮອງ 2ສະຫາຍ  ເພື່ອໄປຮ່ວມກອງປະຊຸມໃຫຍ່ຄັ້ງທີ 7 ຂອງຄະນະບໍລິຫານງານສະຫະພັນແມ່ຍິງ ແຂວງໄຊຍະບູລີ ທີ່ຈະໄດ້ຈັດຂຶ້ນໃນຕໍ່ໜ້າ. ເພື່ອເຮັດໃຫ້ກອງປະຊຸມດັ່ງກ່າວນີ້ມີຄວາມໝາຍສຳຄັນ ທັງເປັນບ່ອນອີງໃຫ້ແກ່ຄະນະບໍລິຫານ ສະຫະພັນແມ່ຍິງຊຸດໃໝ່ ແລະ ສະມາຊິກແມ່ຍິງໃນທົ່ວເມືອງ ນຳໄປຈັດຕັ້ງປະຕິບັດໃຫ້ເກີດດອກອອກຜົນນັ້ນ ໃນຕອນທ້າຍກໍ່ຍັງໄດ້ຮັບຟັງຄຳໂອ້ລົມຈາກ ສະຫາຍ ສົມພອນ ໄຊດວງຕາ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງໆທົ່ງມີໄຊນຳອີກ.

 

ຂ່າວ: ມິກລະຄອນ ຄຳມຸນທາ